NAFALAG 20

1Ginya madi ho nalag sadik anghil igdokson gin Diyos banwanan sam tongod ha bitbit kadina dahol hanggan sosi has ohang idwa ha saragan. 2Ka anghil nagamat ka daragon, ka yapdista nangayan Abyanon hyabi hyabi, kawas Fandaya, it ngayan is Satanas. Ka anghil nagafos hanya, ginya madi is Satanas magafosan 1,000 fangaraw. 3Ginya madi ka anghil naokas hanya hawas basad ohang daga kadwa ha saragan, ginya madi natahop a, nafwalid tanda sas boknga faganitan sosi kaarakitay idwa malfas, idwa syagan domaya domwag ka manga taw istay sas baba daga nodyam sagaya 1,000 fangaraw. Nomsagaya tonya fag 1,000 fangaraw, ta fag fomalfas ya in Satanas sadik ngalay. 4Ginya madi ho nalag manga tokawan fanokawan gorangon hanggan ha nadisag ka manga matokawan sinya kangayanan. Ho nalag yadi kasta falad kasta nalifong hyabi it manga liyog, kawa nogfaorongan han Hisos hanggan igfadog in Diyos hampang. Tadwa nalohod has hayopan maisog, nyawa hat tolad. Tadwa yadi nafaangay kitay fag ha tanda gis maisog fag hayopan sasta boknga angas, ngatay boknga gamat. Is Diyos nafaboyag ya tonya fag manga taw kaarakitay gofod in Kiristo ha kangayanan balis 1,000 fangaraw it kadogayan. 5To ka manga gona fag natay kanboyag ya gis kahatayan. Is Diyos faboyag ya yadi aban ka tiba fag manga natay, nomsagaya 1,000 fangaraw. 6Maliyaw ka mangan aktom has manga gona fag imboyag ya gis kahatayan maliyaw, hanggan ta bomaya yadi wan. Ka fadowa fag kahatayan idwa syagan domaog tonya fag manga taw. Tambali in Diyos manga fagalan hanggan in Diyos-natogon-Famawi it manga fagalan, ta mangofodan yadi han Kiristo, bomahala has taw balis 1,000 fangaraw. 7Nonsagaya 1,000 fangaraw, ta fomalfas ya in Satanas. 8Hanya domaya ya ka manga taw istay is baba daga, kawa ka taga Gog hanggan Magog it fagdayaon sas ofat ik fongfongan daga manga layonan banwanan. Is Satanas tomifon it manga sakop kaarakitay lomaban wan. In Satanas ofod sondalo kayowas onay dagat. 9Ta nanarowayan wan ha sadik baba daga a, naligong in Diyos manga nafili nahalig alad fanaktak ista kalaban, naligong yadi in Diyos faganoon banwa. Dapat ay, ha akwa afoy inbangkad gin Diyos banwanan sam tongod a, nafayagaw was taw. 10Ginya madis Fandaya kagdaya has taw in-okas wan, hawas basad linaw afoy hanggan asopri, hayadin anghil nagokasan in hayopan maisog, hanggan ka manga fangampang bohagon. Ta fagayo mangofodan wan domog mahori yabi sirang, hanggan aban aban. 11Ginya madi ho nalag sadik dahol fag tokawan fanokawan gorangon abohay, ho nalag yadi ka matokawan sinya. Ka daga hanggan ka banwa sam tongod inliyam wa kitonya git faglagan ka matokawan sinya, idwa hanlag domwag. 12Ginya madi ho nalag ka manga natay hyabi, nyawa ka manga ha kangayanan, nyawa kadwa ha kangayanan, malindogan sas tokawan fanokawan gorangon akbang. Ta naboklas ka manga listahan. Naboklas yadi ka sadi yak listahan, ka listahan manga taw ka ha haboyagan. Ginya ta no nafatohoyan ista hadasogan ka manga natay, kawasta manga naogali, no kinda kansorat sas listahan. 13Ka dagat nafabangkad ya ka manga natay sas basad dagat. Ka kahatayan hanggan ka Daga Salad nafabangkad ya ka manga natay ka sinya. Kitonya yadi ta no nafatohoyan ista hadasogan kawasta manga naogali. 14Ginya madi ka kahatayan hanggan ka Daga Salad in-okas ha basad linaw afoy. To fag linaw afoy kawat fadowa fag kahatayan. 15Nyawa faktaw kat ngayan kadwan sorat sas listahan manga taw ka ha haboyagan, ta naokas wan ha basad linaw afoy.

will be added

X\