TITO 1

1Ahos Pablo kagsorat to fag sorat. Aho in Diyos nasali sogowan, hanggan in Kiristo Hisos Fandiya Barita. Is Diyos ka nasogongko kaarakitay ho farigon it manga nafili fag manga taw ta nogsyag hanya. Hogfatwagdog has mangag syag has haboyagan kadwa ha katabowanan, ka fakaoronganan kantam fakatiwalaon. 2Hyabi hyabi, is Diyos nodya kalig intam daga, is Diyos natogon kitay, hanya ha bato disagon haboyagan kitonya, hanggan hanyadwa yadi twag bohag. 3Ginya madi aban, gis nanya fag masohod ka maangay hanya, is Diyos, intam Famawi, nafatwagdog has taw to fag haboyagan. Is Diyos ka nafasognod kitay, fag aho ka bomarita tonya has taw. 4Hogsorat ha hyamo, Tito. Haw bilang wangko anak orongan santam fakatiwalaon pariho. Haw nangos fag domog kitay, is Diyos intam Ama, hanggan is Kiristo Hisos intam Famawi mahoway ha hyamo, hanggan igfalokmay im fangayofan fagaba. 5Itfagonan ho nafagoyan yapdi hyamo sas foyo dagat Kirita, kaarakitay haw fatabo yapdi ka manga bagay kadyan fafiyan. Angko togon hyamo itfagonan kitay, filiyan manga fagtahinan san Diyos manga Tifonan sas fagayo fag manga banwa. 6Kam fagfiliyon fag kawa manga ama ka manga iba taw idwa ha fagoliton hanya, sadi dit babay. It manga anak katiwala yadin Diyos, fiyat manga ogali, magalang has taw. 7Ka gano Tifonan fag kadwa ha fabangdanan maskin kat faganoon kawa han Diyos. Fag kadwa ha takan, idwa maisog, idwa yadig lango, idwag faawangan has taw, idwa madaya has kwarta baliwa. 8Dapat fag kawa mafasakbawon famaklay, ka galwasi has fiya, twag dahan, idwa ha fagihidon taw, matanogon yadi han Diyos, idwag falabit sadili fakasayaon, nyawa kana. 9Hanya fag twagdog fiya fiya ka barita kantam fagsyagon maganit, kitontam fagfaadalon. No kitonya, hanya syagan igfarigon ista manga fangayofan kawag faadal fiya, syagan yadi fabohag has taw kaglaban has fakaoronganan. 10Kati aywan kaglaban has adal orongan. Ista manga hampang kadwa ha kahologan, igdaya ka tiba. Ka fakaaywanan ka kitonya, kawa ka mahogod has ogali Hodyo. 11Ka fiya fag idwag faawang kagfaadal kitonya, maskin tagfaagran kat manga ofod balay, idwa yadi kayag faadal kadwa orongan, kaarakitay lomag kwarta. 12Ka mandi sadik taga Kirita, ka matoltolon kaglwang, Ka manga taga Kirita fagaba wa bohagon, bilang wa hayopan, masamohon, mafang ya ngadi. 13Orongan wat fwayong. Maskin kitonyasta ogali, 14haw fag marigon nogfatohod has taw, kaarakitay ta katiwala yapdi marigon in Diyos, idwa katiwala has manga toltol odi manga Hodyo, hanggan ista manga faadalon ka nadayo ka fakaoronganan. 15Ista fangayofan no fiya, fagayo fag manga bagay fiya has taw, idwa ha fagliyon. Dapat ay, kasta fangayofan nodwa fiya, nodwa yadi katiwala in Diyos, fagayo fag manga bagay fagliyon wan, maskin it fangayofan fagayo has dwat, tadwa twagdog no kana ka dwat orongan. 16Taglwang kitay, Mi kilala yadi wan Diyos, dapat ay, it manga ogali igfabohag it manga hampang. Dwat wa dahol ista ogali, fanway hanggan idwa ha fagibolonon fiya.

will be added

X\