ROMA 13

1Tam fagayo fag fasakop has gobirno, maskin idwa ha gobirno ka bonwan Diyos nafaangay. Ka manga gobirno kati is Diyos ka nafabahala. 2Yakanga, kaglaban has gobirno, iglaban in Diyos nafabahala hantam a, igfatohoyan yadit sadili has fadosa. 3Kagbahala sas gobirno bonwa fakadalaon, no fiya intam ogali, dapat fakadalaon ngay tam no gibolon dwat. Tam awkin kasaya kitay tam fag idwa kadala kagbahala sas gobirno? No kitonya, fag fiya intam ogali, ginya madi kagbahala mamasaya wagdog intam. 4Kagbahala sas gobirno in Diyos wa sogowan kaarakitay tomogbong wantam. Dapat tam fag kadala hanya, tam no gibolon dwat, maskin hanya bahala wagfadosa ka gibolon dwat. Kagbahala sas gobirno in Diyos wa sogowan kaarakitay igfadosa ka gibolon dwat. 5Yakanga tam fag dan wagfasakop has gobirno, bondi kitay maskin tam kadala in Diyos, hanya nogfadosa maisog, tam fag fasakop kaarakitay tam idwa ha fagtagahon santam fangayofan. 6Kitonya yadi, tam fag bayad bohis maskin ka mangag bahala, gibolon in Diyos ibolon ta nogfatonglos it manga ibolonon. 7No fagbayadon wa fiya fiya, tam fag bayad wan, nyawa has fangaboyagon hanggan has daga. Tam fag magalang yadi has taw ka fiya wa faggalangon. 8Tam fag idwa ha bayadon nyawa haday no bohonwa kitay tam fag galwasi ha sadi ha sadi, ka bilang wantam fagsagoton yapdi. Ka galwasi iba taw, tonya wa ka katanog ka Batasan Hodyo. 9Ka manga togon fagayo, kitos Haw fag idwag fabayowan, fag idwag fahatay taw, fag idwag nahaw, fag idwa kaingli, hanggan fagayo fag manga togon ka kitonya, imsakop sa sadi dik fwayong kitay, Fag galwasi intam kapariho kito mandintam sadili. 10Ka galwasi iba taw idwa gogali dwat has iba taw, yakanga katanog ka Batasan Hodyo sadik dahonya. 11Tam fag imtanog wa tonya maskin tam twa wan no ginahin fag manga kasohodan kati, tam fag kafolaw wan. Kati ka Famawi kaakbang wa dahol dahol, kabagat wa kaakbang, bondi kito ka hyabi tam no bago digsyag hanya. 12Ka yabi kasagaya wa kati, kaakbang wa ka balabagan. Tam fag dayo wa marigon ka manga dwat fag ogali, ka basad marom. Tam fag dan wagsangkap ka manga sangkap yawa, manga fanlaban has dwat. 13Tam fag gogali ka maangay kitos manga taw basad sirang. Tam fag idwa kalibang kalango, ngatay has manga dwat fag kasolongan, tam fag idwag fabayowan. Tam fag dayo ka manga bagay has hayan baliwa, manga gidgisogan, manga kaid-ingliyan. 14Fag is Kiristo Hisos, kagfon intam, kantam bilang fagsolongon kitos fanaktak has ogali dwat. Fag idwag talinga intam bali fangayofan masayaon kaarakitay tam idwam diya hat manga fakasayaon dwat.

will be added

X\