NAFALAG 7

1Ginya madi ho nalag ofat ik anghil malindogan bali bali ofat ik fongfongan daga igtaktak yapdi ka ofat ik bagyo, fag idya bomagyo has baba daga, nyawa has baba dagat nyawa has manga fon hayo. 2Ginya ho nalag sadi yak anghil gindahod gis salogan myanit baliwa, ha diya in Diyos boyagan it fantanda. Natawag marigon has ofat ik anghil kan Diyos nagtogonan ka bahala igfabagyo, hanggan aywan kat bato fadwaton hastay has baba daga hanggan baba dagat, iglwang, 3No baliday hami idya nafatanda in Diyos manga fangibolon sat boknga angas, ham fag idyag fabagyo marigon has baba daga hanggan has baba dagat, hanggan has manga fon hayo. 4Ginya ho nadog no kayoday kat natandaan, gamtanan 144,000 gis fagayo fag manga layonan in Israil manga hasokfonan. 5san Hoda hasokfonan 12,000 san Robin hasokfonan 12,000 san Gad hasokfonan 12,000 6san Asir hasokfonan 12,000 san Niptali hasokfonan 12,000 san Manasis hasokfonan 12,000 7san Simyon hasokfonan 12,000 san Libi hasokfonan 12,000 san Isakar hasokfonan 12,000 8san Sabolon hasokfonan 12,000 san Hosi hasokfonan 12,000 san Binhamin hasokfonan 12,000 9Ginya madi ho nabantay ya, kangko lagan kaaywanon kaaywanon fag manga taw, hadwa mamin bomilang, nyaa faktaw. To fag manga taw giwas fagayo fag manga dahol fag layonan banwanan taw, hanggan gis fagayo fag manga layonan ogbot, manga banwanan hanggan manga sanglitan sinya. Ta malindogan sas fagonan tokawan fanokawan gorangon hanggan sas atobangan Anak Topa. Fagayo ha solong rotay abohay, ha bitbit yadi manga labong bilang manga labong tagisi. 10Tagsohodan igtarawagan marigon, iglwang, Intam Diyos, ka matokawan is nwa fag tokawan, hanggan ka Anak Topa kagbawi intam. 11Ginya madi, fagayo fag manga anghil naligong malindogan tonya fag tokawan, naligong has manga fagtahinan, hanggan has ofat kanhalig boyagan, nanlibabaan sas fagonan tokawan hanggan nafasayagdog in Diyos. 12Nalwang, Fadi wa ngay, fag kitonya wan. Intam Diyos ka maangay bomaya, hawa hanya ka kafiyan, kadonongan, fasalamat, kangayanan, karigonan hanggan fagsyaganon hanggan aban aban. Fag kitonya wa ngay. 13Ginya madi sadik fagtahinan naintaw angko kitay, Fakta fag manga taw tonya, hanggan ginday ka ha manga solong rotay abohay, ha gayfan? 14Ginya hoglwang, Twa man, hodwa twa. Haw wa ngap ka twa. Ginya hanya nafwayong angko, To ka mangadwa nafagomon nyawa ta nafahoriyan wa dahol dahol has taw. Ta nafabali fiya hanggan nafaabohay it manga rotay sas Anak Topa folot. 15Yakanga ta sawan Diyos fagonan tokawan fanokawan gorangon, gibolon it ibolon yabi sirang, sat Fanimbaan Dahol. Hanggan ka matokawan sinya fag tokawan ka somakop has taw. 16Tadwam lonos domwag, idwa yadim inom, idwa yadim alhagan afali basad myanit. 17Maskin ka Anak Topa ka sas baba tokawan fanokawan gorangon ka omano is taw, kito wa ka fangano topa. Tomaban manga taw has manga bolbogan danom kagfaboyag has manga taw. Is Diyos wa ka fomyad ka manga lowa fagayo gista manga mata.

will be added

X\