NAFALAG 14

1Ginya madi ho no nabantay wan, hoglag kitay ka Anak Topa malindogan sas baba moyod Siyon, hanggan it manga ofod 144,000 ik taw. Ka Anak Topa ngayan hanggan it Ama ngayan masoratan sasta boknga angas fagayo fagayo. 2Ho nadog yadi sadik hasnog gin Diyos banwanan sam tongod, bilang wa sadik danom gis boknga tiwan nogtarapsahan, igfawas wan, kito was dalogdog katik wan. Kangko donggon hasnog bilang wa mangag faoni, kaskas it manga alpa. 3Ta garambahanan wan sadik ambahan bago, sas atobangan tokawan fanokawan gorangon, hanggan sas akbang ofat kanhalig boyagan, hanggan sas akbang dowak safolo ha ofat ik fagtahinan. Idwa ha taw twagdog ista ambahan no bohonwa ka odi ka 144,000 ik taw kan Diyos natobos gistay is baba daga ka syagan igtohod tonya fag ambahan. 4To fagayo manga ama kadwa naofod has manga ina, idwa nababay. Ta matahinan fagaba has Anak Topa nyawa haday it hadasogan. Ka Anak Topa natobos tonya fag manga ama gis fagayo fag manga foro taw kawan disag han Diyos hanggan has Anak Topa, bilang bohad bago bago. 5Tadwa nabalibad nyawa ginahin. Manga taw idwa ha lagan dwat sasta manga ogali. 6Ginya ho nalag sadi yak anghil iglayog sas boknga halayawan, ha diya ka Fiya fag Barita kadwa kaoman, kaarakitay fadog has manga taw sas baba daga sas fagayo fag manga dahol fag layonan daga, fagayo fag layonan taw, fagayo fag sanglitan taw, hanggan fagayo fag banwanan. 7Hanya nafwayong marigon, Ham fag katanog in Diyos manga fwayong a, ham fag fasayagdog hanya, maskin kati wa fag masohod hanya mamatohoyan has manga taw it fadosaan. Ham fag fasayagdog hanya ka nahalig ka banwa sam tongod, hanggan ka daga hanggan dagat, hanggan manga bolbogan danom. 8Ginya kat fadowa fag anghil nasoson ka gona, nalwang, Ka gorangon fag banwa, banwa Babilonya, intodtolagan wan, intodtolagan wan. Ka Babilonya nafainom ya ngadi manga alak has fagayo fag dahol fag layonan daga, kawat sadili wa nahalig alak, it ogali podo wa dwat has ka taw, napilit wa nafainom has taw, yakanga tonya fag alak kan Diyos fakaisogon. 9Ka fatolo fag anghil nasoson yadi ka dowak anghil gona, igtawag marigon, Nyawa faktaw kagfasayagdog has hayopan maisog, ngatay hat tolad, hanggan igfafwalid it tanda sat boknga gamat, ngatay sat boknga angas, 10hanya ominom in Diyos alak kaisogan, natalin han Diyos basad ongot kahoriyan, idwa ha aktom kahowayan sinya. Hanya domog mahori basad afoy hanggan asopri, saya ngadis Anak Topa faglagan hanggan ka manga maliyaw fag manga anghil fag lagan yadi. 11Ka anos gis afoy kagfahoriyan has taw maanosan wa sadik kaban ya. Ka mangag fasayagdog has hayopan maisog, hanggan hat tolad, hanggan ka ha akwa it tanda, idwa ha kahowayan yabi sirang. 12Yakanga kan Diyos manga nafili, ka manga katanog in Diyos togon, hanggan idwag fagomon igsyag in Hisos, fag matohoyanan idwag fagomon. 13Ginya ho nadog sadik hasnog gin Diyos banwanan sam tongod, kaglwang, Ha fag sorat kitay, Ka manga mahatayan, ka katay gis kati ginan, dapat, gis dayo boyagan, insadi hasagfon intam, bomaya wan. Ka Maliyaw fag Falad iglwang, Anod wan, ta bomaya wan maskin ta mamahoway git nakayayan, kawa ka kasoratan it manga naogali gofod yadis taw. 14Ginya ho nabantay ya, hanggan nalag sadik linyabo abohay hanggan ha matokawan sinya sadi, ka bilang taw, ha sangbaw ginto, ha bitbit sadik karit matayom. 15Sadi yak anghil ka nadokson gis basad Fanimbaan Dahol, natawag marigon has matokawan sas baba linyabo, nalwang, Ha fag matawidan im karit, ha fag gafas wan maskin loto wa kati ka aniyon sas baba daga. 16Yakanga ka matokawan sas baba linyabo igfasayang wat fangarit a, gafas wat aniyon sas baba daga. 17Ginya madi ho nalag sadi yak anghil ka nadokson gis basad Fanimbaan Dahol, san Diyos banwanan sam tongod, ha bitbit yadi sadik karit matayom. 18Ginya sadi yak anghil kagbahala has afoy inbangkad gis fanogbaan. Natawag marigon has anghil ka ha bitbit karit matayom, iglwang, Ha fag matawidan im karit, ha fag gani wan ka manga obas gis fagayo fag manga obasan sas baba daga, maskin loto wa kati. 19Yakanga ka anghil nafasayang it karit a, naani ka manga obas, naokas has basad dahol fag fanlidan obas. Tonya fag fanlidan obas in Diyos mahori fag kaisogan. 20Ta nalid ka manga obas sas sokayan banwa hanggan ka folot gis basad fanlidan obas nabaha wan, 400 ik liho it kaayayowan hanggan balis liyog taw it kaabasadan gis baba daga has tongod, sonson wa folot.

will be added

X\