NAFALAG 11

1Ginya madi ka anghil nadisag angko sadik fanokat ka kitos sokod, nalwang kitay, Ha fag kalindog wan, sokatan in Diyos Fanimbaan Dahol hanggan ka fanogbaan. Tapan yadi ka mangag fasayagdog in Diyos sinya, no kayoday. 2Dapat ay, fag idwag sokat ka basad aladan Fanimbaan-Dahol maskin indisag wan has manga Hintil kagbahala sinya. Balis ofat ik safolo ha dowak magdanon ta lomid lamang, domwat ka banwa ka nafabokod han Diyos. 3Dapat ho somogo angko sogowan dowa, ka mamaorongan has taw balis 1,260 ik sirang, ta nogfadog angko hampang. It manga rotay manga odi sagodang. 4To fag dowak sogowan kagfaorongan, kawa dowak fon olibo, hanggan dowak salangan ka sawasagfon daga atobangan fagaba. 5No ha akwa taw kasaya omisog aban hanya fag dowak taw kagfaorongan, yabay ha akwa wa afoy imbangkad gista manga basad bibig a, matohoyanan ka mangag laban hanya fag dowak taw matay wan. 6Tonya fag dowak taw kagfaorongan, syagan digtaktak ka mwayan sam tongod is banwa, kaarakitay idwa homwayan no kandogay day ta nogtoltol yapdi in Diyos hampang. Ta syagan yadig fabali ka danom kito was folot, hanggan no ginahin ta no kasaya, ta syagan digfabangkad nyawa kana fag kahoriyan sas baba daga. 7Dapat ay, ka dowak sogowan nonsagaya wagfaorongan, ka hayopan maisog imbangkad gis basad ohang kadwa ha saragan, lomaban has taw, domaog hanggan wa fahatay. 8Ista manga habilogan mahatayan aban basta odi boknga karsada basad banwa dahol, dapat ta nogfatimbang tonya fag banwa, bilang wa banwa Sodoma, ngatay Ihipto. Sinya yadi manga taw no nafapako ista sadili Fon sas naftimbangan hayo. 9Tolok sirang hagboknga ka manga taw, nyawa ginda fag manga banwa, hanggan manga layonan taw, manga sanglitan, manga layonan daga dahol, mabantayan yapdi, tadwa nafaangay kitay fag imlobgob kat manga habilogan. 10Fagayo fag manga taw sas baba daga tamsolong waglag kitay to fag dowak taw natay wan. Ta manolodan ya ngadi. Ta mandidisagan manga fasalamat ha sadi ha sadi, maskin tonya fag dowak fangampang nafahoriyan wa dahol has taw. 11Dapat ay, nonsagaya tonya fag tolok sirang hagboknga, is Diyos nafafwali ya hanya fag dowak fangampang ka ipsaw haboyagan. Ta nalindog ya. Ka manga taw indolaw wan, tandala waglag. 12Ginya madi, in Diyos manga fangampang dowa, kanboyag ya, nadog sadik hasnog marigon gim tongod, nalwang hanya fag dowak taw, Ham fag sakbaw wa hastay. Ginya ista manga kalaban no mabantayan yapdi, ka dowak taw hawas tongod, hawa basad linyabo, in-anggong wa has tongod. 13Dagos wa nalinog yadi marigon marigon gis nanya, ka manga balay nakfo sas fasafolo fag layonan sinya fag banwa, hanggan 7,000 taw natay kansakop sas linog. Ka manga in-goyan sinya indala wan, ta bago di nafasayagdog in Diyos kagfon ka banwa sam tongod. 14Ka fadowa fag madala kan boyaw nafwayong intolas wan. Ka fatolo fag madala madali yadi wamlag aban. 15Ginya madi ka fafito fag anghil nafaoni it bodyong hanggan ha manga hasnog nahampang marigon san Diyos banwanan sam tongod, kaglwang, Kati ka manga gorangon sakop fagayo fagayo, sadi wak baba daga, inbali kagfon intam, it sakop, hanggan it natogon-Famawi, it sakop. Kagfon intam inbali wa hari sadi wak baba daga, hanggan has aban aban. 16Ginya madi, ka dowak safolo ha ofat ok fagtahinan ka matokawan sat manga tokawan fanokawan gorangon, san Diyos atobangan, nanlibabaan a, nafasayagdog han Diyos. 17Taglwang, Haw Diyos, kadwa ha bosal, kagfon hyami, Ka hyabi hanggan ka kati fag Diyos, Migbaya wa dahol hyamo, kawa haw nabangkad wam karigonan kadwa ha katabowanan. Gis kati ginan haw igfabago waghari. 18Hyabi ka mangadya kilala hyamo gisog wan. Dapat haw nafalag yadi wa kati im kaisogan. Kati haw igfatohoyan yadi has manga natay it fadosaan. Dapat ha domisag yadi manga fasalamat ha hyamo manga fangibolon, ka manga fangampang, Hanggan ha hyamo manga nafili, Hanggan has fagayo ka katanog hyamo manga fwayong, nyawa ka manga ha kangayanan, nyawa ka mangadwa ha akwa. Kati wa fag masohod haw no fadwat ka mangag dwat manga banwanan taw. 19Ginya madi in Diyos Fanimbaan-Dahol san Diyos banwanan sam tongod inboklas wa a, sinya yadi wa basad fanimbaan ka haban taranggapan inlag wan. Ginya ha hilat nandadalakan nafawas wan, nadalogdog yadi dahol dahol. Nalinog ya ngadi, nahwayan ya yilo.

will be added

X\