TITO 2

1Dapat ay, hyamo fagfwayongon fag kagfaanod ka adal orongan. 2Fag lwang has manga magorang ama kitay, ta fag mahoway, magalang, idwag falabit sadili fakasayaon, fag orongan wagsyag in Diyos, galwasi manga taw, hanggan maagwantaon. 3Haw fag fwayong yadi has manga ina magorang kitay, fag magalang han Diyos, fag idwa mafadahiton ka manga dwat donggon, fag idwag lango. 4Fag fiya ista faadalon has taw kaarakitay fayayom fiya fiya ka manga ina bago kitay, ta fag galwasit manga indogan, it manga anak, 5idwag falabit sadili fakasayaon, fiya yadit manga fangayofan, mahogod no gibolon, mahoway hanggan matanogon hasta manga sadili indogan, kaarakitay manga iba taw idwa ha faglwangon igfadwat igdog in Diyos hampang. 6Ha fag faaronganon yadi has manga anahan kitay, ta fag idwag falabit sadili fakasayaon. 7Hanggan haw, Tito, im manga ogali fagayo fag fiya,ista fagtoladon. Fag kawa maanod haw nogfaadal, fag idwa mahakot. 8Fag filim hampang ka fiya, maanod yadi, kaarakitay idwa ha fabohag hyamo. No kitonya, ka kasayag laban intam maya wan, idwa yadi ha faglwangon. 9Ha fag togon yadi hasta manga nasali sogowan kitay, ta fag fasakop hat fagoliyanan nyawa kana, ta fag idwa masongat. No baliday ista fagsyaganon, fag gibolon fiya fiya. 10Ta fag idwa mahomiton, yatokitay, fag fiya ista ogali fagayo fagayo, kaarakitay manga taw lomwang kitay, fiya mangharaw in Diyos, intam Famawi, fagfaadalon. 11Maskin is Diyos nafalag hantam it malooy fag kahowayan kaarakitay fagayo fag manga taw fag imbawi wa nangos. 12To in Diyos kahowayan kagfayayom intam domayo ka dwat fag manga ogali, hanggan domayo ka bali fangayofan masayaon, 13no kandogay day tam no mafanayan yapdistay is baba daga. In Diyos kahowayan kagfayayom intam gogali ka fiya, idwag falabi intam sadili fakasayaon, igtolad in Diyos, kantam fagbayaon fag fagsyagon, kawas Kiristo Hisos, intam Diyos hanggan Famawi, kamlag aban sat fagbokngan masilaw fag kafiyan. 14Hanya nadisag it sadili kaarakitay fomalfas intam, fahaliyaw intam manga fangayofan, igfabali intam it nafili fag sakop, talaga wa omogali fiya. 15Fag danwag fadog to fag manga togon fagayo has taw maskin haw ka ha kangayanan igfarigon ista fangayofan, hanggan fatohod hosto ka mangag talinga hyamo. Nyawa kindawan ta fag idwag yod hyamo.

will be added

X\