FILIPOS 2

1Maskin tam insadi san Kiristo, marigon intam manga fangayofan, hanggan tam idwa galabawan, maskin is Kiristo galwasi intam. Tam gamigosan han Kiristo Falad, hanggan tam mahoway ya, kaawa ya ha sadi ha sadi. 2Maskin kitonya, gwadi ham fagfasolong wa dahol dahol igdog angko. Ham fag kasadi, fag gadgalwasiyan, fag sadi di hayo fangayofan. 3Nyawa kana, tam fag idwa kasaya intam sadili odi fakinabang, ngatay kasaya odig fatakas taw. Yatokitay, tam fag fasodsolonan wan, fag gisip kitay iba taw ka fiya man intam. 4Fag bohondi hantam sadili fakasayaon tam nogligaw halimbawan, fag hanggan has tiba taw. 5Intam fangayofan fag libaba, kito yadin Kiristo Hisos, 6Gi yapdis hyabi hyabi, is Kiristo Hisos Diyos yadi wan. Nyawa kitonya, hanyadwag pilit kitay it kangayanan fagsohod yadin Diyos kangayanan fagaba. 7Yatokitay, hanya naobon yapdit kangayanan, natikis wa nafabalit sadili kito odis sogowan. Hanyan bali taw, kito yadin tam, pariho has iba taw no kalag di. 8Hanya natikis wa nafalibabat kangayanan, inbali wa matanogon, hanggan wa has kahatayan, ala ngay, hanggan wat kahatayan sas nafatimbangan hayo. 9Yakanga yabay, is Diyos nafaabwat in Hisos kangayanan abwat man has fagayo fagayo, idwa ha abwat man inya. Nafabali yadin Hisos ngayan mahalga man has iba ngayan fagayo fagayo, 10Kaarakitay fagayo fagayo ka san Diyos banwanan sam tongod, hanggan ka sas baba daga, hanggan ka sas Daga Salad, Manlibabaan hanggan gomalang in Hisos. 11Ginya fagayo fagayo lomwang kitay, Is Kiristo Hisos kagfon intam fagayo fagayo, kaarakitay mamasayagdog in Diyos intam Ama. 12Maskin ngay, angko manga fakilalaon fiya fiya, kawa ham fagabag talinga angko, aho no gofod hayo hyabi, kati labi man ham fag talinga yapdingko fwayong, nyawa ahodwas nyamo hayo. Tam fag kadalag sway in Diyos, kafang gogali kadwa maangay ha hanya, hanggan katanog fagabat fwayong. No kitonya tam igfalag kitay, tam in Diyos nabawi fag manga taw, 13maskin is Diyos ka gibolon fagaba santam manga fangayofan, kaarakitay tam kasaya katanog hanggan syagan katanog it fakasayaon. 14Nyawa kana fag bagay, tam fag idwag sarogatan, fag idwag daraogan, 15kaarakitay manga taw idwa ha fabangdanan intam, sonson wa fiya intam ogali, kito ka maangay han Diyos manga anak kafiyaon, kagbanwanan istay sas baba daga sas fagbokngan fakaaywanan manga taw madayaon, kadwag fagomon gogali dwat. 16Tam nogfadog has taw ka barita kagfaboyag intam, intam ogali fag yawa fiya fiya sasta fagbokngan, kitos fanggasan kagyawa sam tongod no yabi. Hayo ogali no kitonya, ho bomaya wa hayo aban san Kiristo kabangkadan fag sirang, maskin giwa hayo ogali imlag wa kitay, kangko naibolon hanggan syagan yapdi, bonwa fagfaanogonon. 17Ham nogsyag in Kiristo, tonya ka hayo disag han Diyos. Twa man, ngatay ta fahatay angko aban, ginya madi angko folot nomwatwat, bilang wagdogang ha hayo disag han Diyos. No kitonya kam-anod, ho bomaya wan, hanggan hogfasolong yadigdog hayo fagayo. 18Ham fag kitonya yadi, ham fag baya wan, fag fasolong yadigdog angko. 19Is Hisos, kagfon intam nogfaangay, idya dogay aban, ho somogo nangos in Timotiyo has nyamo hayo, kaarakitay angko fangayofan imrigon ya, maskin ho kasaya domog no kinday ham is nyamo. 20Is Timotiyo sadi di ka ha fangayofan kitongko kitay, gafalo wa dahol hayo. 21Tibak taw fagayo kalibang odit sadili manga fakasayaon, bonwan Kiristo ibolon it fagisipon. 22Dapat ham fadi wadtwa in Timotiyo ogali kawa gofod angko, kitos anak no koyog it ama, mi nogtarogbongan gibolon kaarakitay manga taw domog ka Fiya fag Barita. 23Maskin ngay, hanya kangko sogoon has nyamo hayo, aho no domog no kinday kasta ibolonon hangko istay. 24Hogsyag yadi marigon hantam Fon kitay, ngalay wa aban aho wa nangos kambangkad has nyamo hayo. 25Ho naayfan kitay aho fag somogo ha hayo intam fadwasay is Ifapradito. Hanya ka hayo nasogo natogbong angko istay, angko yadi ofod fangibolon, hanggan fanlaban, mi nogfaaronganon has taw kitay, in Diyos Fiya fag Barita ka fakaoronganan. 26Is Ifapradito galwad hayo fagayo, hanggan inrongkot it fangayofan kawa ham nadog kitay hanya ha fagdogon. 27Orongan wansagit itfagonan, ganong wa natay. Dapat is Diyos in-awa hanya, hanggan bondis Ifapradito in Diyos fakaawaon, hanggan wa aho, is Diyos in-awa yadingko kaarakitay idwam abagat angko karongkotan. 28Maskin ngay ho kasayag faoli hanya has nyamo hayo kaarakitay ham igbaya waglag hanya, ginya madi angko karongkotan kawas Ifapradito nonsagit, imliyam wa balinya. 29Hanya no mwali has nyamo hayo, tanggapan ya hanya fiya fiya, fag baya hanya kawa hanya intam wa fadwasay santam Fon. Fag magalang has fagayo fag manga taw ka ha fangayofan kiton Ifapradito, 30maskin hanya ganong wa natay kaarakitay omibolon in Kiristo ibolon. Hanya naibolon kitonya kaarakitay manogbong angko nyawad bohonwa ham, kawa ham idwa syagan igtogbong angko gis nyamo.

will be added

X\