NAFALAG 13

1Ginya madi ho nalag sadik hayopan maisog kabangkad gi basad danom dagat. It alfoyo fito, it songay safolo. Fagayo fag songay kafod ha sangbaw, fagayo fag alfoyo ha ngayan masoratan, igsway in Diyos. 2Kangko lagan hayopan maisog, bilang wa liyopardo, it bitis kitos bitis oso, it bibig bilang wa bibig liyon. Is Daragon nadisag wa has hayopan maisog it sadili kadonongan hanggan it tokawan fanokawan gorangon, hanggan it dahol fag kangayanan. 3Ka hayopan maisog, kat alfoyo sadi ha baran, no kalag di fakatayon wan, dapat infakdat ya. Ka manga taw sadi wak baba daga intaka waglag kitay infiya di, ta ngap natahin wa has hayopan maisog. 4Manga taw nafasayagdog han Daragon maskin is Daragon kagdisag it kangayanan has hayopan maisog. Ta nafasayagdog yadi has hayopan maisog, taglwang, Idwa ha tomolad in Hayopan maisog. Fakta ka lomaban hanya, ham gayfan? 5In-angay kitay ka maisog fag hayopan fag mafatakaon igdog, igsway in Diyos, hanggan hanya fag ha kangayanan balis ofat ik safolo ha dowak magdanon. 6Igyod wa nga in Diyos, in Diyos ngayan, in Diyos banwanan sam tongod, hanggan fagayo ka maoliyanan sinya. 7In-angay yadi kitay ka hayopan maisog lomaban hanggan domaog in Diyos manga nafili. Indisag yadi has hayopan maisog ka kangayanan igbahala has fagayo fag manga layonan taw, manga banwanan, manga sanglitan, hanggan fagayo fag manga dahol fag layonan daga. 8Fagayo fag manga taw ka boyagan istay is baba daga mamasayagdog hanya, no bonwa ka manga taw ka odit manga ngayan insorat sas listahan manga taw ka ha haboyagan. Ista manga ngayan danwan sorat sinya ka daga nodyan halig, hanggan ka Anak Topa, ka manga taw nafahatay, ka gano tonya fag listahan. 9Ham no ha manga talinga ya ngadi, fag talinga wan. 10No faktaw kantohoyan kitay ta pomilit wa tomaban wan, ya ta tomaban wa hanya. No faktaw kantohoyan kitay ta lomibon wa hanya, tonya wa kat lagon aban. Yakanga in Diyos manga nafili fag danwadwag fagomon, fag syag wa orongan han Diyos. 11Ginya madi, ho nalag sadi yak hayopan maisog kanbangkad gis basad daga. It songay dowa, kitos anak topa songay, dapat it hasnog kitos hasnog daragon. 12To fag hayopan ha natanggap kangayanan gis gona fag hayopan maisog, hanggan ka gona mabantayan di, ka fadowa nogbahala has taw. Igpilit fagayo fag manga taw sas baba daga fag fasayagdog has gona fag hayopan maisog, ka hyabi ha baran, no kalag di fakatayon wan, dapat infakdat ya. 13Ay ay, ka fadowa fag hayopan maisog, madolaw wa dahol it nafalag manga fatimawa. Nafabangkad yadi afoy gis banwa sam tongod, has baba daga sas faglagan manga taw. 14Igfaadowan fagayo fag manga taw sas baba daga kawat manga nafatimawa sas gona fag hayopan maisog faglagan. Nafasognod is taw kitay, haligan sadik tolad, igtolad ka gona fag hayopan maisog, ka ha baran talibong hyabi, dapat idwa natay. 15In-angay yadi kitay, ka goyan fag hayopan maisog fag domisag yadi ipsaw kasta nahalig tolad ka gona fag hayopan maisog. Yakanga ka tolad syagan yadi wa kampang, igfahatay yadi fagayo ka dayog fasayagdog hanya. 16Nafwalid ka gona fag hayopan tanda sas fagayo fag manga taw, ngatay sasta gamat balis sihon, ngatay sas boknga angas, napilit wa fagayo, nyawa ka ha kangayanan, nyawa kadwa ha kangayanan, nyawa ka maakwa, nyawa ka myabog yadi, nyawa kasta sogowan, nyawa ka bohonwasta sogowan. 17Nodwa ha akwa ka gona fag hayopan maisog it tanda, ngatay it nomiro ka pariho it ngayan, tadwag faangay manga taw igsali, ngatay igfasali nyawa kana. 18Tam idwa tomwagdog to tam nodwa ha fakatwawon. Nyawa faktaw ka ha fakatwawon tomwa wagdog it kahologan ka nomiro ka gona fag hayopan maisog, kagfatohoyan sadik ama it ngayan. It nomiro kawa 666.

will be added

X\