NAFALAG 9

1Ginya madi ka falima fag anghil nafaoni it bodyong. Ginya ho nalag sadik fanggasan kandagdag gin Diyos banwanan sam tongod has baba daga. Ha nadisag hanya ka sosi has ohang kadwa ha saragan. 2Ka fanggasan naboklas ka ohang, ginya ha anos dahol dahol, dahos nagfagbaan anglit ayo ayo, inbangkad ginyas basad ohang, nalanbong wa myanit hanggan wa baba daga, marom wan. 3Ginya madi aywan fag manga fan inbangkad gis basad anos, nanarowayan has baba daga. Ha nadisag has manga fan kitay, fag somyagan homagat ka manga taw, myasa wa masagit, kito was inonay no kagat. 4Ha natogon has manga fan kitay, hawag dwat ka manga lamnon, hanggan manga fon hayo, nyawa kana fag tanom. It bato hagaton ka manga taw lamang kadwa ha akwa in Diyos tanda sat boknga angas. 5Idwa ha nafaangay kitay ka manga fan fag fahatay tonya fag manga taw, fahoriyan odi balis limak magdanon. Ka fan nogfahoriyan is taw bilang wa ha korit kito was inonay no kagat. 6No kandogay day ka fan no kagat yapdis taw aban, ka manga taw kasaya wa matay nangos, dapat tadwa yadi katay. 7No kalag di ka manga fan kito was manga habayo ta nogfatalaga has awayan, ha bilang manga sangbaw ginto, hanggan it manga walong bilang yadi wa walong taw. 8It manga bok bilang wa bok ina, it manga ngifon kito was ngifon liyon. 9Ka manga fan bilang wa ha fanaktak baol sat manga boknga dobdob. Kat manga fakfak nograbog, kito was manga habayo no ha goyod kalisa no hawas awayan, kadkalingan wan. 10Ha sogod sas dayo habot, kitos inonay. Ka gis basad ihog ka syagan igfasagit manga taw limak magdanon. 11Ka anghil gorangon fan ka gano ka ohang daga kadwa ha saragan. It ngayan, sas fangampangan Hibriyo, kawas Abadon, no sas fangampangan Girigo, is Apolyon, it kahologan, kawas Fandwat. 12Ka gona fag madala kanboyaw nafwayong intolas wan, dowa ya ka kadasog. 13Ginya ka faonom fag anghil nafaoni it bodyong, hanggan ho ha donggon ya sadik hasnog gis basad ofat fag solok sas ginto fag fanonogan ka san Diyos atobangan. 14Ka hasnog nafwayong has faonom fag anghil ka ha bodyong, Falfasan ka ofat ik anghil ka magafosan sas gobang safa dahol, ka safa Ifratis. 15Yakanga nafalfas ngay ka ofat ik anghil ka danwa nafatalaga hat bato ibolonon, kaarakitay homamin wa fahatay ka fatolo fag layonan gis manga taw, sadi wak dahonya baba daga, gis nanya fag oras, gis nanya fag sirang, magdanon hanggan fangaraw. 16Ta nafwayong angko kitay ka manga sondalo masahayan baba habayo, 200,000,000 it kaaywanan. 17Ho nalag ka manga habayo hanggan ka masahayan sinya, ta ha manga fanaktak sat boknga dobdob, it kadararagan bilang wa afoy, it kalatoyan bilang wa bato sapiro, it kaboragawan kitos asopri. Ka alfoyo habayo bilang wa alfoyo liyon. Ha afoy ya, ha anos ya, ha asopri ya, kabangkad git manga basad bibig. 18Tonya tolok kahoriyan ka nafahatay ka fatolo fag layonan gis fagayo fag manga taw sadik baba daga, gis afoy, gis anos hanggan gis asopri kanbangkad gis basad manga bibig habayo. 19Maskin ka karigonan manga habayo sawat manga bibig, hanggan giwat manga ihog. It manga ihog ha alfoyo kito was abyanon, kagfasagit has manga taw. 20Ka mangan sawad yapdi istay is baba daga, ka mangadwa natay ginya fag kahoriyan, idwa yadi nasoyo. Tadwa nadayot manga sadili gamat nahalig fag manga fagsyagon, igfasayagdog yapdi has manga labang, manga tolad ginto, manga tolad pilak, tanso, bato, ngatay hayo. 21Tadwa yadi nasoyo it manga ogali dwat, kitos iglibon taw, igsyag has iba fag kadonongan, mangag fabayowan, mangag nahaw.

will be added

X\