FILIMON 1

1Ahos Pablo kanporiso kawa ho gibolon in Kiristo Hisos ibolon. Hami da Timotiyo, intam fadwasay, igsorat ha hyamo, Filimon, hyami kapariho fangibolon. 2Migsorat yadi han Diyos Tifonan kagtifonan sam balay, han Apiya, hyami fadwasay ina, hanggan han Arkipo, ka kito yadi hyami, idwag fagomon iglaban has dwat. 3Ham nangos fag domog kitay is Diyos intam Ama, hanggan is Kiristo Hisos kagfon intam, mahoway ha hayo, hanggan igfalokmay hayo manga fangayofan. 4Nyawa ginahin aho nogdarangin kawa ha hyamo, Filimon, hogfasalamat fagaba hangko Diyos. 5Maskin ta nafadahit hangko kitay, haw igsyag han Hisos kagfon intam, hanggan haw galwasi hanya hanggan fagayo fag manga taw kantohoyan ha hanya. 6Hogdarangin yadi kitay, ham nogfadog has taw kitay ham igsyag han Kiristo Hisos, tam fagayo fag labi man tomwa wagdog kitay, kafiyaon intam fagbayaon, kawa tam insadi san Kiristo. 7Fadwasay Filimon, hogbaya wa dahol igdog, hanggan inhoway yangko fangayofan, ta nogfadahit kitay, kawa haw mahoway has manga taw kantohoyan han Diyos, ista manga fangayofan inrigon ya. 8Kati aho nangos ha fagsagadon. No kitay di, fiya di aho nogfwayong hyamo kitay, haw fag katanog angko fagsagadon kawa han Kiristo. 9Dapat ay, kawa ho galwasi hyamo, fiya man aho no kampang mayan mayan ha hyamo nogfadog angko sagadon. Ho kampang mayan kitonya, nyawa ahos Pablo in Kiristo Hisos nasogo, hanggan kati ahon poriso kawa ha hanya. 10Kangko fagfwayongon ha hyamo kawas Onisimo. Is Onisimo bilang wangko anak san Kiristo, kawa aho nafatiwala hanya istay, aho no maporisowan. 11Hyabi hadwa ha fakinabang gi hanya, dapat kati aban, dahol intam fakinabang gi hanya, tam dowa. 12Kati hogfaoli ya in Onisimo ha hyamo. Angko fangayofan bilang yadi wantahin hanya. 13No kitay di, ho kasaya yapdi ongay, is Onisimo fag sa yapdingko akbang, kaarakitay bilang yadi wa haw kagtogbong angko, no baliday aho no maporisowan yapdi, kawa hyabi hogfahaskat ka Fiya fag Barita. 14Dapat hodwa kasaya gibolon kitonya haw nodwag faangay, kaarakitay bohonwa pilitan, dapat im sadili wa kafangayofanan haw nogtogbong angko. 15Ngatay itfagonan, is Onisimo idwas nyamo hyamo sadik ngalay, kaarakitay hanya nomfwali ya ha hyamo, hanya domogayan hanggan wa aban aban. 16Kati bilang wad bohonwam nasali sogowan, dapat hyamo fagalwasiyon fag fadwasay. No kitay di, ho kawili wa dahol in Onisimo, dapat haw labi man kawili hanya. Kati inbali yadi wam fadwasay santam Fon, bohondi kitay hyamo nasali sogowan. 17Yakanga, haw no gayfan kitay aho hyamo kapariho igsyag in Diyos, ha tanggapan yan Onisimo, kito yadi haw nangos nogtanggap angko. 18Is Onisimo no ha naibolon dwat ha hyamo hyabi, ngatay ha bayadan, fag gingko haw nogsohot. 19Aho ka nasorat istay. Ahos Pablo ka bomayad hyamo. No kitay di, hodwag lwang kawa haw bilang wa ha bayadan angko, kawa gingko nabarita ha hyamo, haw ha haboyagan wan. 20Kati, fadwasay, bilang ganti tonya, haw nangos faangayan angko fagsagadon, kawa tam insadi hasagfon intam. Aho fag bomaya wagdog nangos hyamo sagot kawa tam dowasay han Kiristo. 21Angko fangayofan ha ngan wa faanod kangko faglwangon istay fag sorat, hanggan bohondi kitonyak fiya. 22Ha nangos fag fatalaga yadingko bato hadasogan, maskin hogsyag wa kitay ahom fwali ya has nyamo hayo, kito ka hayo fagdaranginon, non Diyos wa kafangayofanan. 23Is Ifras kangko ofod kanporiso yadi kawa han Kiristo Hisos, gwas hyamo, Filimon. 24Kitonya yadi da Markos da Aristarko, da Dimas da Lokas, angko manga ofod yadi fangibolon, gwas yadi hyamo. 25Ham nangos fag domog kitay is Kiristo Hisos kagfon intam mahoway ha hayo fagayo.

will be added

X\