NAFALAG 6

1Ginya ho nalag kitay ka Anak Topa nagisi ka bago bago fag faganitan gis fitok faganitan sas famasaan. Ginya madi ho nadog ka sadi kanhalig boyagan no nahampang dahowas hasnog dalogdog, nalwang, Ha fag hastay wan. 2Aho no nabantay, ho nalag sadik habayo abohay, hanggan ka masahayan sinya ha diya famana. Ha nadisag hanya sangbaw. Ginya hanyan lahaw wan kaarakitay domaog it kalaban. 3Ginya ka Anak Topa no nagisi ya kat fadowa fag faganitan, ho nadog ka fadowa fag inhalig boyagan iglwang, Ha fag hastay wan. 4Ginya sadi yak habayo, dararag, kanbangkad. Ha nafaangay ka masahayan sinya kitay, hanya kagbahala igfabago awayan istay is baba daga, kaarakitay manga taw igfahadhatayan ha sadi ha sadi. Ha nadisag hanya sadik talibong aba. 5Ka Anak Topa no nagisi ya kat fatolo fag faganitan, ho nadog ka fatolo fag inhalig boyagan noglwang, Ha fag hastay wan. Kangko lagan sadi yak habayo, masding. Ka masahayan sinya ha bitbit timbangan. 6Ginya madi ho nadog bilang wa ha nahasnog gis fagbokngan ofat kanhalig boyagan, iglwang, Sadik dinariyo it sali sadi lamang ik sarok tirigo, dapat tolok sarok sibada sadik dinariyo. Dapat ha fag idwag fadwat ka langis gis bohad olibo hanggan ka alak. 7Ka Anak Topa no nagisi ya ka faofat fag faganitan, ho nadog ka faofat fag inhalig boyagan iglwang, Ha fag hastay wan. 8Ho nalag sadik habayo kaabohay wat anit, kawa kagomo. Ka masahayan sinya is Kahatayan it ngayan, hanggan is Daga Salad sa odit dayo habot. Ha nadisag hanyas dowak masahayan kitay, ta fag bahalag fahatay it faofat fag layonan gis fagayo fag manga taw sadik baba daga. Tiba ta nabasing talibong no natay, tiban lonos, tiban sagit fanalafod, tiba kawa manga hayopan maisog nahagat. 9Ka Anak Topa no nagisi ka falima fag faganitan, ho nalag kasta manga nafahatay kawa ta galwasi in Diyos barita, hanggan tadwag fagomon igfaorongan kawa han Diyos. Ho nalag it manga falad sasta daga fanogbaan. 10Tagrokyaw dahol, igsyag in Diyos kitay, Haw kagfon hyami, haw ka maliyaw hanggan orongan, mayaya wagfanaya. Ginahin kin haw no fatohoyan has fadosaan hanggan gomanti has taw sas baba daga ka nafahatay hyami? 11Ha nadisag rotay abohay has fagayo kasta manga nafahatay. Ha nafwayong yadi has taw kitay ta fag mafahowayan yapdi ogbot. Kagfon intam bago di fadosa tonya nodwa hamaktom domwag gista manga fadwasay, hanggan gista manga ofod fangibolon ka kito yadis taw no matay aban. 12Ginya madi ho nabantay hanggan ho nalag kitay ka Anak Topa no nagisi ka faonom fag faganitan, nalinog marigon. Ka myanit inbali wa masding kito was rotay magwang magwang. Ka magdanon bilang wa folot dararag. 13Ka manga fanggasan indagdag gis banwa kitos manga bohad igos no karabak nogbagyo marigon. 14Ka banwa sam tongod inliyam wan kitos kasoratan no kalohot madali hanggan ka manga moyod hanggan manga foyo dagat nalin git fagoliyanan. 15Ginya fagayo fag manga taw, ka manga gorangon istay is baba daga, hanggan ka manga ha kangayanan, kasta manga tahinan, hanggan ka manga maakwa, ka manga ha kadonongan, fagayo fagayo, nyawasta nasali sogowan, nyawa bohonwan, fagayo igtago wan sayo basad lohib, sayo faktaban manga bato sas moyod. 16Tagtawag yadi has manga moyod, taglwang, Ham tabonan wa hyami kaarakitay ka matokawan sas tokawan fanokawan gorangon idwa lomag hyami, hanggan ka Anak Topa idwa omisog hyami. 17Maskin kati, ka madala fag Sirang fadosaan indasog wan. Faktaw wa kamtolas no kitonya wan, ham gayfan?

will be added

X\