NAFALAG 5

1Ginya madi ho nalag kitay ka matokawan sas tokawan fanokawan gorangon ha bitbit, sat balis sihon fag gamat, ka sadik famasaan malohotan. Baliw baliw labong ha sorat, hanggan ha faganitan fitok tatak sas boknga lohotan sorat. 2Ho nalag sadik marigon fag anghil kampang marigon has taw, iglwang, Fakta ka fiya gomisi ka manga faganitan hanggan bomoskad ka famasaan malohotan? 3Dapat, nyawa san Diyos banwanan sam tongod, nyawa sas baba daga, nyawa ka sas daga daga, basad daga, tadwa ha lagan fiya bomoskad ka famasaan hanggan bomantay no kana kat sorat sinya. 4Honyaya wa goraw maskin idwa ha lagan fiya bomoskad hanggan bomantay ka famasaan. 5Yakanga gis dowak safolo ha ofat ik fagtahinan, ka sadi nalwang hangko, Ha fag idwa goraw. Fanlag ngay, bantayan ka Liyon gin Hoda hasokfonan, in Dabid yadi hasokfonan, hanya wa ka nadaog has kadwatan, yakanga fiya di no gomisi ka fitok faganitan hanggan bomoskad ka malohotan fag famasaan. 6Ginya madi Anak Topa kangko lagan, malindogan sas fagbokngan manga fagtahinan hanggan sas fagbokngan ofat kanhalig boyagan, sawasta boknga boknga, sas tokawan fanokawan gorangon. Ka Anak Topa ha manga nagbaranan, yakanga twa wa kalag kitay tonya fag Anak Topa kasta nafahatay. Ka Anak Topa ha mata fito, ha songay fito. Ka fitok mata kan Diyos fitok Falad kat nasogo hastay sas baba daga sadik dahonya. 7Ka Anak Topa naakbang ka matokawan sas tokawan fanokawan gorangon a, kat sihon fag gamat nabol ka malohotan fag famasaan. 8Ginya madi ka Anak Topa no nabol tonya fag famasaan, ka ofat kanhalig boyagan, hanggan ka dowak safolo ha ofat ik fagtahinan, nanlibabaan sat atobangan. Kafod wa diya alpa, bilang gitara, ha bitbit yadi finggan mangkok ginto, napno wa kamangyan, it anos banglo. To fag anos banglo kawa manga darangin manga taw kantohoyan han Diyos. 9To kat ambahan bago kasta fagambahanon, Haw lamang ka fiya bomol ka malohotan fag famasaan Hanggan gomisi ka manga faganitan sinya, Kawa haw kasta nafahatay, hanggan im kahatayan Ka natobos manga taw gis fagayo fag layonan daga, gis fagayo fag sanglitan taw, gis fagayo fag hasokfonan, hanggan gis fagayo fag dahol fag layonan banwanan, ha akwa wan kam natobos, kaarakitay imtohoyan han Diyos. 10To fag manga taw kam natobos, ha nafabali intam hari it sakop manga fagalan, kaarakitay omibolon intam Diyos ibolon. Ta abam bali yadi manga gorangon istay is baba daga. 11Ginya ho nabantay ya domwag hanggan ho nadog manga hasnog anghil kaaywanan wa kaaywanan wan, hadwa mamin bomilang manga anghil sas kaaywanan. Ka manga anghil maligongan ka tokawan fanokawan gorangon, hanggan ka ofat kanhalig boyagan, hanggan ka dowak safolo ha ofat ik fagtahinan. 12Kiti ta no gambahan, dahol yadi ta no kasnog, Ka Anak Topa, kasta nafahatay, Hanya wa ka fiya tomanggap kadonongan, kaakwaan, fakatwawon, Fagsyaganon, kangayanan hanggan kafiyan. Tam fag fasolong igdog hanya. 13Ginya madi ho nadog yadi fagayo ka mangan halig san Diyos banwanan sam tongod, hanggan sas baba daga, hanggan ka sam daga, sas basad daga, hanggan ka basad dagat, fagayo fagayo ka mangan halig sadi wak kayonya, igsohodan garambahanan, iglwang kitay, Ka matokawan sas tokawan fanokawan gorangon, hanggan ka Anak Topa kaghari fagaba, Hanya ka ha kangayanan hanggan kafiyan. Tam fag fasayagdog hanya hanggan aban aban. 14Ka ofat kanhalig boyagan nasagot, Fadi wa ngay, fag kitonya wan. Hanggan ka manga fagtahinan nanlibabaan, nafasayagdog yadi han Diyos.

will be added

X\