ROMA 12

1Yakanga manga fadwasay, maskin in Diyos kaawaan hantam idwa twa haminon, hogfaaronganon ha hayo kitay, tam fag disag ngap intam sadili han Diyos, sadik disag boyagan, intohoyan hanya hanggan maangay. No kitonya, tam orongan wagfasayagdog in Diyos. 2Tam fag idwag tolad kastay is baba daga fag manga ogali taw. Dapat fag is Diyos ka faoman intam ogali nogfabago intam manga fangayofan, kaarakitay tam tomwa no kana kan Diyos kafangayofanan, no kana ka fiya, ka maangay hanya, hanggan hosto wa orongan. 3Maskin in Diyos malooy fag kahowayan indisag hangko, hogfwayong ha hayo fagayo kitay, tam fag idwa gisip santam basad fangayofan kitay tam kafiyaon. Yatokitay, fag fakafiyan wan tam no gisip intam fagsyaganon no kinday is Diyos nogtogbong intam igsyag hanya. 4Santam manga habilogan aywan fag manga layonan, dapat fagayo it manga ibolonon bokod bokod. 5Kitonya yadi, nyawa tam aywan kantiwala, no kitay di, dapat tam inbali sadik habilogan, insadi san Kiristo, insarokfonan ha sadi ha sadi. 6Maskin malooy in Diyos kahowayan hantam, hanya nadisag hantam intam manga fakatwawon, bokod bokod, yakanga tam fag faanod gibolon tonya. Not disag hantam fakatwawon igtoltol in Diyos hampang, no kinday tam nogsyag hanya, tam fag toltol wan. 7Not disag hantam kitay tam matogbongon, tam fag togbong has taw. Tam no natanggap ka fagsyaganon igfaadal, tam fag faadal wan. 8Not disag hantam fagsyaganon igfarigon ista manga fangayofan, tam fag farigon wa ngay. Tam nogdisag fag idwa kwangit. Kagbahala in Diyos sakop, fag gano wa fiya fiya. No ka maawaon, fag kasolong kaawa is taw. 9Fag orongan tam no galwasi manga taw. Tam fag dayo marigon ka manga dwat. Fag matawidan marigon ka manga fiya. 10Fag kitos manga fadwasay tam no gadgalwasiyan. Fag idwag fasalagwa hantam manga iba, yatokitay fag fasayagdog ha sadi ha sadi. 11Tam fag idwa kaoman no galwasi intam Fon, fag mahogod gibolon it ibolon. 12Tam fag kasolong fagaba kawa tam ha fagfanayaon. Ta nogfahoriyan intam maskin tam intiwala, tam fag gagwanta wan. Fag darangin fagaba. 13Intam manga fadwasay no ha manga kakorangan, tam fag togbong has taw. Tam fag mafasakbawon manga famaklay. 14Fag darangin kitay kagfahoriyan intam lomag fiya. Fag idwag sabayon tonya fag manga taw. 15Tam fag tarogbongan igbaya, nyawa bonwantam sadili fagbayaon. Tam fag tarogbongan yadi karongkot, iba taw no ha mahori. 16Tam fag kasadi intam manga fangayofan. Tam fag idwag fadaholon intam sadili, fag idwa kafang gofod has manga taw kadya ha kangayanan. Tam fag idwa gayfan kitay tam madonong man has iba taw. 17Fag idwag ganti ka dwat has dwat. Tam fag gogali ka maangay sasta faglagan fagayo. 18No baliday intam fagsyaganon, tam fag gofodan mahoway has fagayo. 19Angko manga fakilalaon, tam fag idwag ganti dwat. Tam fabayaanan wa han Diyos kagfadosa ka mangag fahoriyan intam, maskin insorat sas Kasoratan kitay, Intam Fon iglwang, aho wa ka bahalag ganti, hanggan aho gomanti wan. 20Yatokitay, hyamo wa kalaban no kalonos, ha fahwanan ya, no kainom, ha fainoman wan. Ginya madi hanya maya wan. 21Tam fag idwa gadaogan ka dwat, yatokitay fag ka fiya fag ogali kagdaog ka dwat.

will be added

X\