NAFALAG 12

1Ginya madi sadik tanda madolaw wa dahol dahol inlag sas banwa sam tongod, sadik ina mabalokasan ka myanit, ka magdanon sat daga bitis, ha sangbaw yadi safolo ha dowak fanggasan sat boknga alfoyo. 2Ka ina gabosog wan, igdyang, igrokyaw wan it kasagitan, kawa mahori igfasagaya it anak. 3Ginya sadi yak tanda inlag sas banwa sam tongod, sadik daragon gorangon, dararag. It alfoyo fito, hanggan it songay safolo, talafod wa ha sangbaw sat manga boknga alfoyo. 4Ka daragon nafabayabayan it ihog ka nafadagdag ka fatolo fag layonan gis manga fanggasan, in-od-okasan lamang has baba daga. Ginya madi, ka ina no kaakbang wagfasagaya it anak, ka daragon nalindog sas ina dayo bitis kaarakitay homwan wa madali madali ka anak dararag nomsagaya git ina. 5Ka ina nafasagaya sadik anak ama, kantalaga bomahala has fagayo fag dahol fag layonan daga, kito was baol fag maganit no bomahala has taw, ginya dagos ha akwa naanggong ka anak gis ina akbang, nadiya wa han Diyos sat tokawan fanokawan gorangon. 6Ka ina nalagyo yadi wan has basad fakahyabogan, ha sadik foyo kan Diyos nafatalaga hanya, kaarakitay is Diyos omano hanya sinya, balis 1,260 ik sirang. 7Ginya madi haglabanan san Diyos banwanan sam tongod. Is Migil hanggan it ofod manga anghil iglaban in Daragon hanggan it manga anghil. Da Daragon iglaban yadinda Migil, 8dapat indaog di. Ginya ta nafaalin inda Daragon gin Diyos banwanan sam tongod. 9Ta naokas lamang ka dahol fag daragon, kawa hyabi hyabi it ngayan is Abyanon, it ngayan is Fandaya yadi, hanggan is Satanas, kawag fatalang manga taw istay sadik baba daga. Ta naokas lamang hanya hanggan it manga sakop anghil hastay is baba daga. 10Ginya madi ho nadog sadik hasnog marigon san Diyos banwanan sam tongod kaglwang, Giwas kati ginan is Diyos igbawi intam. Nafalag wantam it karigonan, hanggan kati hanyan bali hari, Hanggan nafalag it natogon-Famawi it kangayanan, Maskin in-okas kati gin Diyos banwanan kagsombong yabi sirang han Diyos, intam manga ogali, manga dowasayan. 11Dapat ta nadaog in Fandaya Kawa ka Anak Topa it folot, Hanggan ka barita kat fagfaoronganon kat manga fanlaban no nadaog hanya, Kawa tadwa nafaanogon it manga haboyagan, nyawa hanggan wa matay. 12Yakanga ham, in Diyos banwanan sam tongod, hanggan fagayo ka mabanwanan sinya, ham fag masolong wan. Dapat ay, isyay wan, ka ham sas baba daga hanggan ka sas dagat, Maskin is Fandaya nadokson has nyamo hayo, hanggan it mahori fag kaisogan tomoon wa ha hayo, Kawa hanya twa wa kitay it karigonan ngalay wamliyam aban. 13Ka daragon no nalag kitay hanyan okas wan has baba daga, naalaw ya domwag ka ina ka nafasagaya anak dararag ama. 14Dapat ay, ha nadisag bilang manga fakfak boyaw dahol has ina, kaarakitay syagan lomayog ha sadik foyo basad fakahyabogan, sinya ha akwa falogaw, omano yadi hanya balis tolok fangaraw hagboknga, kaarakitay ka ina lomagyo gin Abyanon dahol. 15Kawa kitonya is Abyanon naolob danom, inbali kitos safa kaarakitay falimos nangos ka ina. 16Dapat ay, ka daga natogbong ka ina, nasngi lamang, yakanga ka danom kan Daragon naolob intoyong lamang has daga, yakanga ka ina inbawi di. 17Yakanga kawas Daragon kaisog wa dahol dahol ka ina, nabaring wa ka ina manga hasokfonan kansawad, kaarakitay omaway has taw, has manga katanog in Diyos togon hanggan idwag fagomon katiwala in Hisos nafadog ka fakaoronganan. 18Ginya madi yabay, is Daragon nalindog sas bahalan dagat, baba onay.

will be added

X\