ROMA 8

1Yakangas Diyos idwag fatohoyan has fadosaan ka manga taw kansadi san Kiristo Hisos, 2kawa, tam nonsadi san Kiristo Hisos, ka karigonan gintam boyagan fag fangayofan igfalfas intam gis karigonan ogali dwat, hanggan gis karigonan kahatayan. 3Ka manga Batasan Hodyo idwa nasyagan nafalfas manga taw gis ogali dwat maskin magomo di ka fangayofan taw. Dapat ay, is Diyos nasyagan nafalfas manga taw gis ogali dwat. Hanya nasogot Anak hastay, ha habilogan taw, kitontam ka ha manga ogali dwat, kaarakitay imbali intam fangafiyan. Kawa hanya ha habilogan taw, ka ogali dwat fagayo intohoyan has fadosaan. 4Is Diyos naibolon kitonya kaarakitay ka Batasan Hodyo fasognodon fag ogali imlag santam ka gogali ka maangay sas Falad Maliyaw, kadwa katanog intam bali fangayofan masayaon. 5Ka manga taw no gogali fagabat bali fangayofan masayaon fasognod, igfasakop yapdi hat bali fangayofan masayaon. Dapat ay, ka gogali fagaba ka bago fag fangayofan fasognod, igfasakop has fangayofan bago. 6Tam nogfasakop hantam bali fangayofan masayaon, tam imdiya has kahatayan. Dapat ay, tam nogfasakop has fangayofan bago, imdiya has haboyagan hanggan has kahowayan. 7Maskin, nyawa faktaw, no hadit bali fangayofan masayaon nogfasakop, iglaban in Diyos. Hanyadwa katanog in Diyos togon, idwa yadi somyagan katanog tonya. 8Ka gogali fagabat bali fangayofan masayaon fasognod, idwa syagan kabali in Diyos fagbayaon. 9Dapat ay, ka Maliyaw fag Falad no sawantam orongan, tam idwa gogali has bali fangayofan masayaon baliwa, dapat tam gogali intam bago fag fangayofan fasognod. In Kiristo Falad nodya santam, tam idyan bali in Kiristo sakop. 10Dapat ay, is Kiristo no sawantam basad fangayofan, nyawantam habilogan matay wa aban kawa has ogali dwat, intam fangayofan bago boyagan fagaba kawa tam nangafiyan wa han Diyos. 11Ka nafaboyag ya in Hisos, it Falad no santam, hanya mamaboyag yadintam manga habilogan ka katay. 12Yakanga, angko manga fadwasay, tam ha sagoton. Tam fag idwa gogali kantam bali fangayofan masayaon fasognod. 13Tam no gogali yapdintam bali fangayofan masayaon fasognod, tam katay wan. Dapat, no ka Maliyaw fag Falad kagfasyagan intam igfahatay ka manga ogali dwat, tam kaboyag wan. 14Kawa non Diyos Falad kantam fagtahinan, tam in Diyos wa manga anak. 15Maskin kantam natanggap fangayofan bago idwag fabali intam sogowan ya domwag madalaon. Yatokitay, kantam natanggap in Diyos wa manga anak fangayofan. Yakanga tam igngayan in Diyos kitay, Mama, intam Ama. 16In Diyos Falad hanggan intam sadili fangayofan bago goyonan igfaorongan kitay, tam in Diyos wa manga anak. 17Maskin tam in Diyos wa manga anak, tam omafo yadi aban kan Diyos bato disagon. Tam ha horay yadi hat disag han Kiristo kawa tam nonsadi hanya, gagwanta yadit manga donggon mahori, aban tam imsadi yadi ha hanya, omafo wat kafiyan. 18No sa dingko, ogbot di kantam manga fagdogon mahori kati, tam nogtohod kitay labi man inyak fiya ka kafiyan kantam lagon aban. 19In Diyos manga nahalig fagayo fagayo gwayan wa kasaya lomag aban is Diyos nogfahilala it manga anak. 20Fagayo fag manga bagay kanhalig kabway wan. Is Diyos ka nafabali kitonya, bonwa ka manga bagay kanhalig fasadan. Dapat nyawa kitonya, ha fagfanayaon yapdi, 21maskin fagayo kanhalig imfafiyowan ya, malfas gis sakop kaboyohan, mafalfasan kafiyaon aban, kito yadin Diyos manga anak. 22Tam twa kitay, balis kati, kanhalig sadi wak dahonya, bilang wagdyang sas basad mahori. 