ROMA 7

1Angko manga fadwasay, ham fadi wad natwagdog angko bato fwayongon kawa tam inyayom has manga ogali taw. Intam ogali fawag sakop sadik taw hanya no natay wan. 2Halimbawa, intam ogali iglwang ka sadik ina fag fasakop hat indogan, it indogan no boyagan yapdi. Dapat no kawa kitay it indogan natay wan, yadwag fasakop domwag hanya. 3No kitay di, no tam kaglwang, fabayowan wa dahol, ka ina no gofod has iba ama, it indogan no boyagan yapdi. Dapat, it indogan no natay wan, idwa ha fagbandoon. Nyawa omindogan ya domwag has iba ama, ya bohonwa kitay fabayowan. 4Tam kitonya yadi, angko manga fadwasay. Tam nonsadi san Kiristo habilogan, tam bilang wa natay has Batasan Hodyo. Kati is Kiristo, kanboyag ya domwag kagfon intam, kaarakitay tam bilang wagbohad han Diyos baliwa, tam no gogali ka maangay hanya. 5Hyabi tam nogfasakop yapdi hantam bali fangayofan masayaon, ka manga Batasan igfatohod yapdi intam manga ogali dwat, kagfaoyon intam habilogan has manga ogali kagbohad has kahatayan baliwa. 6Dapat kati tam natay wan has manga ogali dwat kagfasognod intam hyabi, yakanga tam nalfas gis Batasan Hodyo karigonan. Kati ka Maliyaw fag Falad ogali bago kantam fakatanogon, bonwa ka manga batasan masoratan hyabi. 7No kitonya, ham awkin gayfan kitay ka Batasan Hodyo idwa fiya? Balaw kitonya. Nodya ha manga Batasan Hodyo, hodya twagdog no kana fag manga ogali kadwa fiya. Ka Batasan Hodyo nodyag lwang, Fag idwa kaingli, hodyapdi twa no kana ka kaingli. 8Kawa ha togon kitay, Fag idwa kaingli, ka karigonan ogali dwat igfatohod ngap angko kaingli has aywan fag manga bagay. Nodya ha batasan igbando, idya kalwang dwat ka ogali. 9No hyabi ho gayfan angko fangayofan boyagan di, nyawa tadya ha togon angko. Dapat, ho no natwa wan ka manga batasan, ho bago di nadog ka karigonan ogali dwat, ginya ho natwa kitay angko fangayofan natay wan. 10To fag batasan, ka nangos faboyag angko, igfatohoyan di ngap angko has kahatayan. 11Kawa ka karigonan ogali dwat nadaya angko gis manga batasan, ginya madi nafahatay di ngap angko gi yadis manga togon. 12Yakanga ka Batasan Hodyo maliyaw, hanggan ka manga fasognod maliyaw, maslong hanggan fiya. 13No kitonya, ka fiya fag bagay awkin kagtaban angko has kahatayan, ham gayfan? Yatokitay, ka karigonan ogali dwat kagtaban angko has kahatayan hyabi. Ka ogali dwat igsangkap ka fiya, kaarakitay labi man imtohoyan kitay dwat wa dahol ka ogali dwat. Yakanga kawa ka batasan kagfatohoyan ka manga bagay kadwa fiya, labi man intohoyan kitay ka ogali dwat madaya wa dahol dahol. 14Tam twa kitay ka Batasan Hodyo igtogbong ka fangayofan fiya, dapat aho ha bali fangayofan masayaon, aho ka ogali dwat it sogowan. 15Hodwa twagdog angko sadili ogali, maskin hodwa katanog angko fakasayaon fiya, kalabi wa ngap ho no katanog yapdi ka manga bagay kangko fagdayoon. 16Kati aho no gogali ka bonwa angko fakasayaon, hogfaanod kitay ka Batasan Hodyo hyabi fiya ngay. 17Yabay, no kitonya, bonwa aho orongan ka gogali kitonya, ka karigonan ogali dwat kadyapdi galin gingko basad fangayofan, tonya wa ka gogali kitonya. 18Ho twa kitay idwa ha kafiyan sangko sadili fangayofan, kangko faglwangon sangko bali fangayofan masayaon. Nyawa ho gwayan wa kasaya gogali ka fiya, idwa kaanod kitonya. 19Hodwa gogali ka has fiya kangko fakasayaon, dapat ay, ka has dwat ngap hodwag fagomon gogali, nyawa ho dayo wan, no kitay di. 20Aho no katanog ngap ka bohonwa angko fakasayaon, bonwa aho ka orongan gogali kitonya, ka karigonan ogali dwat kadwa galin gingko basad fangayofan kagfasognod has dwat. 21To kangko lagan, aho no kasaya gogali fiya, kadi ngap ka dwat ka gakbang dingko. 22Ho no maayfanan sangko basad fangayofan, ahog baya wan Diyos manga batasan. 23Dapat hogdog tiba ginan sangko fangayofan, ho ha ogali iba. Toy iglaban angko fangayofan it baliw. Kawa kitonya, ka karigonan ogali dwat kagbanwanan yapdi sangko bali fangayofan masayaon, igsakop yapdingko. 24Yabay, yabay, isyay wan no kitonya aho. Faktaw ka bomawi angko gistay fag habilogan kagtaban angko has kahatayan? 25Fadi wan, hogbaya wan han Diyos, kawas Kiristo Hisos, kagfon intam, ka bomawi angko gingko bali fangayofan masayaon. Kawa kitonya, no aho odi, gingko fangayofan bago, ho kasaya katanog in Diyos manga togon, dapat kawa gingko bali fangayofan masayaon, ho kasaya yapdi katanog has karigonan ogali dwat.

will be added

X\