FILIPOS 4

1Maskin ngay, angko manga fadwasay kafiyaon, ham nogtohod angko togon fagayo ha hayo, hayo manga fangayofan kansadi santam Fon, fag imganit wan. Ham angko wa fakabaloon, ho galwasi wa dahol hayo. Ham angko fagbayaon, hogfasayagdog has manga taw hayo manga ogali. 2Ham da Iyodiya da Sintiki, hogfaaronganon ha hayo, gwadi ham fag gamigosan wan, kawa ham myasa wansadi santam Fon. 3Hanggan wa haw, angko ofod fangibolon kafiyaon, hogfwayong yadi ha hyamo, ha nangos togbongan to fag dowak ina, kaarakitay tadwa ha fagbotangon ha sadi ha sadi, maskin hyabi ta naofod inda Kiliminti, naibolon mahogod no natogbong angkog fahaskat ka Fiya fag Barita. Tonya fagayo angko manga ofod fangibolon, it manga ngayan insorat san Diyos listahan kat nadisag haboyagan bago. 4Tam fag kasolong fagaba kawa tam insadi santam Fon. Ho golit ya hayo, tam fag kasolong wan. 5Fag mahoway intam ogali has fagayo fag manga taw. Kagfon intam kaakbang wan. 6Tam fag idwa galibitan nyawa kana fag bagay, dapat, fag darangin, fag baya yadin Diyos tam nogsagad ka manga korang santam. 7Ginya madi in Diyos kahowayan, kagsagaya intam nagdogan hyabi, ka omano intam manga fangayofan hanggan isip kansadi san Kiristo Hisos. 8Angko katabowanan fag manga togon kito, angko manga fadwasay, tam fag fili intam fagayfanon. Fag ka lamang ka orongan, ka fiya, hanggar maslong kantam fagayfanon, ka manga maliyaw, magalang, kadwa ha aktom dwat, ka fiya fagbayaon, hanggan ka tam idwa kayag fadog has taw fag tonya lamang kantam fagayfanon. 9Sadi ya, ka hayo natohodan angko manga togon, hanggan hayo lagan fagtoladon gingko manga hampan hanggan manga ogali, fag tonya wa ka hayo fagogaliyon fagaba. Ginya madi Diyos kagfon kahowayan sawa hayo fagaba. 10Kawa ahon sadi santam Fon, hogbaya wa dahol kitay sadi ya ginan ham nalag hayo halimbawan kaarakitay falag angko hayo kahowayan. Angko bato lwangon, bonwa kitay ham idwa mahoway angko fagaba, kakitay dogay ogbot ham idyag lag hayo halimbawan falag angko hayo kahowayan. 11Bonwa yadi kitay ho kalonos maskin hoglwang kitonya. Hodwag manaw, honyayom wan, nyawa dahoday sangko, fiya wan. 12Ho ha nadalanan yadi wan, nyawa korang, nyawag labi angko fakasayaon. Honyayom di nyawa kinday, hodwag manaw. Nyawa siday aho, nomtoon napsog, nomtoon kalonos, nomtoon angko kwarta iglabi angko fakasayaon, nomtoon korang di. 13Is Kiristo kagfarigon angko fagaba, yakanga ho syagan digfadagos nyawa kana kangko lagan. 14Nyawa hoglwang kitonya, hogbaya wa dahol hayo kawa ham natogbong angko, aho no ha mahori. 15Ham manga taga Filipos, ham fadi wadtwa kitay, aho no nalahaw gis sakop Masidonya hyabi, aho no fagabag toltol ka Fiya fag Barita sa hayo ligongan, ham lamang fag Tifonan ka naisip ka manga gastoson hanggan tanggapon kwarta. 16Hyabi, aho no sas banwa Tisalonika, bondi sadi ginan ham nafadiya angko hayo kwarta, no korang angko sadili. 17Bonwa kitay ho kasayag tanggap fagaba hayo manga disag. Kangko fakasayaon hayo nabotang san Diyos faglagan, fag kaaywan. 18Toy wa toy fag sorat kati hogfatohoyan ha hayo kitay ho natanggap hayo disag fagayo, iglabi angko fakasayaon. Hodwa ha korang kati, maskin is Ifapradito natibo angko hayo manga disag fagayo, bilang sadik disag banglo han Diyos, kitos sinogba, maangay hanya hanggan it fagbayaon. 19Hanggan angko Diyos fahosto ha hayo ka hayo manga kakorangan fagayo, git kaakwaan kadwa twa haminon, gin Kiristo Hisos. 20Tam fag fasayagdog intam Diyos kantam Ama hanggan aban aban. Fag kitonya wa ngay. 21Ho gwas hayo, igsadig sadi, ka mangan tohoyan han Diyos, ka mangan sadi san Kiristo Hisos. Intam manga fadwasay istay gwas yadi hayo. 22In Diyos fag manga taw fagayo istay, labi man ka manga gibolon sasta Gorangon fag Sisar balay, gwas yadi hayo. 23Ham nangos fag domog kitay, is Kiristo Hisos kagfon intam fagaba mahoway ha hayo fagayo.

will be added

X\