ROMA 16

1Hogfaano ha hayo in Fibi, intam fadwasay ina kagtogbong in Diyos Tifonan sas banwa Kinkiriya itfagonan. 2Ham tanggapan wa hanya kito ka fiya has manga kapariho intiwala. Nyawa kana ka korang sa hanya, togbongan, maskin aywan yadit natogbong, hanggan wa aho kat sadi. 3Fag fwayong handa Pirisila da Akila kitay ho gwas hanya. Tonya kangko manga ofod, in Kiristo Hisos yadi manga fangibolon. 4Ta natogbong angko, nyawa ta natwa kitay, ngandayo hanya wa kasta fagfahatayon. Yakanga bondi aho kagbaya hanya, hanggan intam Fon manga Tifonan fagayo sas manga banwanan Hintil igbaya yadi wan. 5Fag fadog yadi han Diyos Tifonan kagtifonan sat balay, kitay ho gwas yadi was taw. Ham fadogan yadi hangko fakilalaon fiya fiya, is Ipinito, ka gonan tiwala han Kiristo sas sakop Asya, kitay, ho gwas hanya. 6Ho gwas yadin Mariya kadwag fagomon gibolon sinyas nyamo hayo. 7Ho gwas yadi inda Andoroniko, da Honya, manga kapariho Hodyo, ka naofod angko sas porisowan. Tonya gona man angko intiwala, manga Fandiya-Barita ya ngadi. 8Ho gwas yadin Ampiliyato, angko yadi fakilalaon fiya fiya, kawa minsadi santam Fon. 9Ho gwas yadin Orbano, intam ofod, in Kiristo fangibolon, hanggan is Istagwis angko fakilalaon fiya fiya. 10Kitonya yadi ho gwas in Apilis. Inlag wa kitay hanya katiwala orongan hantam Fon, nyawa ha lagan mahori. Ho gwas yadin Aristobolo talanahan, 11hanggan in Hirodiyon, kapariho Hodyo, hanggan ka mangan sadi hantam Fon, san Narsiso balay. 12Ho gwas yadi inda Tirifina da Tirifosa, intam Fon manga fangibolon. Kitonya yadi ho gwas in Pirisida angko fakilalaon fiya fiya. Hanya mahogod no gibolon intam Fon ibolon. 13Ho gwas yadi in Rofo intam Fon fangibolon marigon, hanggan wat ina, ka bilang yadi wangko ina. 14Ho gwas yadi inda Asinkirito da Filigonti da Hirmis da Patrobas da Hirmas, hanggan intam manga fadwasay tiba, ista manga ofod. 15Ho gwas yadi inda Filologo da Holya da Niriyo, hanggan wat fadwasay ina. Kitonya yadi ho gwas in Olimpas, hanggan intam manga fadwasay fagayo ka gofod is taw. 16Tam nogladlagan, tam fag badbayaan ha sadi ha sadi. In Kiristo manga Tifonan fagayo gwas yadi hayo. 17Angko manga fadwasay hogfaaronganon ha hayo kitay, ham fag matagahan fiya fiya ka mangag faagran hayo, mangag faadowan hayo, bilang odig fadayo hayo gi hayo naadal Barita. Ham fag idwag talinga ista fwayong. 18Ka kitonya fag manga taw idwa gibolon in Kiristo kagfon intam it ibolon. Ista fagtogbongon ista sadili odi bali fangayofan masayaon. Ista hampang no kadog di, bilang wa fakyason, dapat ista toltol igfatalang odi gintam Fon ka mangadya ha fakatwawon. 19Ho kasolong wagdog kitay indog wa fiya fiya nyawa siday, kawa ham igfadagos katiwala han Kiristo. Dapat angko fakasayaon, no hadis manga fiya, ham fag myasa wa madonong, dapat no kadi has manga dwat, ham fag idwa ha fakatwawon. 20Ginya madi, idwa dogay aban, is Diyos, kagfon kahowayan, romogrog wan Satanas sa hayo daga bitis. Ham nangos fag domog kitay is Hisos kagfon intam mahoway ha hayo fagaba. 21Is Timotiyo angko ofod fangibolon, hanggan da Losyo da Hason da Sosipatro, angko yadi manga kapariho Hodyo, gwas hayo. 22Ahos Tirsiyo kagfalo igsorat to fag sorat, ho gwas yadi hayo santam Fon ngayan. 23Is Gayo kangko fandogayan gwas yadi hayo. Sat balay in Diyos Tifonan nogtifonan. Is Ilasto yadi, kagbahala has kwarta sas banwa, hanggan intam fadwasay is Kwarto, gwas yadi hayo. 24(Ham nangos fag domog kitay is Kiristo Hisos intam Fon fagaba mahoway ha hayo fagayo. Fag kitonya wa ngay.) 25Fag fasayagdog in Diyos, ka syagan igfarigon intam manga fangayofan, kito kangko natoltol ha hayo Fiya fag Barita, kawa han Kiristo Hisos. To fag Fiya fag Barita sadik bagay madolaw, dogay gis hyabi hyabi bilang matagowan yapdi, dapat kati inlag wa fiya fiya. 26Hanggan indog wa gin Diyos manga fangampang ka nasorat, indog sas fagayo fag manga layonan taw, sadik baba daga, maskin is Diyos, kadwa ha katabowanan, kagfasognod kitay, fag imdog wan kaarakitay manga taw imtiwala hanggan imtanog yadi hanya. 27Kawas Kiristo Hisos intam wa Fangafiyan hanggan Fagalan, tam fag fasayagdog in Diyos fagaba, ka sadi di ka madonong. Fag kitonya wa ngay.

will be added

X\