1 Ginya madi ka Anak Topa no nagisi ka fafito fag faganitan, manga sadik tama sinyahod idwa ha naawang ngadi kana san Diyos banwanan sam tongod. 2 Ginya madi ho nalag ha nafahafod ha sadi ha sadi has fitok anghil, ka malindogan san Diyos atobangan, myasa sadik bodyong. 3 Ginya sadi yak anghil ka ha bitbit finggan mangkok ginto, it sohadan kamangyan, nalindog sas bilog fanogbaan. Ha nadisag kaaywanon fag kamangyan hanya fag anghil kaarakitay fasoglat in Diyos manga nafili it manga darangin, nogsonog sas baba ginto fag fanonogan, sas fagonan tokawan fanokawan gorangon. 4 Ka anos kamangyan masoglatan in Diyos manga nafili it manga darangin, nasongaw gi basad finggan mangkok san anghil gamat, nasongaw han Diyos akbang. 5 Ginya madi yabay, ka anghil nabol manga baga gis fanonogan, nafahapno basad finggan mangkok a, ginya naokas has boknga daga. Dagos wa nadalogdog, manbang wan, nahilat ya, nalinog ya. 6 Ginya madi ka fitok anghil dan wa matalagaan faoni it manga bodyong. 7 Ka gona fag anghil no nafaoni it bodyong, dagos nahwayan has baba daga, yilo hanggan afoy, ha soglat ya ngadi folot. Kat fatolo fag layonan daga insonog, kat fatolo fag layonan manga fon hayo, hanggan fagayo fag lamnon latoy sadik baba daga insonog wan. 8 Ka fadowa fag anghil nafaoni it bodyong, ginya ka bilang sadik dahol fag moyod gigang in-okas ha basad dagat. Kat fatolo fag layonan dagat inbali wa folot. 9 Kat fatolo fag layonan manga boyagan basad dagat natay wan, hanggan kat fatolo fag layonan sahayan baba dagat indwat lamang. 10 Ka fatolo fag anghil nafaoni it bodyong, ginya sadik dahol fag fanggasan gigang, kito was fatay iyanay, indagdag has fatolo fag layonan manga safa hanggan manga bolbogan danom. 11 Ta nafangayan tonya fag fanggasan is Lamnon Mayat. Kat fatolo fag layonan danom safa hanggan bolbogan inbali mayat, hanggan kaaywanon fag manga taw natay wan no nainom, kawa mayat wan. 12 Ka faofat fag anghil nafaoni it bodyong, ginya ka fatolo fag layonan myanit, ka fatolo fag layonan magdanon, hanggan fatolo fag layonan fanggasan in-iktan wan, yakanga ka myanit it fatolo fag layonan, hanggan ka fatolo fag layonan magdanon, hanggan fatolo fag layonan manga fanggasan inharom wan. No sirang idwa hagyawa sas fatolo fag layonan, hanggan no yabi kitonya yadi, idwa ha nayawa sas fatolo fag layonan. 13 Ginya madi ho nalag sadik boyaw iglayog sam tongod, sas daga banwa. Ho nadog yadi no goni, igtawag marigon, iglwang, Isyay, isyay wan, kat sawad tolok anghil no faoni dit bodyong, madala wa dahol dahol kasta lagon fagayo istay is baba daga.
