MATIYO 7

1Ham fag idwa gato fagaba hayo kapariho kaarakitay is Diyos idwa yadi gato hayo. 2Maskin no kinday ham no gato is taw, kitonya yadi is Diyos no gato hayo. No kinday hayo gantangan has taw, kitonya yadi is Diyos no gomantang ha hayo. 3Kana mayon haw nogbantay ka rokrok sam fadwasay basad mata, dapat hagfabayaan ka sa hyamo sadili mata bilang wa dahos batang? 4Kinda araw haw no lomwang ha hyamo fadwasay, ho nangos bomol ka rokrok gi hyamo mata, dapat sa hyamo, ya manghara, ha akwa yadi daho was batang? 5Hagfataka odi, gwadi bol yap ka daho was batang ka sa hyamo sadili mata, ha bago di lomag fiya fiya, ginya madi ha tomwa bomol ka rokrok gim fadwasay mata. 6Ham fag idwag disag has ido ka manga bagay kantohoyan han Diyos, ngandayo ka ido bomantay araw, ngomarngar ha hyamo. Ham fag idwa gokas has baboy hayo ono bolawan, ngandayo lomid odi tonya. 7Ham fag sagad, ginya ham tomanggap hayo fagsagadon. Ham fag sayak a, ham lomag wa ka hayo fagsayahon. Ham fag sagam gi dayo balay, ginya ta fasakbaw hayo. 8Maskin fagayo kagsagad tomanggap wa kat fagsagadon, fagayo kagsayak lomag wa kat fagsayahon, hanggan fagayo kagsagam gi dayo balay, ta fasakbaw wan. 9No tinapay ka hayo anak fagsagadon, ham awkin domisag bato? 10No oyang man kat fagsagadon, ham awkin domisag abyanon? 11Gwadi no ham, nyawa kitay hayo manga ogali idwa fiya, ham idwag disag ha hayo manga anak kadwa fiya hanon, idwa awkin bohondi kitonyak mahoway hayo Ama ka sat banwanan sam tongod? Fiya fag manga bagay kat fagdisagon has mangag sagad gi hanya. 12No kinday hayo fakasayaon ista ogaliyon ha hayo, ham fag gogali yadi kitonya ha hayo manga kapariho. Kitonya yadi ka Batasan Hodyo it manga kahologan hanggan in Diyos manga fangampang adal hantam. 13Ham fag danwag sakbaw has ogbot fag sakbawan alad, maskin dahol ka sakbawan hanggan gorangon ka dalan ka hawas kadwatan, aywan kaglahaw hanya. 14Dapat ay, ogbot ka sakbawan, mahori yadi ka dalan ka hadasogan has haboyagan, hanggan sayok di kaglag ka ogbot fag dalan. 15Ham fag matagahan ka manga bohagon fag manga fangampang. Magop wan no kalag di, ta nombangkad ha hayo, bilang manga topa, dapat ka orongan sasta basad fangayofan kitos ido maisog gi basad talon. 16Ham lomag wat manga ogali no kinday. Tam awkin igfangta bohad obas gis lamnon madogi, ngatay bohad igos gis fon haya-haya, ham gayfan? 17Ka fon hayo no fiya, igbohad yadi fiya, dapat ka fon hayo no dwat mandi, igbohad mandi dwat. 18Maskin ka fiya fag fon hayo idwa somyagan bomohad dwat, kitonya yadi ka dwat fag fon hayo idwa somyagan bomohad fiya. 19Fagayo fag fon hayo kadwag bohad fiya, ta omobang lamang a, somonog wan. 20Yakanga ham homilala ka manga bohagon fag manga fangampang git manga bohad ogali. 21Idwa fagayo kagngayan angko, Angko Fon, ka somakbaw han Diyos banwanan fag sakop sam tongod aban, dapat ka katanog lamang angko Ama sas tongod it kafangayofanan ka somakbaw sinya. 22Ka mahalga fag Sirang nomdasog aban, aywan ka lomwang hangko, Hyami Fon, gwadi mi namaadal yadi has taw im hampang, mi nafalagyo yadi ka manga labang, mi naibolon yadi manga madolaw sa hyamo ngayan karigonan. 23Dapat ho lomwang has taw, Nyawa ginahin hodwa nahilala hayo. Ham fag ayayo gingko, ham ka manga gogali dwat fagaba. 24Yakanga fagayo kagtalinga angko manga hampang to, hanggan katanog, kito yadi ka sadik taw madonong, ka nahalig it balay sas baba bato. 25Nahwayan dahol, nabaha ya ngadi, nabagyo yadi marigon, nabakbak ka balay, dapat ay, ka balay idwa nakfo maskin in-ganit sas baba bato. 26Dapat ay, fagayo fag manga taw kagtalinga angko manga hampang dapat idwa katanog, kito sadik taw, bilang odig bongol, kalig it balay basad odi onay. 27Nahwayan dahol, nabaha ya ngadi, nabagyo yadi marigon, nabakbak ka balay. Ka balay nakfo lamang, insarowayan wan. 28Is Hisos nontabo wagtoltol kitonya, ka manga taw indolaw it manga fwayong, 29maskin is Hisos nogfaadal matohoyanan wan, kitos sadik taw ha kangayanan, idwa kito ka mangag faadal Batasan Hodyo.

will be added

X\