ROMA 15

1Tam ka manga marigon intiwala, fag togbong ka manga malombay kaarakitay tamrigon. Fag bonwantam sadili fakasayaon lamang intam fagayfanon. 2Yatokitay, tam fag fasolong ngap igdog intam iba has fiya baliwa, kaarakitay tamrigon no katiwala. 3Kawas Kiristo idwan tanog it sadili fakasayaon kito kansorat, Ta nogyod hyamo, aho kasta fagyodon. 4Fagayo kansorat sas Kasoratan hyabi insorat kaarakitay tam tomwa wagdog kitay, tam no omagwanta wan, hanggan intam manga fangayofan nomrigon gis Kasoratan, ginya madi tam ha fagsyagon orongan. 5Is Diyos kagfasyagan intam gagwanta hanggan kagfarigon intam, hanya fabali nangos intam manga fangayofan sadi di, kawa tam igtolad in Kiristo Hisos, 6kaarakitay tam fagayo gofodan, bilang sadi dik bibig kagfasayagdog in Diyos, kan Kiristo Hisos, intam Fon, it Ama. 7No kindas Kiristo natanggap intam, tam fag kitonya yadi igtanggap ha sadi ha sadi, kaarakitay in Diyos kafiyan imlag. 8Hogfwayong ha hayo kitay is Kiristo inbali sogowan Hodyo kaarakitay igfatohoyan kawas Diyos igfaanod it manga togon hasta manga hafofowan hyabi. 9Hanggan manga Hintil mamasayagdog yadin Diyos, kawas Diyos kaawa was taw, kito ka Kasoratan fwayong kitay, Yakanga ho mamasayagdog hyamo sas manga Hintil fagdogan. Ho mangambahan bomaya hyamo ngayan. 10Nalwang ya domwag, Ham manga Hintil ham fag gofodan han Diyos nafili fag layonan taw, fag baya yadin Diyos. 11Ginya nafwayong ya domwag, Ham manga Hintil fagayo fag fasayagdog intam Fon. Fagayo fag manga layonan taw fag fasayagdog hanya. 12Is Isayas nadogang yat hampang kitay, In Hisi hasokfonan imdasog aban. Hanya ka bomahala has manga Hintil. Hanyam bali ka manga Hintil fagsyagon. 13Is Diyos kagfasyag intam, fabali nangos intam fangayofan kasolong wa dahol hanya, hanggan fahoway yadintam, tam no katiwala hanya, kaarakitay ka Maliyaw fag Falad karigonan fahogodan intam igsyag in Diyos. 14Angko manga fadwasay, hogbaya wa hayo kitay, ham kafiyaon, hosto wa hayo kadonongan, ham twa yadi wagfatohod ha sadi ha sadi. 15Nyawa kitonya, hodwa kayag fatohod ha hayo marigon ka tiba bagay kangko nasorat istay fag sorat. Ho nasorat kito kawas Diyos nadisag hangko it malooy fag kahowayan, 16kaarakitay hombali in Kiristo Hisos fangibolon has manga Hintil. Ho bilang sadik fagalan-han-Diyos aho nogtoltol has taw ka Fiya fag Barita gin Diyos, kaarakitay ka manga Hintil imbali sadik disag, ka Maliyaw fag Falad fagfalayonon han Diyos, maangay hanya. 17Yakanga, kawa ahon sadi san Kiristo Hisos, fiya di aho nogfasayagdog angko naibolon, 18maskin kangko faglwangon, aho nogtoltol has manga Hintil, hanggan gibolon, ka orongan is Kiristo ka gibolon, kaarakitay manga Hintil imtanog yadi hanya. 19Ka lamang angko fagwason, ka Maliyaw fag Falad karigonan kanlag sas manga falagon hanggan ibolon madolaw. Yakanga ho nafahaskat ka Fiya fag Barita kawa han Kiristo has fagayo fag manga banwanan gi yapdis banwa Hirosalim hanggan balis sakop Iliriko. 20Dandi angko fakasayaon gis bago, kangko fagbaritaon fag kayapdidya nadog kawa han Kiristo, kaarakitay kangko fagbaritaon fag manga taw bohonwa ka danwagdog gis iba taw. 21Kito ka Kasoratan fwayong, Kadya ha nagdogan barita kawa ha hanya, homilala wa hanya, Ka mangadya nadog hyabi, tomwa yadi domog aban. 22Kawa honlibang yapdig barita fagaba, maskin ngay ahodya nadagos has nyamo hayo. 23Dapat kati hontabo wagbarita istay fag manga banwanan taw. Gi yapdis hyabi ho danwa kasaya manabang hayo, 24yakanga hogsyag wa kitay ho manabang hayo, aho no domalan aban, ho no hawas layonan daga Ispanya. Ginya madi ho kasaya kitay, aho no domogay ogbot is nyamo hayo aban, ham nangos tomogbong angko, fadagos angko lahawan has Ispanya. 25Dapat kati aho hayapdis Hirosalim, ha diya togbong han Diyos Tifonan sinya. 26Maskin gis manga Tifonan sas sakop Masidonya hanggan sakop Akaya, ta nadisag togbong hantam manga fadwasay myabog sas Hirosalim. 27Tagbaya wagdisag, talaga wa kitay ta kasaya omibolon kitonya. No kitay di, ta ha sagoton tomogbong has taw, maskin ka manga Hodyo igfahoray yadi has manga Hintil it manga fagbayaon has fangayofan baliwa, yakanga fiya yadi ka manga Hintil no tomogbong has manga Hodyo git manga fagbayaon malagan. 28Nomtabo wan, aho no nadisag wan ka togbong kasta nafadiya has manga fadwasay sas Hirosalim, homginan wan, ho domalan las nyamo hayo sas banwa Roma, bago di has layonan daga Ispanya. 29Ho twa wa kitay, aho nomdasog is nyamo hayo, aywan intam donggon gin Kiristo, hasagbaya baliwa. 30Angko manga fadwasay, maskin tam pariho igsyag in Kiristo Hisos intam Fon, hanggan gadgalwasiyan, kawa tam insadi sat Falad, hogsagad kitay ham fag togbong igdarangin han Diyos kawa hangko kitay, 31aho no hawas Hirosalim, ka mangadya katiwala hasagfon intam sas sakop Hodiya, ta fag idwa nangos omiktan angko. Hanggan fag darangin kitay intam manga fadwasay sas banwa Hirosalim, fag nangos bomaya yadi angko diya togbong has taw. 32Ginya madi, non Diyos wa kafangayofanan, ho bomaya wan ho nombangkad has nyamo hayo, hanggan angko fangayofan imhoway ya sa hayo akbang. 33Is Diyos kagfon kahowayan fag sawa hayo fagayo. Fag kitonya wa ngay.

will be added

X\