ROMA 2

1Yakanga, haw awkin ka kabaya ka tiba, ha gayfan? Ongay, hadwa ha faglwangon, nyawa faktaw, maskin haw no gogali kito yadi kam fakabayaon, haw igfatohoyan yadim sadili has fadosaan. 2Tam twa kitay fakafiyan wan is Diyos nogfatohoyan has fadosaan, ka manga taw ka gogali kitonya. 3Haw no gogali kito yadi kam fakabayaon, ha awkin gayfan is Diyos idwa fatohoyan hyamo has fadosaan? 4Ngatay ha gayfan kitay ogbot di fag bagay kawas Diyos mahoway wa dahol, maagwantaon, idya dagos kaisog? Ha awkin idwa twa kitay is Diyos mahoway wa dahol ha hyamo maskin igfanaya yapdi kitay, haw nangos fag somoyo wan, fag fabago im fangayofan? 5Dapat im fangayofan maganit, no hadisagsoyo baliwa, yakanga hagfabagat wagfahabyat is Diyos nogfadosa hyamo sas katabowanan fag Sirang mahalga. Gis nanya fag Sirang in Diyos kaisogan hanggan it kahaslongan imlag wan hanya nogfadosa has manga taw. 6Maskin hanya ka gomanti has fagayo fagayo fag manga taw, no kinday ista manga naogali. 7Is Diyos domisag haboyagan idwa ha katabowanan has manga taw ka fadagos gogali has fiya, maskin ta kasaya ka fakafiyan, ka maangay, hanggan ka haboyagan kadwa ha katabowanan. 8Dapat ay, is Diyos omisog marigon ka manga taw ka fagabag daraogan, dayo katanog ka fakaoronganan, katanog odi ka manga dwat fagaba. 9Fagayo kagfadagos gogali has dwat lomag mahori, maalibitan wan, bago bago manga Hodyo, ginya hanggan manga Hintil. 10Dapat ay, is Diyos domisag it kafiyan, kangayanan, hanggan kahowayan has fagayo kagfadagos gogali has fiya, bago bago has manga Hodyo, ginya hanggan has manga Hintil, 11maskin is Diyos idwa ha fagihidon taw. 12Ka manga Hintil idyapdi nadog ka Batasan Hodyo, yakanga ta no gogali dwat, hawas kadwatan, nyawa bonwa ka Batasan Hodyo kagfatohoyan. Dapat, ka manga Hodyo ha akwa ka manga Batasan Hodyo, yakanga ta no gogali dwat, ka Batasan ka mamatohoyan has taw it fadosaan. 13Maskin is Diyos iglwang ka manga taw kagtalinga hanggan katanog ka Batasan Hodyo ka nangafiyan hanya, bohondi kitay, ka mangag talinga odi. 14Ka manga Hintil no danwa gogali has fiya, ka maangay sas Batasan Hodyo, nyawadyan sakop sinya, inlag wa kitay ha akwa yadit sadili batasan. 15It manga ogali no fiya kitonya igfatohoyan kitay ka Batasan Hodyo fakasayaon bilang wansorat sasta basad fangayofan. Gista sadili isip kagfatohoyan yadi tonya, maskin it sadili fangayofan ha fagtagahon nomtoon, nomtoon kabaya, nomtoon igbaliwat sadili naogali. 16Yakanga, angko fagfwayongon Fiya fag Barita iglwang kitay, tonyam anod wan sas Mahalga fag Sirang aban, is Diyos nogfatohoyan ngatay fiya, ngatay dwat ista manga fangayofan, is Kiristo Hisos nogfatohoyan yadi fagayo fag manga taw it manga fagayfanon kadyag fadogon has tiba taw. 17Dapat haw noglwang kitay, Aho Hodyo wan, hanggan igsyag kitay haw fiya di, kawa haw nadog ka Batasan Hodyo, igfadaholon yadi kitay haw in Diyos wa nafili, 18haw natwa wan in Diyos fakasayaon, ha kilala wan ka fiya fag manga ogali maskin ka Batasan Hodyo kagfwayong. 19Sama, ya hono haw noglwang, haw wa ka gamit ka bilang bota, haw kagfayawa has manga taw basad marom, 20no kadog di, haw ka kabaya man ka mangag falamang, haw kagfaadal has manga idya twagdog fiya fiya, maskin haw ha botang ka Batasan Hodyo, haw gayfan haw twa wa fagayo, hanggan im fwayong sonson wa orongan. 21Haw igfaadal has manga iba, dapat ay, haw awkin igfaadal yadim sadili? Haw igfaadal kitay fag idwag nahaw, dapat haw awkin ignahaw yapdi? 22Haw iglwang has taw fag idwag fabayowan, dapat haw awkin igfabayowan yadi? Anod, haw kadwat iglag manga tolad faglohodon, dapat haw awkin ignahaw lamang ginya fag manga fanimbaan? 23Haw igfadaholon hyamo kitay, haw igfasakop has Batasan Hodyo, dapat haw awkin igfadwat igdog in Diyos maskin hadwa katanog ka Batasan Hodyo? 24Anod wan, insorat kitay, Maskin tam manga Hodyo idya fiya intam manga ogali, yakanga ka manga Hintil igyod in Diyos. 25No kadi kitay haw intoli wan, ha fakinabang wan haw no katanog ka Batasan Hodyo. Dapat, idwa ha kahologan haw nontoli, haw nogfalamang ka Batasan. 26Sadik Hintil it ogali no maangay sas Batasan Hodyo, nyawa hanya idyan toli, is Diyos noglag, hanya bondi kito kantoli ik fiya. 27Yatokitay, ka mangadwan toli fatohoyan man hayo, ka mangan toli has habilogan, fatohoyan hayo has fadosaan, maskin ka mangadwan toli katanog ka Batasan Hodyo, dapat ham ka ha akwa ka Batasan Hodyo insorat wan, ham di ngap kagsway tonya. 28Ham bonwa orongan manga Hodyo, nos Diyos kaglag, ka odi kitay in-ngayan Hodyo maskin hayo manga magorang manga Hodyo, hanggan ham intoli odi sas habilogan. 29Dapat ay, kanbago it fangayofan ka orongan wa Hodyo nos Diyos kaglag. Ka mahalga san Diyos, ka manga taw ka ha tandaan sas fangayofan, bonwa ka tandaan toli sas habilogan, ka Batasan Hodyo fagfwayongon. Is Diyos, bonwa manga taw, kagfasayagdog has taw ka ha tandaan sas fangayofan.

will be added

X\