1 No kitonya mangharaw, kanat fakinabang tam no manga Hodyo? Kanat fakinabang nontoli, ham gayfan? 2 Aywan fag fakinabang. Bago bago, is Diyos nafabahala has manga Hodyo it manga bato fwayongon. 3 Kinda araw tiba Hodyo nodwan tanog? It kahologan awkin in Diyos hampang idwa ha kahologan maskin ka tiba idwa katanog, ham gayfan? 4 Balaw kitonya. Is Diyos igfaanod wan it fwayong nyawa fagayo fag manga taw bohagon. Kitonya wa kansorat, Kaarakitay ta homilala kitay im manga hampang myasa wa maanod, Nyawa faktaw nogsolay hyamo, hadwam daog. 5 Dapat kinday nangos tonya, ham gayfan, intam manga ogali dwat nogfahilala kitay fakafiyan wan is Diyos nogfadosa? No kitonya, no fangayofan odi taw, tam lomwang ka ogali dwat ha fakinabang ogbot. No kitonya, is Diyos awkin idwa maslong nogfadosa intam, ham gayfan? 6 Yatokitay, bon lamang. Is Diyos nodwa maslong, idwa syagan fatohoyan, ngatay fiya, ngatay dwat, ista manga naogali sadik baba daga. 7 Halimbawa nangos, aho no lomwang kitay maskin aho bohagon, in Diyos kafiyan labi man imlag, kawat fakaoronganan imtohoyan, kana mayon nogfatohoyan angko has fadosaan kawa ha ogali dwat, ham gayfan? 8 Kana ara tam nodwag maswag kitay, Tam fag gogali dwat no fiya kamlag ginya? Ka mangag fadwat igdog angko iglwang hono, kitonya angko fwayong. Fakafiyan wan tonya fag manga taw nomtohoyan has fadosaan. 9 Kinda ara tonya? Tam manga Hodyo fiya man aw has manga Hintil, ham gayfan? Idwan. Maskin ho nafatohoyan kitay tam fagayo fagayo, nyawa Hodyo, nyawa Girigo, tam insakop has karigonan ogali dwat. 10 Kito kansorat, Idwa ha akwa maslong it ogali, ngadi sadik taw. 11 Idwa ha twagdog, idwa hagsayak in Diyos. 12 Fagayo fag manga taw igtalang gin Diyos, fagayo igfalamang wan. Idwa ha gogali fiya, ngadi sadik taw. 13 Ista manga bibig bilang wagtaban manga taw has kahatayan. Podo wa madaya ista manga dila hampang. Ista manga anit bibig hampang bilang wa ha dalit kitos abyanon. 14 Sonson wa sabayon ista manga hampang, madwat wa ngap igdog. 15 Ista manga bitis igdali hasaglibon taw. 16 Nyawa hadak nalahaw igfahoriyan hanggan igfarongkot manga taw. 17 Tadwag lag ka kahowayan fag dalan ogali, 18 tadwa yadin yayom katanog in Diyos. 19 Yabay tam twa kitay ka manga Batasan Hodyo fagayo intoon has mangag fasakop tonya fag manga Togon, kaarakitay nyawa faktaw idwa ha fabangdanan aban, is Diyos no mamatohoyan has taw it fadosaan, 20 maskin is Diyos idwag fatohoyan kitay, tam mangafiyan wa hanya, kawa tam no katanog ka Batasan Hodyo, kawa ka manga Batasan Hodyo igfatwagdog intam kitay, tam ha ogali dwat. 21 Dapat kati, in Diyos halimbawan, kadwan ganit sas manga Batasan, kagfalag no kinday tam mangafiyan wa hanya. Ka Batasan Hodyo, hanggan in Diyos manga fangampang igfaorongan yadit halimbawan, 22 kagfatohoyan kitay, tam fagayo kantiwala, nyawa Hodyo, nyawa Hintil, tam fagayo mangafiyan wa han Diyos tam nogsyag lamang han Kiristo Hisos, 23 maskin fagayo fag manga taw ha naogali dwat, idwag sohod in Diyos kafiyan. 24 Kawa malooy in Diyos kahowayan, it disag hantam kitay, tam mangafiyan wa hanya kawas Kiristo Hisos igfalfas intam. 25 Is Hisos kan Diyos nafatalaga fangafiyan kaarakitay it folot nomwatwat, hanggan tam nogsyag hanya, intam manga naogali dwat imliyam wan. Maskin hyabi is Diyos idya kasadi ginan in-isog, gagwanta yapdista manga ogali dwat, yakanga hanya nafatalaga fangafiyan kaarakitay it sadili kahaslongan imlag. 26 Kati yadi tam fag ha fangafiyan han Diyos kaarakitay faorongan kitay, is Diyos maslong hanggan hanya kagfatohoyan kitay, fagayo kagsyag in Hisos mangafiyan wa hanya. 27 Kati tam awkin syagan igfadaholon intam sadili, ham gayfan? Idwan. Kana mayon? Maskin ka lamang tam nogsyag han Kiristo, is Diyos nogfatohoyan kitay tam mangafiyan wa hanya, bonwa kitay kawantam ogali no fiya. 28 Maskin katwa wa kadog fiya fiya is Diyos igfatohoyan kitay tam mangafiyan wa hanya, bonwa kitay kawa tam katanog ka manga Batasan Hodyo, dapat kawa tam nogsyag lamang han Kiristo. 29 Ham awkin gayfan is Diyos nogbahala, ha odis manga Hodyo? Idwa awkin igbahala yadi has manga Hintil? Yatokitay, hanya kagbahala has fagayo fag manga layonan taw. 30 Is Diyos idwam dowa, nyawa Hodyo, nyawa Hintil, is Diyos igfatohoyan kitay tam mangafiyan wa hanya kawa tam nogsyag han Kiristo. 31 No kitonya, ham awkin gayfan tam nogsyag han Kiristo, tam igfabali ka Batasan Hodyo idwa ha kahologan? Idwan. Yatokitay, kati tam ngap igfarigon ka Batasan Hodyo.
