NAFALAG 21

1Ginya madi ho nalag ka bago fag banwa sam tongod, hanggan ka bago fag daga. Ka gona fag banwa hanggan daga inliyam wan. Ka dagat fayadi wa ha akwa. 2Ho nalag yadi ka banwa kantohoyan han Diyos wa malayon, kawa bago fag Hirosalim, kadokson gis banwa sam tongod, giwan Diyos, kitos sadik ina kaginan wa hat fangsawan, nandayagan wan, kawa managbo wan kat fakasayaon ama ka bomabay hanya. 3Ho ha donggon sadik hasnog marigon gis tokawan fanokawan gorangon, nalwang, Kati in Diyos oliyanan sawas manga taw fagbokngan. Is Diyos bomanwanan sasta akbang, gofodan yadi was taw, tambali in Diyos wa sakop fag manga taw, hanyam bali wasta Diyos. 4Is Diyos fomyad ista manga lowa fagayo. Idwa ha kahatayan domwag, yakanga idwa karongkot ista fangayofan. Idwa ha fagorawon, idwa yadi kasagit, kawa ka manga bagay gona inliyam wan. 5Ginya madi ka matokawan sas baba tokawan fanokawan gorangon nalwang kitay, Kati ahog fabago ya fagayo fag manga bagay. Nafwayong ya domwag angko, Ha fag sorat to fag manga hampang maskin fiya wa fagsyagon, orongan yadi wan. 6Nafwayong yadingko, Kati in-anod wa fagayo. Ahos Alfa hanggan ahos Omiga, aho ka fabagowanan hanggan ka katabowanan. Nyawa faktaw ka kainom, ho domisag danom kadwa ha bayad, gis bolbogan kagdisag haboyagan. 7Kagdaog has kadwatan, tonya wat tanggapon, hanggan ahom bali wat Diyos, hanyam bali yadi wangko anak. 8Dapat ay, isyay wan, mahori wa dahol ista lagon aban ka manga madalaon wa dahol dahol, ka mangadwa katiwala, ka manga fagaba has sitam sitam it ogali, ka mangag libon taw, ka mangag fabayowan, ka ha fagsyagon gis iba kadonongan, kagsimba has manga tolad, hanggan fagayo ka manga bohagon. Tonya fag manga taw fagayo hawas linaw asopri, igang digrabog wan. Tonya wa kat fadowa fag kahatayan. 9Kat fafito fag anghil ka ha bitbit yadi sadik finggan mangkok, kawat fafito fag kahoriyan has manga taw, naakbang hangko, nalwang, Ha fag hastay, ho falag hyamo ka ina ka omindogan has Anak Topa. 10Ka Maliyaw fag Falad naboklas angko fangayofan, ginya sadik anghil nataban angko ha sadik baba moyod abwat abwat, nafalag angko ka banwa Hirosalim, ka banwa kanbokod han Diyos, kadokson gis banwa sam tongod, giwan Diyos. 11In Diyos kafiyan fagayo sinya wan. Masilaw wan kitos bato haspi, kitos manga matikyas maliyaw wa dahol. 12It alad madamol a, abwat. It sakbawan safolo ha dowa, talafod sakbawan ha bantay anghil. In Israil manga hasokfonan safolo ha dowa it manga ngayan insorat sas boknga manga tahop sakbawan. 13Tolo ka balis salogan myanit, myasa wa tolo baliw baliw balitangan, tolo yadi balis sangdayan myanit. 14Ka alad ha safolo ha dowak torok bato it fagrigonan, hanggan ka Anak Topa it safolo ha dowak Fandiya-Barita ka gona man tiba, ista manga ngayan insorat sinyas boknga torok bato. 15Ka anghil ka kampang hangko ha bitbit fanokat ginto kaarakitay somokat ka banwa, it manga tahop sakbawan hanggan it alad. 16Myasa kaban ya ka banwa kadaholan hanggan it kaaban. Ka anghil nasokat ka banwa. It kaaban hanggan it kadaholan hanggan it kaabwatan myasa wa dahonya, 24,000 ik liho. 17Ka anghil nasokat yadi ka alad, ofat ik safolo h sadik dofa it kaabwatan, ka anghil nogsokat it diya fanokat. 18Ka alad bato haspi wan, ka banwa sonson wa ginto idwa ha aktom iba, maliyaw wa kitos salamin. 19Ha akwa fagayo fagayo fag manga bato ka fiya kabantay, matokban sas torok bato ka fagrigonan alad. Ka gona fag bato kawa haspi, malatoy fag bato ha aktom bilang ginto, ka fadowa sapiro, malatoy fag bato, maliyaw yadi, kat fatolo kalsidonya, malatoy fag bato dapat masinay, kat faofat ismiralda, sadik bato malatoy wa dahol dahol. 20Kat falima, onisi, sadik bato igsoglatan sayo dararag, sayo abohay, kat faonom, kornalina, sadik bato boragaw boragaw, kat fafito, kirisolito, sadik bato bilang wa loto soli it kadararagan. It fawalo birilo, kitos dagat it kahasdingan, it fasiyam topasyo, boragaw wa dahol dahol, kat fasafolo kirisopiraso, sadik bato bilang wa kaliboyong it kalatoyan. It fasafolo ha sadi, hasinto, sadik bato bilang wa obi dongon it kahasdingan, ginya madit fasafolo ha dowa, amatista, sadik bato bilang obi dongon yadit kahasdingan. 21Ka safolo ha dowak fanahop sakbawan sonson inhalig gis basad boga sihi. Gi sadik boga sihi ka sadik fanahop nonhalig. Ka manga karsada basad banwa inhalig ginto wa malayon, maliyaw wan, kitos salamin. 22Hodwa ha lagan Fanimbaan-Dahol sinya fag banwa, maskin is Diyos kadwa ha bosal, kagfon intam, hanggan ka Anak Topa, tonya wa ka Fanimbaan-Dahol sinya. 23Tam fawa ha fakasayaon manga magdanon, manga myanit kitay igfayawa tonya fag banwa, maskin in Diyos kafiyan kagfayawa sinya hanggan ka Anak Topa intam wa salong. 24Tonya fag yawa kagfayawa has fagayo fag manga dahol fag layonan daga ka manga taw noglahaw sinya. Hanggan ka manga gorangon sas baba daga domiya yadi sinya basad banwa, it manga kaakwaan. 25Ka manga fanahop sakbawan banwa maboklasan fagaba sadi wak sirangan maskin fawa ha yabi sinya. 26Ta domiya ka kaakwaan hanggan kangayanan gis fagayo fag manga dahol fag layonan daga hanya basad banwa. 27Dapat ay, nyawa kana ka sitam san Diyos faglagan, hanggan kasta manga ogali mahaya kalag, hanggan ka manga bohagon idwa somakbaw sinya. Ka lamang ista manga ngayan kansorat san Anak Topa listahan ka manga taw ka ha haboyagan ka somakbaw sinya fag banwa.

will be added

X\