ROMA 1

1Ahos Pablo, in Kiristo Hisos nasali sogowan. Hanya nafatawag angko kaarakitay ahom bali it Fandiya-Barita, nafabokod yadingko hastay fag ibolon. 2Hyabi yapdi is Diyos nafasorat hat manga fangampang it Fiya fag Barita sas manga Kasoratan maliyaw. 3To fag Fiya fag Barita kawa hat Anak, is Kiristo Hisos, kagfon intam. No has habilogan taw baliwa, hanya gin Dabid hasokfonan, 4dapat ay, no hat Falad kahalyawan baliwa, intohoyan kitay hanyan Diyos wa Anak, ka ha akwa it sadili karigonan, maskin inboyag ya gis kahatayan. 5Gi mandin Hisos hami natanggap in Diyos disag fiya kitay, maskin mi galwasi in Hisos, hami fag imbali it manga Fandiya-Barita, kaarakitay igtaban manga taw gis fagayo fag manga layonan daga, hasagsyag in Hisos hanggan katanog hanya. 6Ham manga taga Roma, ham in-aktom yadi wa sinya, maskin ham yadi kan Diyos manga nafatawag. 7Maskin ngay hogsorat ha hayo fagayo sas banwa Roma, kan Diyos manga fagalwasiyon, kat nafatawag kaarakitay ham imtohoyan ha hanya. Ham nangos fag domog kitay, is Diyos, intam Ama, hanggan is Kiristo Hisos, kagfon intam, mahoway ha hayo fagaba, hanggan igfalokmay hayo manga fangayofan. 8Bago bago, hogbaya han Diyos gin Kiristo Hisos, kawa indog wa fiya fiya sadik dahonya baba daga kitay ham katiwala in Hisos. 9Ho gibolon in Diyos ibolon aho nogfaadal mahogod ka Fiya fag Barita kawa hat Anak, yakanga hanya twag faorongan kitay, aho fagaba wagdarangin kawa ha hayo. 10Aho fagaba wagsagad kitay, aho nangos fag lomag halimbawan kaarakitay somabang has nyamo hayo, is Diyos nogfaangay di. 11Ho gwayan wa kasaya lomag hayo, kaarakitay ho fahoray ha hayo manga disag has fangayofan baliwa, ka mamarigon ya domwag hayo manga fangayofan. 12Ka orongan angko bato fwayongon, ho kasayag sabang hayo, kaarakitay tam igtarogbongan igfaridrigonan ha sadi ha sadi, kawa tam pariho igsyag han Diyos. 13Manga fadwasay, hogfadog ha hayo, aho fagaba wagfatalaga, aho kalahaw wa nangos has nyamo hayo, no kitay di, dapat idwa katonglos. Ho kasaya yapdig fatiwala nangos han Kiristo tiba is nyamo hayo, kito kangko nafatiwala manga Hintil sas tiba banwanan. 14Aho ha sagoton mamaadal has fagayo, nyawa ka sas banwa, nyawa ka sas manga moyod, nyawa has manga naadal, nyawa has manga idya ha nagadalan. 15Maskin kitonya, ho kasaya wa dahol mamaadal ka Fiya fag Barita is nyamo hayo sas banwa Roma. 16Hodwa kayag fadog has taw ka Fiya fag Barita, maskin tonyan Diyos wa kadonongan kagbawi fagayo fagayo ka mangag syag hanya, bago bago manga Hodyo, ginya madi hanggan wa manga Hintil. 17Ka Fiya fag Baritag lwang is Diyos igfatohoyan kitay, tam manga taw nangafiyan wa han Diyos tam nogsyag hanya. Sinyat fabagowanan, sinya yadi wa kat nakatabowanan, tam nogsyag hanya. Kito kansorat, Ka mangag syag in Diyos nangafiyan wa hanya, hanggan fagaba boyagan. 18Kawas Diyos igfadog git banwanan sam tongod kitay, hanya kaisog is taw kawag sagaya wa ogali ta nogsway hanya, yakanga tagtaktak ka fakaoronganan. 19Is Diyos kaisog has taw maskin ka han Diyos baliwa, malpos tohodon, twa wa kadog, kawas Diyos igfatohoyan has taw. 20Gi yapdis kalig daga, manga taw noglag in Diyos manga nahalig, katwa wagdog no kinday is Diyos, kadwa malagan, kakitay kalag kan Diyos kadonongan kadwa ha katabowanan, hanggan katwa wagdog kitay hanya ka Diyos orongan. Yakanga manga taw idwa ha fabangdanan. 21Nyawa ta twa kitay ha akwa wa Diyos, tadwag galang hanya, idwa yadig baya hanya kito ka maangay. Yatokitay, ta gisip di ngap kadwa ha kahologan. Ista manga fangayofan kaidagdog odi, inharom wan. 22Tagfaniring kitay ta madonong wan, dapat ay, inlag kitay manga taw paong paong odi, maskin 23tagdayo di ngap in Diyos kafiyan, ka Diyos kadwa katay, hadi ngap is manga tolad ta nogsyag, manga tolad odi taw ka katay, manga tolad manok, manga tolad hayopan, manga tolad odi ka manga gilafang, ta nogsyag. 24Yakangas Diyos igfabayaan was taw hasta ogali has kahayan baliwa, manga ogali dwat ha sadi ha sadi has habilogan. 25Maskin tadwa kasayagdog no hadin Diyos, nyawa hanya ka orongan, kasaya di ngap igdog has mangadwa orongan. Kasta faglohodon, hanggan fakatanogon ka odi manga bagay kanhalig, bonwa ka Nahalig fagayo. Nangos fag ka Nahalig kantam fagbayaon, hanggan wa aban aban. Fag kitonya wa ngay. 26Yakangas Diyos igfabayaan wan ka manga taw has mahaya wa dahol fag manga ogali has taw baliwa. Manga ina kafang igdoyog has ama, igdoyog di ngap has kapariho ina. 27Kitonya yadi ka manga ama kafang igdoyog has ina, kapariho ama it fakasayaon fagdoyogon. Gibolon mahaya has kapariho ama. Yakangas Diyos igfadosa hosto sat manga sadili, ka gibolon kitonya fag dwat. 28Maskin ta dayo igtohod ka fakaoronganan han Diyos baliwa, is Diyos igfabayaan wan ista manga fangayofan has manga sitam sitam, yakanga manga taw gogali kadwa fiya. 29Ista manga ogali sonson wa dwat, gisip odi ka dwat, masayaon ya ngadi, kasayag fahoriyan has taw. Maingliyon ya, iglibon taw, igdaraogan ya, madayaon ya, mafadahiton ya. 30Igfadwat igdog has taw, kaisog in Diyos. Idwag galang has manga taw, ha takan ya, mafasalagwaon ya, igsayak ya domwag has kadwatan, fanway hat magorang. 31Manga idagdog wa dahol dahol, idwag fatonglos it manga togon. Idwa mahoway has tiba taw, idwa twa kaawa. 32Is Diyos fadi wadagfadala wagdog is taw kitay, ka gogali kitonya, fag matay wan, dapat tagfadagos di ngap gogali kitonya fag dwat. Hanggan bondi kitay kitonya, tagbaya di ngap iglag tiba taw no gogali yadi kitonya.

will be added

X\