NAFALAG 16

1Ginya madi ho nadog sadik hasnog marigon gis basad lingoban sas Fanimbaan Rotay, igsogo ka fitok anghil, iglwang, Sogi, ham fag hanya wan, bohosan ka manga mangkok it sohad, in Diyos mahori fag kaisogan, has baba daga. 2Yakanga ka anghil gona nawatwat ngay kat sohad, kat diya basad mangkok, has baba daga. Yakanga ka manga taw ka ha akwa in hayopan maisog it tanda, hanggan kaglohodan hat tolad, nabangbangan mahori a, masagit ya, baw ya. 3Ka fadowa fag anghil nabohos yadi kat sohad git basad mangkok has baba dagat. Ka danom inbali folot bilang folot taw mahatayan, hanggan fagayo ka manga boyagan basad dagat natay wan. 4Ka fatolo fag anghil nabohos yadi kat sohad git basad mangkok has manga basad safa, hanggan has manga bolbogan, ginyan bali yadi wa folot sinya. 5Ho nadog ka anghil ka gano has manga danom iglwang, Haw ka maliyaw, ka boyagan kati hanggan ka gis hyabi hyabi, Fakafiyan wan kam naibolon haw nogfatohoyan it fadosaan has taw. 6Maskin kam disagon inomon has taw ka nafaolan in Diyos nafili fag manga taw, it folot, hanggan it manga fangampang folot, Folot mandi kasta inomon. Tonya ka fiya fag fadosa has taw. 7Ginya madi ho nadog to fag manga hampang gis bilog fanogbaan. Haw Diyos kagfon fagayo hanggan kadwa ha bosal, Maanod hanggan orongan wa fakafiyan haw nogfatohoyan has taw it fadosaan. 8Ka faofat fag anghil nabohos has myanit kat diya basad mangkok, ginya ka myanit nafafali was taw afoy. 9Yakanga ka manga taw nafali ngay. Dapat, nyawa kitonya, bohonwa ngap has mangag soyo, mangag fasayagdog in Diyos, ta ngap igfadwat odigdog in Diyos ngayan, ka syagan igfabangkad kitonya fag manga kahoriyan has fakaaywanan. 10Ka falima fag anghil nabohos has maisog fag hayopan tokawan fanokawan gorangon, nabohos it sohad git bitbit basad mangkok, ginyan hayopan maisog it banwanan inharom wan. Manga taw kagat it sadili dila kawa kasagit wa dahol. 11Ta nafadwat yadigdog in Diyos kagfon it banwanan sam tongod, kawa ta nogdog mahori ista manga sagit hanggan manga bangbang. Dapat ay, tadwa yadi nasoyo, tadwa yadi nadayo it manga ogali dwat. 12Ka faonom fag anghil nabohos kat sohad git basad diya mangkok, nabohos ha basad dahol fag safa, ka safa Ifratis. Ka danom inmaya, kaarakitay ka manga gorangon gis salogan myanit baliwa ha dalan has basad bintalan. 13Ginya ho nalag tolok dwat dwat fag labang, bilang wa fihaw inbangkad gis basad bibig daragon, gi yadis basad bibig hayopan maisog, hanggan gis basad bibig fangampang bohagon. 14To fag manga labang gibolon manga madolaw. Ta somabang has fagayo fag manga gorangon, sadik baba daga, kaarakitay fatifon nangos ka manga gorangon, kawa aban, san Diyos Sirang mahalga, ka Diyos kadwa ha bosal, ta manlabanan wan. 15Ham fag matalingan, kito odis fangnahaw aho no kadasog. Ka mafolawan fagaba, kadwag loslos it manga rotay, idwam toon kitay idwa ha solong noglahaw, idwa maya sasta faglagan hanggan hanya bomaya wan. 16Ka manga labang nafatifonan ka manga gorangon sa sadik foyo tagngayan Armagidon sas fangampangan Hibriyo. 17Ka fafito fag anghil nabohos kat sohad git basad bitbit mangkok, nabohos has boknga halayawan. Ginya madi ha nahampang marigon gis tokawan fanokawan gorangon sas Fanimbaan Dahol, nalwang, In-anod wa kati. 18Ginya nahilat ya, nafawas ya, nadalogdog ya, nalinog ya. Marigon marigon fag linog, marigon man ka hyabi fag manga linog gona. 19Ka dahol fag banwa insigsig tolok layonan. Kadi tiba fag manga banwa dahol sadik baba daga, fagayo nakfo wan. Ka banwa Babilonya kanbantog kitay gorangon, fawa ha nalfas gin Diyos fadosaan. Yatokitay, is Diyos nafainom it mahori fag kaisogan fag alak ha hanya. 20Fagayo fag foyo dagat intaklob wan, fagayo fag moyod intanas lamang. 21Nahwayan myasa wa dahol fag lifong yilo, it kahabyatan ka sik lifong, kito was sadik sako fayay, indagdag has taw. Kawa kitonya tagsogat ya ngawan Diyos, maskin to fag kahoriyan has fakaaywanan taw mahori wa dahol dahol.

will be added

X\