NAFALAG 15

1Ginya ho nalag sadi yak falagon madolaw sas banwa sam tongod, fitok anghil ha diya fitok kahoriyan has fakaaywanan. Tonya kawa goyan goyan fag manga kahoriyan has fakaaywanan kawan Diyos mahori fag kaisogan imtabo wa balinya. 2Ginya kangko lagan bilang sadik dagat kito was matikyas it kasinayan, ka ha aktom afoy. Ho nalag yadi ka manga nadaog has hayopan maisog, hanggan hat tolad, hanggan hat ngayan nomiro. Ta malindogan sas akbang dagat ka bilang matikyas, ha bitbit in Diyos manga alpa. 3Ta gambahan in Mwisis, ka ngan Diyos sogowan, it ambahan hanggan ka Anak Topa, it ambahan kiti, Haw Diyos kagfon hyami, haw kadwa ha bosal, Kafiyaon hanggan madolaw wa dahol dahol im manga ibolon. Maslong hanggan orongan im manga ogali Haw noghari has manga dahol fag layonan daga. 4Hyami Fon, fakta fag manga taw idwam tanog hyamo, ha gayfan? Fagayo fag manga taw mamasayagdog kitay haw kafiyaon. Maskin haw sadi lamang ka maliyaw, Manga taw gis fagayo fag dahol fag layonan daga manlibabaan ha hyamo atobangan, Maskin im manga ibolon maslong inlag wan. 5Ginya madi ho nalag ka nafabokod ya domwag fag lingoban sas Fanimbaan Rotay, san Diyos banwanan sam tongod, inboklas wan. Tonya fag lingoban ista fanaranggapan han Diyos hanggan has taw. 6Ka fitok anghil ka ha diya fitok kahoriyan has fakaaywanan nadokson ginya basad lingoban. Ista solong rotay abohay, malinay yadi, ha fagyahos ginto sas boknga dobdob. 7Sadi kanhalig boyagan nadisag has fitok anghil fitok mangkok ginto, napno in Diyos mahori fag kaisogan, ka boyagan fagaba fag Diyos. 8Napno wa anos sas basad lingoban ka nafabokod ya domwag maskin in Diyos kangayanan hanggan karigonan sinya. No baliday idyan tolas ka fitok anghil diya fitok kahoriyan has fakaaywanan, idya twag sakbaw hanyas basad lingoban.

will be added

X\