ROMA 5

1Yakanga maskin tam igsyag han Kiristo Hisos, intam Fon, tam nangafiyan wa han Diyos hanggan tam inbalit manga fakilalaon. 2Kawa tam igsyag han Kiristo Hisos, hanyag disag hantam in Diyos malooy fag kahowayan kantam fagbayaon kati. Ginya madi tam igbaya wa dahol maskin tam ha fagsyagon yapdi kitay, aban tam mangofodan yadi wan san Diyos kayawaan. 3Bondi tonya madi ngap kantam fagbayaon. Tam igbaya yadi tam no basad mahori, maskin tam twa kitay ka mahori kagfabali intam maagwantaon. 4Tam no maagwantaon, tam idwa ha fagadowanon. Hanggan tam nodwa ha fagadowanon, tam ha fagsyagon wan. 5Tam nogsyag in Diyos kitonya, tam idwam balaw maskin is Diyos igfatohoyan fiya fiya santam basad fangayofan kitay, hanya galwasi intam. Ka Maliyaw fag Falad kan Diyos disag hantam kagfatohoyan intam kitonya. 6Maskin tam nodya ha fagsyaganon, gis nanya fag masohod kan Diyos nafatalaga, is Kiristo natay kawa has manga taw dwat. 7No tam di, tam imhafang wa matay kaarakitay bomawi sadik taw, nyawa fiyat ogali. Twa man, ngatay ka tibak taw idwam hafang matay kaarakitay bomawi sadik taw mahoway wa dahol dahol. 8Dapat ay, is Diyos nafatohoyan kitay hanya galwasi wa dahol dahol intam, kawa tam no ha ogali yapdi dwat, is Kiristo natay kawa hantam. 9Yabay, kawan Kiristo folot intam fangafiyan han Diyos, labi was Kiristo bomawi intam gin Diyos kaisogan aban, 10kawa hyabi, tam nogdayo yapdi hanya, tam inbalin Diyos wa manga fakilalaon, kawat Anak natay, labi wa matohoyanan kitay, kati, kawas Kiristo boyagan, hanya bomawi intam kawa tam in Diyos wa fakilalaon. 11Bondi kitay kitonya, tam igbaya wa dahol in Diyos, maskin kagfon intam, kawas Kiristo Hisos, nafabali intam in Diyos wa manga fakilalaon. 12Kito it kahologan, bago bago sadi dik taw ka nafabangkad ogali dwat istay is baba daga. It ogali dwat nataban kahatayan. Ginya wa ginan ka kahatayan nasakop fagayo fag manga taw, maskin fagayo ha naogali dwat. 13Nyawa manga taw idya natanggap hyabi ka Batasan Hodyo, ta danwa ha ogali dwat, dapat nodya ha manga batasan, idya ha somogat kitay manga taw igsway ka togon. 14Nyawa kitonya, giyapdin Adan ginan, balin Mwisis, ka manga taw danwan sakop has karigonan kahatayan, nyawasta manga ogali dwat idwa fagayo kito kan Adan, ka nasway fiya fiya sadik batasan. Is Adan hyabi ka nafahalimbawa sadi yak taw fiya ka kabangkad aban. 15Dapat tonya fag dowa idwa pariho, maskin in Diyos disag, kadwa ha bayad, idwa kiton Adan naogali dwat. Nyawa ka kahatayan nalafit has fagayo fag manga taw, maskin is Adan nasway, labi man inyak marigon in Diyos malooy fag kahowayan, hanggan it disag kadwa ha bayad, kawa gi yadi sadik taw, kawas Kiristo Hisos, giwat malooy fag kahowayan, in Diyos disag igdasog has fagayo fag manga taw. 16In Diyos disag idwa kiton Adan nafabangkad kadwatan. Maskin sadik taw nasway sadi ginan, intohoyan wa ka fadosaan, dapat giwan Diyos disag, tam, nyawa ayo intam naogali dwat, intohoyan kitay tam nangafiyan wa han Diyos. 17Orongan wan, kawa ka sadik taw nasway, fagayo insakop wa ngap has kahatayan, dapat labi man inyak marigon in Diyos malooy fag kahowayan disag kitay, tam ka manga nangafiyan hanya, nyawa tam idwa ha nabayad, tam omofod yadi hanya, bomahala aban sas haboyagan, kawas Kiristo Hisos intam fagsyagon. 18Yakanga, no kinday ka sadik taw it nafalamang nafatohoyan fagayo has fadosaan, kitonya yadi, sadik taw it ibolon maslong ka nafatohoyan kitay is Diyos igfaliyam ista manga naogali dwat fagayo, hanggan faboyag fagayo. 19Maskin kawa sadik taw nasway in Diyos, aywan kanbali ha ogali dwat, kitonya yadi, kawa sadik taw intanog in Diyos, aywan kan Diyos nafatohoyan kitay nangafiyan wa ha hanya. 20Ka Batasan Hodyo indisag kaarakitay imlag kawa ka ogali dwat kaaywan. Dapat ay, no kaaywan wa ka ogali dwat, in Diyos malooy fag kahowayan bondi kitonya no kabagat has fiya. 21Maskin ngay, no kinday ka ogali dwat nasakop ka manga taw kawa ha kahatayan, kitonya yadi in Diyos malooy fag kahowayan kagsakop intam kati, kawa ha kahaslongan kagtaban intam has haboyagan, tam nogsyag in Kiristo Hisos kagfon intam.

will be added

X\