NAFALAG 3

1Ha soratan han Diyos Tifonan sas banwa Sardis, hat anghil kitay, Ka ha akwa in Diyos fitok falad, hanggan fitok fanggasan, kaglwang kitay, Ho fadi wadtwa hyamo manga ogali. No kalag di haw boyagan di, dapat ka orongan haw mahatayan wan. 2Ha fakafolaw wan, farigonan ka manga bagay fiya kansawad yapdi ha hyamo, kaarakitay ka fiya fag manga bagay idwa fagayo imliyam. Ho natwa wagdog kitay, sangko Diyos faglagan, hadwa nafatonglos im manga ibolonon. 3Haw fag idwag liyam kam natanggap hyamo donggon manga adal. Fag katanog wa tonya, fag soyo wa a, fag dayo im manga dwat fag ogali. Ha no bilang didwa kafolaw, ho has nyamo wan, ho bilang di kitos fangnahaw, hodwa tomogon no ginahin fag masohod aho no kadasog. 4Nyawa kitonya, ha akwa yapdi sayok is nyamo sas Sardis kadwa nafaowing it manga rotay, yakanga ta omofod angko ha manga solong rotay abohay, maskin ta maangay wan. 5Kadwag fagomon igdaog ka kadwatan somolong yadi ka kitonya fag rotay abohay, ahodwa bomol it ngayan gis listahan manga taw ka ha haboyagan. Ho fahilala yadi wa hanya sangko Ama atobangan hanggan hat manga anghil. 6Ham no ha manga talinga ya ngadi, fag talinga wan ka Maliyaw fag Falad fwayong han Diyos manga Tifonan. 7Ha soratan han Diyos Tifonan sas banwa Filadilfiya, hat anghil kitay, Ka Maliyaw hanggan ka fiya fag fandaliyan hanggan ka mabitbitan yadi in Dabid sosi, kaglwang kitay hanya no naboklas, idwa ha twagtahop, hanya no natahop, idwa ha twag boklas. 8Ho fadi wadtwa im manga ogali, ho twa kitay hadwa bangan madonong, dapat haw katanog angko togon, hadwag tangkod angko, hadwag dayo. Yakanga ho naboklas ka sik sakbawan sa hyamo fagonan, idwa ha syagan tomahop to, nyawa faktaw. 9Fandog ngay, ho fabangkad ha hyamo in Satanas sakop manga bohagon, kagfaniring odi kitay manga Hodyo, ho falingkohodan lamang tonya fag manga taw sa hyamo atobangan kaarakitay ta tomwa waglag kitay ho galwasi hyamo. 10Maskin haw intanog angko togon kitay fag idwag fagomon, gis nanya fag masohod aban, ka kahoriyan kagsolay fagayo fag manga taw sadik baba daga nomdasog, ho omano wa fiya fiya hyamo. 11Ho ngalay dimbangkad is nyamo. Ha anowan fiya fiya ka hyamo wa fagbotangon kaarakitay idwa ha homagaw hyamo sangbaw, nyawa faktaw. 12Ho fabali kagdaog has kadwatan bilang sadik torok sangko Diyos Fanimbaan-Dahol, hanya idwa yadi malin ginya, hanggan aban aban. Ho somorat angko Diyos ngayan sa hanya, hanggan angko Diyos it banwa ngayan, ka bago fag Hirosalim, ka domokson gingko Diyos banwanan sam tongod. Ho somorat yadi sa hanya angko ngayan bago. 13Ham no ha manga talinga ya ngadi, fag talinga wan ka Maliyaw fag Falad fwayong han Diyos manga Tifonan. 14Ha soratan han Diyos Tifonan sas banwa Lawdisiya, hat anghil kitay, It ngayan is Fadi wa ngay, fag kitonya wan, ka maanod hanggan fiya nogfaorongan, hanya kagfabago in Diyos nahalig fagayo, kaglwang kitay, 15Ho fadi wadtwa im manga ogali, ho twa kitay hadwa matamis, hadwa yadi matabang. Fiya man nangos haw no matamis, ngatay matabang. 16Maskin haw bilang mataka wagdog, bohonwa yadi matamis, bohonwa yadi matabang, ho somofa di hyamo. 17Haglwang, ha maakwa wan, hosto wan fagayo fagayo fag kaakwaan. Yatokitay, hadwa ngap twa kitay haw marongkot, haw maawa waglag, myabog wa dahol haw, bota hanggan malobasan odi. 18Gwadi ka fiya, ha saliyan gingko ginto kanlayon fiya fiya kaarakitay hambali maakwa orongan, manga yadi rotay abohay kaarakitay hadwa kaya kitay hadwa ha solong, manga famolong has mata kaarakitay im mata imfoga ya. Fagayo saliyan gingko. 19Ho gato hanggan gadal fiya fiya fagayo kangko fagalwasiyon. Yakanga ha fag kabagat wa has fiya, fag soyo wan, hanggan fag dayo im ogali dwat. 20Fandog ngay, ho malindogan sas dayo sakbawan, hogsagam wan, nyawa faktaw no domog angko hasnog, ginya fasakbaw angko, ho somakbaw wa hat fangayofan a, mi mangilhodan wan, hyami sagaba sadi wan, mi manayowan fagaba. 21No kinday aho nadaog has kadwatan hanggan matokawan kati, sangko Ama akbang, sat tokawan fanokawan gorangon, kitonya yadi kagdaog has kadwatan, ho fatokaw yadi hanya sangko akbang, sangko tokawan fanokawan gorangon. 22Ham no ha manga talinga ya ngadi, ham fag talinga wan ka Maliyaw fag Falad fwayong han Diyos manga Tifonan.

will be added

X\