NAFALAG 18

1Ginya madi ho nalag sadi yak anghil ka ha kadonongan dahol, igdokson gin Diyos banwanan sam tongod. It kasinayan igyawa wa sadik baba daga. 2Igrokyaw di kamin wan, iglwang, Ka gorangon fag banwa Babilonya intodtolagan wan, intodtolagan wan. Kati manga odi oliyanan labang sinya. Inbali odi porisowan labang, manga manok sitam sitam kagfogad sinya. 3Maskin hanya nafainom has fagayo fag dahol fag layonan daga, it alak kawat ogali dwat has ka taw. Ka manga gorangon sas baba daga insaya hanya, hanggan aywan inbali maakwa noglag it fangaboyagon gis Babilonya manga ogali mahaya. 4Ginya madi ho nadog sadi yak hasnog gin Diyos banwanan sam tongod kaglwang, Ham kangko sakop, ham fag danwag lagyo, Ham fag idwam aktom hat manga ogali dwat Kaarakitay ham idwa yadim aktom has taw ta nomdosa. 5It manga ogali dwat digtarongbawan wan hanggan wagdasog ham tongod is banwa. Is Diyos fawag liyam it manga naogali dwat. 6No kinday kat naibolon has taw, ham fag ganti yadi kitonya. Ham fag ganti, igfaparihowan wan kat naibolon ha hayo, Ham fahapnowan wat ongot fanginoman, Fag mayat man kat nadisag ha hayo. 7No kinday ka banwa Babilonya nogfadaholon it sadili, hanggan fagaba has kasolongan, Ham fag fatakagdog yadi hanya, hanggan fag fahori yadig dog hanya, Maskin it fangayofan fagabag lwang, Aho ka ina ha kangayanan, ista gorangon. Aho bohonwa ina balo, Nyawa ginahin ahodwa lomag kahoriyan 8Nyawa ka banwa Babilonya iglwang kitonya, yatokitay igsohodan wa kadasog gis nanya fag sirang ka manga kahoriyan Manga sagit, tamrongkot yadi kawa ha natay, hanggan wamlonos, Imsogba wa has basad afoy, hanggan wamyagaw. Maskin is Diyos kagfon intam marigon kagfatohoyan ista fadosaan. 9Ka manga gorangon istay is baba daga, kansaya hanya hanggan kansolong sat akbang omoraw wan. Ta nogbantay ka banwa ganos wan, kasonog wan, 10ta lomindog wa sas ayayo maskin ta kadala kitay, ta ngandayom lafit yadi kat kahoriyan. Ta lomwang, Liwas liwas, manga dowa lamang ik tama sinyahod in-anod wan ka madala has gorangon fag banwa Babilonya. 11Kawa kitonya ka manga nalag it fangaboyagon ginya, istay is baba daga, omoraw a, imrongkot yadi wa dahol maskin idyadi wa ha manali ista manga fagfasaliyon. 12Idwa ha manali ista balidya ginto, pilak, manga bato fiya kabantay, hanggan ono bolawan, manga rotay kadya mahaligan, manga rotay dararag hanggan bilang obi dongon it kahasdingan, hanggan fagayo fag hayo banglo, ista sangkap manga fangil, kawa manga hayo fiya, manga tanso, manga baol, manga bato marmol, 13manga haningay, manga famabanglo ofi, kasta fagsonogon banglo mira, hanggan kamangyan, manga alak, langis, harina, manga tirigo, manga baka, manga topa, manga habayo, hanggan wat kalisa, manga fasaliyon sogowan, nyawa hanggan wasta fangayofan hanggan wa habilogan. Idwa ha somali domwag. 14Ka mangag lag it fangaboyagon ginya fag banwa lomwang hanya, Namin wan ka manga bagay fiya kam fakasayaon. Hadwa ha lagon domwag im kaakwaan fagayo, hanggan hyamo kafiyan inliyam yadi wan. 15Ka manga nalag it fangaboyagon kawag fasali tonya fag manga bagay, hanggan inbali maakwa ginya fag banwa, tadwa omakbang domwag, kawa ta kadala kitay ta ngan yadim lafit has mahori. Ta omoraw wan hanggan imrongkot wa dahol. 16Ta lomwang, Liwas liwas, tonya fag banwa gorangon no kana mayon nonsonog. Hyabi it solong rotay myasa wa fiya fag manga rotay dararag, manga obi dongon it kahasdingan, Manga ginto, manga bato fiya kabantay hanggan ono bolawan it manga dayag. 17Manga dowa lamang ik tama sinyahod inliyam wa tonya fagayo. Ka manga kapitan sahayan baba dagat, hanggan it manga sahay, it manga bantay sas basad sahayan nabantay yadi gis ayayo, hanggan fagayo kaglag it fangaboyagon sas baba dagat, 18ngadit anos ta nabantay, ta godgorawan wan ta noglag kitay ka banwa kasonog wa yabay. Taglwang, Idwa ha natolad it kafiyan tonya fag banwa gorangon. 19Ta nafwalid fogis sat sadili baba alfoyo, kawa no ha fakahoriyon. Taglwang, Isyay wa isyay wan ka gorangon fag banwa nadalanan. Fagayo fag sahayan kagtorosan hat fangadagsaan kabali wa maakwa haraw, no kitay di. Dapat ay, manga dowa odik tama sinyahod inliyam yadi wan it kafiyan hanggan kaakwaan. 20Dapat ay, kati, haw in Diyos banwanan sam tongod, fag kasolong wan, kawa tonya fag banwa insonog wan. Ham in Diyos manga nafili, ka manga gona fag Fandiya-Barita, hanggan manga fangampang, ham fag kasolong yadi maskin kati is Diyos nafatohoyan ista fadosaan kawasta naibolon dwat ha hayo. 21Ginya sadik anghil marigon nabol sadik bato bilang dahol fag gilingan. Hanggan ya ngadi ha karigonan no ganggong ka bato, naokas has basad dagat, igsohodan wagrokyaw iglwang, Kitoy ka banwa Babilonya nomdwat aban, Hadwa aba ha lagon domwag. 22Hadwa aba ha dogon domwag ista manga hasnog garambahanan, Hadyadi wa ha dogon sinya aban manga kaskas alpa, mangag faon manga palawta, manga bodyong. Hadwa ha lagon aban sa hyamo, nyawa kana fag kadonongan has fangalig baliwa. Hadyadi wa ha dogon aban manga gilingan igrabog. 23Idwa ha somantik ngadi sadik salong is nyamo, Hadwa aba ha dogon domwag masolong fag manga hasnog kagbabay hanggan gindogan no hawat fangsawan. Maskin hyamo fangaboyagon hyabi inbali marigon sadik baba daga gi hyamo fagfasaliyon. Haw nadaya fagayo fag manga taw sadik baba daga maskin haw nafasayagdog has fagayo in Satanas kadonongan. 24Inlag sas ina in Diyos manga fangampang folot, in Diyos manga nafili it folot, hanggan fagayo kasta nafahatay istay is baba daga.

will be added

X\