NAFALAG 17

1Ginya madi sadi gis fitok anghil ka ha diya fitok mangkok naakbang angko, nalwang, Ha fag hastay wan, lag ngay, ho falag hyamo ka fadosaan kamtohoyan has ina ka ha kangayanan has fabayowan baliwa. Hanya ka matokawan sat tokawan fanokawan gorangon, sas baba danom safa aywan. 2Ka manga gorangon istay sas baba daga insaya tonya fag ina, hanggan manga taw sas baba daga intahin yadi waglag, bilang yadi wanlango git alak kahayan. 3Ginya ka Maliyaw fag Falad naboklas angko fangayofan hanggan sadik anghil nafangolo angko ha sadik foyo basad fakahyabogan. Ho nalag sinya sadik ina masahayan baba hayopan maisog, it olad dararag. Ka hayopan ha fitok alfoyo hanggan safolok songay. Ha manga ngayan, fagayo wagsway in Diyos, masoratan sas boknga habilogan hayopan. 4Ka ina solong rotay ha dararag, ha akwa yadi bilang obi dongon it kahasdingan. It manga dayag manga ginto, manga bato fiya kabantay, hanggan manga ono bolawan. Ka ina ha bitbit sadik fanginoman ginto napno ka manga dwat fag ogali, hanggan wa ngap ka mahaya kawa nogfabayowan. 5Sadik ngayan, mafyaloman yapdit kahologan, insorat sat boknga angas, kiti, Ka gorangon fag banwa Babilonya tonya wa ka bilang wasta ina has mangag fabayowan hanggan fagayo fag mahaya donggon sas baba daga, sinya wa fagayo. 6Ho nalag yadi kitay tonya fag ina bilang wanlango gin Diyos manga nafili, it folot, kawasta nafahatay maskin tagfaorongan kawa han Hisos. Ho no nalag ka ina, hondolaw wa dahol dahol. 7Dapat ay, ka anghil naintaw angko kitay, Kana mayon haw no kadolaw? Ho fomwayong hyamo it kahologan ka ina hanggan it nagsahayan hayopan, ka fito it alfoyo hanggan safolo it songay. 8Kam lagan hayopan maisog boyagan hyabi, dapat kati natay wan, dapat ay, aban imbangkad ya gis basad ohang kadwa ha saragan, ginya hawas kadwatan. Ka manga taw boyagan yapdi sas baba daga, kat manga ngayan, gi yapdis kabali daga, idwan sorat sas listahan manga taw ka ha haboyagan, ta no lomag ka hayopan maisog, tamlipto wan, maskin ha nafahatay tonya hyabi, dapat ay imbangkad ya aban. 9Ka fiya ka manga madonong fag twagdog. Ka fitok alfoyo kawa fitok fongso ka ina fanokawan. Ka fitok fongso igfahalimbawa fitok gorangon. 10Indaog wa ka lima, sadi ya kan-goyan ha kangayanan yapdi, ka fafito idyan dasog. Hanya nomdasog, ngalay odi it kangayanan. 11Hanggan ka hayopan maisog, ka boyagan hyabi, dapat kati idwa akwa, kambali ka fawalo fag gorangon aban, dapat ay, tomobos ka sadi gis fito. It hadasogan hawas kadwatan aban. 12Kam lagan safolok songay kawa safolok gorangon kadya ha nagdogan kangayanan, dapat aban ta mangoyogan has hayopan maisog no mamahala balis manga dowak tama sinyahod it kadogayan. 13To fag safolok gorangon insadi it fangayofan hanggan mamasakop it kadonongan hanggan kangayanan has hayopan maisog. 14Ta lomaban has Anak Topa, dapat ay, ka Anak Topa domaog di tonya maskin hanya ka Fon has manga fon, hanggan Hari has manga gorangon. Ka Anak Topa manga nafatawag, manga nafili, hanggan kadwag fagomon katanog hanya, gofodan yadi has Anak Topa nogdaog has taw. 15Ginya ka anghil nafwayong ya domwag angko, Ka hyamo lagan danom, ka ina nagtokawan, kawa manga banwa, manga fakaaywanan taw, manga layonan daga dahol, hanggan manga sanglitan taw. 16Kam lagan safolok songay, hanggan ka hayopan maisog, omisog aban has ina ka ha kangayanan has fabayowan baliwa. Ta homagaw it manga sangkap fagayo fagayo, ta lomobas wa a, omobon wa malobasan. Ta homwan wat manga faknol a, ta somonog wa kansawad. 17Is Diyos igfaangay wa kitay, ta fag kasadi it fangayofan hanggan fasakop ista kangayanan hanggan kadonongan has hayopan maisog, hanggan wamtonglos in Diyos manga hampang. 18Kam lagan ina kawa ka gorangon fag banwa kagfasognod has manga gorangon istay is baba daga.

will be added

X\