MATIYO 8

1Is Hisos nondasog has lwad gis baba moyod, aywan fag manga taw naoyan hanya. 2Yakanga sadik taw ha sagit kitong naakbang hanya, nanlingkohodan sat atobangan, iglwang, Ama, haw no kasaya di, haw fadi wad somyagan igfafiya angko sagit. 3Is Hisos natawid hanya, ginyag lwang, Ho kasaya ngay, haw fag imfiya wan. Ginya madit kitong dagos wanfiya. 4Is Hisos natogon ha hanya kitay, Hawag fwayong nyawa haday fag manga taw, dapat fag hayap has fagalan-han-Diyos, fabantayan hanya im habilogan. Ginya madi ha disagan kan Mwisis natogon bato disagon bilang faorongan has taw kitay haw infiya wan. 5Is Hisos no hawas basad banwa Kapirnaom, sadik fagtahinan sondalo taga Roma naakbang hanya, nalwang, 6Ama, angko sogowan idwa syagan kimot. Hanya sinya dik maigyanan sa hyami balay, kahori wa dahol dahol it sagit. 7Is Hisos iglwang, Tam hanya wan, ho fafiya hanya. 8Dapat ka fagtahinan sondalo nasagot, Ama, ho kaya wa hyamo, nyawa hadwam dasog hangko balay. Haw fag lomwang lamang kitay, angko sogowan fag imfiya, ginya madi im-anod wan. 9Kawa aho sadi yadik taw kagfasakop has manga abwat fag kangayanan, dapat ay, aho ha fagsogoon yadi manga sondalo. Aho noglwang ha sadi, Ha fag hanya wan, yakanga hanyan tanog wan. Aho noglwang ha sadi ya, Haw fag hastay, hanyam bangkad wan. Aho noglwang hangko nasali sogowan, Haw fag gibolon to, hanya omibolon wa tonya. 10Is Hisos no nadog it hampang, indolaw wan, nafwayong has manga taw ka goyan hanya kitay, Hogfadog ha hayo, hodya ha donggon no kitay iba taw kitonya wa kagsyag angko marigon, nyawa sawan Israil manga hasokfonan. 11Ho danwag fatagak hayo kitay, aywan kambangkad aban gis salogan myanit hanggan sangdayan myanit baliwa, manayowan san da Abraham da Isaak da Hakob, san Diyos sakop fanganan sat banwanan sam tongod. 12Dapat aywan in Israil sakop fag manga hasokfonan im-okas lamang has basad marom sas sokayan, sinya ta mangodgorawan wan hanggan wasta ngifon di mangarigitan wan. 13Ginyas Hisos nalwang has fagtahinan sondalo, Nyawa ha goli wa kati, maskin hagsyag wa fiya fiya angko, im-anod wan kam fagsagadon gingko. Gis nanya yadi fag masohod ka fagtahinan sondalo sogowan nonfiyat sagit. 14Is Hisos nonsakbaw san Pidro basad balay, nalag in Pidro nogang ina sinya, maigyanan kagnaw. 15Is Hisos natawid ka ina it gamat. It hagnaw dagos wanfiya, ginya ka ina inbangon, ogali man di, igtogbong in Hisos. 16Ginya madi araw no kayabi wan, ka manga taw nataban han Hisos aywan ka ha manga labang igfahoriyan is taw. Sadi lamang ik hampang is Hisos nafaalin ka manga labang, nafafiya yadi fagayo ka ha manga fagdogon. 17Is Hisos naibolon kitonya kaarakitay in Isayas, in Diyos fangampang fwayong im-anod wan, noglwang kiti, Hanya nabol intam manga kagomowan, Nadiya yadintam manga fagdogon. 18Is Hisos noglag kaaywanon ka manga taw sat ligongan, hanya nasogo hat manga ofod kitay, tam ara domifay wa has difay linaw. 19Araw araw ogbot, sadi kagfaadal ka Batasan Hodyo naakbang han Hisos nalwang, Haw kagfaadal, ho tomahin yadi wa hyamo, nyawa ha hadawan. 20Is Hisos nasagot hanya, Ka manga ido maisog ha oliyanan basad lohib, ka manga manok ha fogad yap man, dapat ay, aho, Kanbali Taw, idwa ha toyogan, idwa ha fahowayan. 21In Hisos katogbong sadi iglwang, Angko Fon, ha faoliyan yap dingko, ho manlobgob yap angko ama. 22Dapat is Hisos nafwayong hanya, Ha tahinan wangko, fabayaanan yapdi ka manga mahatayan, ta bahala waglobgob it sadili kapariho ka natay. 23Araw is Hisos no nasahay was baloto, it manga katogbong natahin yadi wan. 24Yabay araw nabagyo dahol dahol baba danom, taob di godgoyanan wan myasa wa dahol sas baba linaw, ka odi kitay idyag tabon ka baloto. Dapat gis nanya is Hisos matoyogan di. 25Yakangat manga katogbong hawan Hisos, nafolaw hanya. Taglwang, Hyami Fon, hyami Fon, kalibang kalibang, togbongan hyami, tam kalogom wan ha daga danom. 26Ginyas Hisos iglwang, Kana mayon ham no kadala? Yabay ham idwa bangan igsyag angko. Ginyas Hisos inbangon wan, nangabaya ka bagyo hanggan taob. Yakangan tohas ya ngawan ka danom, inhalyaw ya fiya fiya. 27Yakanga ta fagayo indolaw waglag, taglwang, Kana wa to fag taw? Nyawa bagyo, manga dagat, katanog it fwayong. 28Da Hisos nondasog sas difay sas banwanan manga taga Gadara, ha dowak ama gis manga lohib fanlobgobanan taw natagbo in Hisos. Ka dowak ama ha manga labang kagfahoriyan hanya, maisog ya ngadi, yakanga ka manga taw kadala wagdalan sinya. 29Ginya madi ka dowak ama ha labang, dagos wa narokyaw, iglwang han Hisos, Haw in Diyos wa Anak, haw fag idwag mawat hyami. Haw awkin inbangkad hastay kaarakitay igfahoriyan hyami nyawa idyapdin dasog gis nanya hyami fadosaan? 30Idwa ayayo bangan ginya ha sadik tifonan baboy ayo ayo, kwan manga lamnon. 31Ka manga labang igsagad in Hisos kiti, Haw nogfaalin hyami gis taw, faangayan nangos hyami, sogowan wa hyami has nwa fag manga baboy ayo ayo. 32Is Hisos iglwang, Sogi, ham fag hanya wan. Yakanga ka manga labang nalin wa gis taw, hawas basad manga baboy. Ginya ka manga baboy dagos wa nandalandanan madali has lwad indahodan has basad linaw dahol, fagayo inlimos wan. 33Ka manga gano tifonan baboy nalagyo wan hawas banwa, nafadog has taw fagayo kat lagan hanggan no kinday ka manga ama ka ha labang haraw. 34Yakanga ka manga taga banwa, sadi wak kayonya manga taw, nagobok in Hisos. Ta no nalag hanya, ta garonganon igsogo hanya gista banwanan.

will be added

X\