NAFALAG 22

1Ginya madi ka anghil nafalag angko sadik safa kagdisag haboyagan. Tonya fag danom maliyaw kito was matikyas, igbolbogan gin Diyos hanggan ka Anak Topa tokawan fanokawan gorangon. 2Ginya madi igbolos has boknga manga karsada sinya basad banwa. Bali bali safa ha fon hayo kagdisag haboyagan. Magdanon di magdanon di igbohad wan. It manga labong igfiya yadi sagit sas manga dahol fag layonan daga. 3Hadwa ha lagon sinya nyawa kana kan Diyos nafatohoyan has kadwatan. Dapat ay, kam lagon sinya aban in Diyos hanggan ka Anak Topa tokawan fanokawan gorangon hanggan it manga fangibolon mamasayagdog hanya. 4In Diyos manga fangibolon lomag wa aba in Diyos mata, in Diyos ngayan imsorat yadi wa aba sasta manga boknga angas. 5Idwa ha yabi domwag, tadwa ha fakasayaon manga salong, manga yawa gis myanit, maskin kawas Diyos kagfon intam imbali wasta yawa hanggan tambali ha kangayanan igbahala hanggan has aban aban. 6Ginya madi ka anghil nalwang hangko, To fag manga hampang fiya wa fagsyagon, orongan yadi wan. Is Diyos kagfon intam ka nafaisip it manga fangampang, hanya yadi ka nasogo it anghil kaarakitay fadog hat manga fangibolon ka manga bagay ka kaakbang wamlag aban. 7Is Hisos iglwang, Ham fag danwa matalingan, ho kaakbang wa kadasog. Kagfaanod ka manga nagona wa nafwayong istay fag famasaan bomaya wan. 8Ahos Hwan ka nadog hanggan nalag to fag manga bagay fagayo. Aho, nonsagaya wagtalinga hanggan igbantay has fagayo, ho nanlibabaan san anghil akbang, ka nafalag angko to fag manga bagay kaarakitay mamasayagdog hanya. 9Dapat ay, ka anghil nalwang, Balaw kitonya, ahot sogowan di kito yadi hyamo, kito yadi wam manga fadwasay fangampang hanggan kito yadis fagayo kagfaanod ka manga hampang kansorat istay fag famasaan. Fag is Diyos ka hyamo fagfasayaon igdog. 10Ka anghil nafwayong yadingko, Haw fag idwag fyalom kansorat istay fag famasaan kamlag aban, maskin to fag manga bagay kaakbang wamtonglos. 11Ka dwat igfadagos has dwat, ka has hayan igfadagos has hayan. Dapat ay ka has fiya igfadagos wa has fiya, hanggan ka maliyaw it fangayofan igfadagos wa maliyaw yapdi. 12Is Hisos iglwang kitay, Ham fag danwa matalingan, ho kaakbang wa kadasog. Ho danwa ha diya manga fasalamat, ho fahafod wa domisag ha sadi ha sadi kawasta naogali. 13Ahos Alfa hanggan is Omiga. Aho ka nagona hanggan kamgoyan. Aho ka fabagowanan hanggan ka katabowanan. 14Ka mangag falinay it manga rotay bomaya wan maskin is Diyos igfaangay kitay ta fag somakbaw has nwa basad banwa, homwan yadi ka bohad hayo kagdisag haboyagan. 15Dapat ay, imgoyan di sas dayo banwa ka manga taw it ogali bilang odi ido, ka manga ha fagsyagon gis iba kadonongan, mangag fabayowan, ka mangag libon taw, ka mangag lohod has manga tolad, ka manga bohagon it manga hampang hanggan ogali. 16Ahos Hisos ka nasogo angko anghil kaarakitay fadog to fag manga bagay ha hayo, ka sawas manga Tifonan. Aho gin Dabid hasokfonan. Aho ka faramnag dayo kayawa. 17In Diyos Maliyaw fag Falad hanggan ka ina ka kaakbang kaindogan iglwang, Fag hastay wan. Fagayo kagtalinga tonya fag manga hampang iglwang yadi, Ham fag hastay wan. Nyawa faktaw ka kainom, ham fag danwa gakbang, ka kasaya wan, fag danwag bol ka danom kagdisag haboyagan, todwa ha fagbayadon. 18Ahos Hwan kagfatagak has manga taw kitay, nyawa faktaw kagtalinga kansorat istay fag famasaan, ka manga bagay kamlag aban, dapat igfalabi kat nafwayong istay fag famasaan, nogtoltol is taw, is Diyos domogang yadi hanya ka manga kahoriyan has taw kansorat istay. 19Kitonya yadi, nyawa faktaw nogbohin nyawa kana fag bagay kansorat istay, manga bagay kamlag aban, is Diyos bomol yadit ngayan gis listahan ka manga fiya homwan ka bohad hayo kagdisag haboyagan, hanggan bomohin it ngayan gis listahan ka maangay somakbaw has banwanan kanbokod han Diyos kanowas istay fag famasaan. 20Kagfaorongan to fag manga bagay fagayo iglwang, Matohoyanan ho kaakbang wa kadasog. Fadi wan, fag kitonya wa ngay, Hisos, kagfon hyami, fag imdasog wa ngay hastay. 21Ham nangos fag domog kitay is Kiristo Hisos kagfon intam mahoway ha hayo fagayo. Fag kitonya wa ngay.

will be added

X\