MATIYO 6

1Ham fag matohodan kitay ham no gogali fiya, fag bohonwa kitay famalagon odis taw. No famalagon odis taw, ham idwa ha tanggapon fasalamat gi hayo Ama ka sat banwanan sam tongod. 2Yakanga, haw no kasayag disag has myabog, haw fag idwa gawang has fakaaywanan, kito kasta ogali ka manga ha takan nogfadog sas fanimbaan, hanggan sayo basad karsada. Kitonya ista ogali kaarakitay manga taw mamasayag dog ha hanya. Hogfwayong hayo ta natanggap wat fasalamat. 3Dapat haw nogdisag has myabog, sakwag fadog nyawa kawa kam fakilalaon fiya fiya, 4kaarakitay bohonwa famalagon odis taw haw nogdisag has myabog. Ginya madi hyamo Ama kaglag hyamo ogali fiya, haw no nadisag kitonya, domisag fasalamat ha hyamo. 5Ham nogdarangin, ham fag idwag sokfon ka ogali manga ha takan. Ta nogdarangin, ista fakasayaon, ta fag malindogan sas fanimbaan, ngatay sas basad fagsalahan karsada, maskin famalagon odis taw. Hogfwayong hayo ta natanggap it fasalamat. 6Dapat haw nogdarangin, haw fag sakbaw ham basad balay, fag tahop wan. Ginya madi haw fag darangin ha hyamo Ama kaglag hyamo, nyawa hadyapdi nalag hanya, ginya hyamo Ama domisag yadi ha hyamo fasalamat, kawa fiya kam naogali nogdarangin, bohonwa famalagon odis taw. 7Ham nogdarangin ham fag idwag faaywanon hampang kito kasta ogali manga Hintil. Ta gayfan kitay ista fagsyagon domog wan kawasta hampang kaaywanon. 8Ham fag idwag sokfon is taw kitonya. Maskin ham nodyag sagad gi hayo Ama, hanya danwa twa no kana ka hayo kakorangan. 9Yakanga fag kiti ham nogdarangin, Hyami Ama ka sawam banwanan sas tongod, Hyamo ngayan bohonwa fagswayon. 10Haw fag kabali hari, kagsakop has fagayo. Im kafangayofanan fag kaanod fagaba istay is baba daga, no kinday no fagaba kaanod sam banwanan sam tongod. 11Disagan nangos ha hyami hyami fanganon ka homosto tangona fag sirang. 12Haw fag faliyam hyami manga naogali dwat, no kinday hami nogfaliyam ista naogali dwat ha hyami. 13Fag idwag faakbang hyami has manga dwat kaarakitay igsolay hyami, Dapat bawiyan hyami gin Satanas. (Maskin haw wa ka Hari kagsakop fagayo, haw kadwa ha bosal, sawa hyamo yadi ka kafiyan, nyawa ginahin. Fag kitonya wa ngay.) 14Maskin ham nogfaliyam ista manga naogali dwat ha hayo, hayo Ama sat banwanan sam tongod, mamaliyam yadi hayo manga ogali dwat. 15Dapat ham nogbotang yapdi ista manga naogali dwat ha hayo, hayo Ama idwa yadi faliyam hayo manga naogali dwat. 16Ham nodwa kwan hanon kaarakitay mandarangin, ham fag idwag falagon kitay ham roko-roko kito ka manga taw kagfalagon odis taw. Tadwag fafiyanon it habilogan kaarakitay manga taw tomwa kitay tadwa kwan hanon gis nanya fag masohod. Hogfwayong ha hayo ta natanggap it fasalamat. 17Nyawa haw idwag yafon, idwag yabas kaarakitay mandarangin, haw fag fafiyanon im habilogan, im bok fag masorodan di, fag yamos yap im mata, 18kaarakitay manga taw idwa kadolaw kitay hadwa kwan hanon. Im Ama kaglag hyamo, nyawa hadyapdi nalag hanya, hanya lamang ka nalag kitay haw gibolon kitonya, gogali fiya, bohonwa famalagon odis taw, hanya ka domisag fasalamat ha hyamo. 19Ham fag idwag tifon kaakwaan istay sas baba daga, maskin ha manga tipakong kagat, ha manga aningga kwan yadi, ha akwa yadi manga fangnahaw igsakbaw. 20Ka fiya, ham nogtifon hayo kaakwaan, fag san Diyos banwanan sam tongod, maskin sinya idwa ha tipakong homagat, idwa yadi ha aningga, idwa yadi ha fangnahaw igsakbaw. 21Maskin no sidak mabotangan hayo kaakwaan, hayo fangayofan sinya yadi wak maisipan fagaba. 22Ka mata ka bilang wa salong sas haboyagan. Yakanga im mata no fiya, igfayawam haboyagan sadi wak dahonya. 23Dapat im mata no dwat, im haboyagan sadik dahonya inbali yadi wa marom. Yakanga ka yawa sa hyamo no marom mangharaw, marom wa dahol dahol tonya. 24Idwa ha taw syagan igfasohodan katanog has dowa kagsogo hanya. Matohoyanan ha fagfiliyon, ngatay kawilit fon sadi, ngatay kadwat iglag kat fadowa, ngatay katanog fiya fiya ka sadi, dapat igfasigpala wa kat fadowa. Ham idwa syagan katanog in Diyos hanggan has kaakwaan igsohodan. 25Yakanga hogfwayong ha hayo, ham fag idwa galibitan hayo fanganon hanggan inomon kaarakitay ham imboyag, ngatay hayo rotay bato solongon. Idwa awkin ka haboyagan bohondi kitos fanganon no mahalga, ham gayfan, hanggan ka habilogan bohondi kitos rotay? 26Fanlag ngay, ham bantayan ka manga manok, idwag famgas, idwa yadi gani, idwa yadi ha tifon basad dongdong, dapat ay nyawa kitonya, hayo Ama sat banwanan sam tongod kagfahwan di ka manga manok. Gwadi ham bohondi kitos manga manok ik mahalga. 27Fakta fag taw sa hayo syagan igfadogay it haboyagan sas baba daga, ngadi sadik tama sinyahod kawa no galibitan, ham gayfan? 28Kana ham no galibitan hayo solong rotay? Yabay ka manga borahan igborak basad talon, gwadi tonya idwag bonang, idwa yadi kalig rotay. 29Dapat hogfwayong hayo, nyawas Salomon igsolong it rotay fiya man has fagayo, ka sadik borahan fiya man inyak kabantay, idwa ha matoga. 30Is Diyos no bilang wagfasolong rotay kafiyaon kabantay has manga lamnon, ka kati malangba basad talon, dapat ay, no marom ngandayo imsonog lamang, idwa awkin labi man is Diyos wa ka farotay hayo? Laya ogbot yapdi ham nogsyag hanya. 31Yakanga ham fag idwa galibitan hayo fanganon, hayo inomon, hayo manga solongon rotay. 32Maskin tonya fag manga bagay ka manga Hintil fagalibiton. Hayo Ama sat banwanan sam tongod fadi wadtwa kitay korang yadi sa hayo ham nodwa ha akwa tonya fag manga bagay. 33Bago bago ham fag fasakop fiya fiya han Diyos hanggan fag katanog it manga fwayong, ginya madi ham tomanggap yadi tonya fag manga bagay fagayo. 34Yakanga ham fag idwa galibitan ka manga bagay ka bago marom. Nomdasog sa sadik bago marom, gis nanya yabay, bago mangisip kitay kinda odi kati. Sa sadik sirang it fagisipon hosto wan.

will be added

X\