23Dapat ay, bondi tonya ka bilang wagdyang, hanggan wa tam ka natanggap in Diyos Falad, it disag gona, tam bilang wagdyang basad fangayofan, kawa tam gwayan wagfanaya is Diyos nogfatohoyan kitay, tam it manga wa anak, tam no mafalfasan orongan. 24To kantam fagfanayaon tam nonbawi. Tam no nalag intam fagfanayaon tanggapon aban, bonwa kitay tam ha fagfanayaon yapdi. Nyawa faktaw, fawag syag yapdi kitay ha tanggapon aban, no malagan wa kati. 25Dapat tam no ha fagfanayaon yapdi, kadyan lag, tam idwa kayayag fanaya. 26Kito in Diyos Falad nogtogbong intam kagomowan, kawa tam idya twag darangin hosto han Diyos, dapat it Falad mandi kagfalo intam igdyang nogsagad gin Diyos, bondi kito kantam no kampang. 27Is Diyos ka twa waglag santam basad fangayofan, tomwa yadi wagdog it Falad fwayong, kawat Falad igfalo igsagad it manga sakop hakorangan, no kinday in Diyos fakasayaon. 28Tam twa wa kitay ka manga galwasi in Diyos, kan Diyos manga nafatawag maskin tonya wat fasadan, it manga madalanan fagayo imaraktoman has kafiyan baliwa. 29Gi yapdis hyabi hyabi, is Diyos danwa kilala ka manga taw kambalit sakop, ginya nafatohoyan kitay tonya fag manga taw fag imbali kito yadi kat Anak, kaarakitay it Anak imbali intam man ahan has fadwasay aywan. 30Is Diyos nafatawag kat manga danwa nafatohoyan ha hanya hyabi. Kan Diyos manga nafatawag, tonya yadi kat nangafiyan wa hanya. Ginya madi, kan Diyos manga nangafiyan, tonya yadi kat manga nafahafod it sadili kafiyan. 31No kitonya mangharaw, kana yapdi kantam bato fwayongon hanya baliwa? Is Diyos nogbaliwa intam, fakta ka lomaban intam, ham gayfan? 32Hanyadwa nahwangit it sadili Anak, dapat nafabali hanya fangafiyan hantam fagayo. No nadisag wat Anak hantam, idwa awkin domisag yadi hantam fagayo fag manga bagay koyogan wa hat Anak, ham gayfan? 33Fakta ka somombong han Diyos it manga nafili naibolon? Is Diyos yadi kaglwang it manga nafili nangafiyan wa hanya. 34Fakta ka fatohoyan intam has fadosaan, ham gayfan? Idwa akwa. Is Kiristo Hisos ka natay hyabi, ka san Diyos balis sihon kati, bondi kitay hanya natay, hanyan boyag ya domwag, kati inbali wa ngap intam fagalan, igfaaronganon han Diyos kawa hantam. 35Fakta ka syagan igfaoman kitay is Kiristo idwa galwasi intam, ham gayfan? Idwa akwa. Nyawa kana kantam madalanan, nyawa kana fag fakabalawon, fakaalibiton, manga taw nogfahoriyan intam maskin tam intiwala, ngatay kalonosan, ngatay kalobasan, ngatay manga fakadalaon, ngatay talibong, nyawa kitonya, is Kiristo idwa kaoman no galwasi intam. 36Kito kansorat, Kawa hami galwasi hyamo, sadi wak sirangan mi kadala wa kitay, mi ngan wa matay. Tagfatimbang hyami kito odis manga topa ista bato fahatayon. 37Dapat ay, tam syagan digdaog fiya fiya, nyawa tam ha lagan to fag manga mahori fagayo, kawas Hisos, ka galwasi intam, kagfasyagan intam. 38Kawa ho twa matohoyanan kitay nyawa kana kantam madalanan, nyawa kahatayan, nyawa haboyagan, nyawa manga anghil, nyawa manga karigonan, nyawa ka kati fag manga bagay, nyawa ka manga bagay kamdasog aban, 39nyawa ka manga kaabwatan, nyawa ka manga kaabasadan, nyawa kana kanhalig, idwa ha syagan igfaoman in Diyos fangayofan no galwasi intam, kantohoyan hantam gin Kiristo Hisos kagfon intam it naagwanta.

will be added

X\