MATIYO 5

1Is Hisos noglag manga taw bilang wa tigasaw it kaaywanan, is Hisos hawas baba moyod. Is Hisos no natokaw sinya, it manga katogbong naakbang yadi hanya, 2ginyas Hisos nafaadal has taw kiti, 3Ka mangadwa ha takan bomaya wan, maskin in Diyos sakop is taw wan. 4Ka ha karongkotan bomaya wan, kawas Diyos igfalibang ista fangayofan. 5Ka manga mahoway bomaya wan, maskin ta omafo in Diyos natogon fagayo. 6Ka manga gwayan wa kasaya katanog in Diyos fakasayaon, bomaya yadi wan, maskin im-anod wa kasta fakasayaon. 7Ka manga maawaon bomaya wan, maskin is Diyos im-awa yadis taw. 8Ka manga maliyaw it fangayofan bomaya yadi wan, maskin ta lomag in Diyos. 9Ka mangag faamigosan ya has manga gawayan bomaya wan, maskin is Diyos lomwang kitay tonya fag manga taw it manga wa anak. 10Kasta manga fagfahoriyon kawa ta no katanog in Diyos kafangayofanan bomaya wan, maskin ta omofod in Diyos san Diyos sakop aban. 11Manga taw nogyod hayo, mangag fahoriyan hanggan igfadwat odig dog hayo, maskin aho ka hayo fagalwasiyon, ista manga hampang dwat sonson wa bohag, idwa ha fakaanodan, ham bomaya wan. 12Fag masolong di hayo fangayofan, fag idwa kabalaw, kawa dahol hayo tanggapon fasalamat aban san Diyos banwanan sam tongod. Kitonya yadi kasta naibolon hyabi ta nogfahoriyan in Diyos manga fangampang ka nagona hayo. 13Ham bilang wa asin istay is baba daga. Dapat ka tamis nonbol wan gis asin, kinda odi nogfatamis ya ka asin, ham gayfan? Fawa ha fakinabang tonya fag asin, ta omokas odi, manga taw lomid lamang. 14Ham bilang yadi wa salong istay is baba daga. Idwa ha syagan tomago sadik banwa, ka banwa no sas baba moyod. 15Idwa ha taw igsonog salong ginyag fwalid sas daga gantangan. Yatokitay, fag sawa ngap is salangan fiya fiya nogsalifit ka salong, kaarakitay yomawa has fagayo sadi wak dahonya basad balay. 16Ham fag kitonya yadi, ham fag fayawa yadi hayo salong sas faglagan manga taw, kaarakitay ta lomag hayo fiya fag ogali, ginya ta mamasayag dog yadi hayo Ama sat banwanan sam tongod kitay, hanya kafiyaon. 17Ham fag idwa gisip kitay honbangkad hastay kaarakitay iglaban ka manga Batasan Hodyo, hanggan in Diyos manga fangampang adal hyabi. Yatokitay, maskin honbangkad hastay kaarakitay ho fatonglos tonya fagayo. 18Ham fag matohodan kitay ka banwa sam tongod hanggan ka daga imliyam di aban, dapat ngadi ogbot ogbot fag bagay sas Batasan Hodyo idwam liyam it karigonan, tonya nodyan anod fagayo. 19Yakanga nyawa faktaw kagfabali idwa ha kahologan ngadi sadik ogbot fag bagay gis Batasan Hodyo, hanggan igfaadal has taw kitonya, is Diyos igfatimbang hanya libaba man has fagayo it kangayanan sat sakop sam tongod. Dapat ay, ka katanog ka manga Batasan Hodyo fagayo, hanggan igfaadal kitonya has taw, is Diyos iglwang kitay, abwat it kangayanan sat sakop sam tongod. 20Maskin hogfwayong hayo, no kito odi ka mangag faadal Batasan Hodyo hanggan manga Farisiyo ham no katanog in Diyos kafangayofanan, ham idwam aktom hat sakop sam tongod. 21Ham nadog kitay hyabi ta natogon has taw, Haw fag idwag fahatay taw. Nyawa faktaw nogfahatay taw, ka fangabaya mamatohoyan hanya has fadosaan. 22Dapat kati kangko fagfwayongon ha hayo, ngadi ka gisog it fadwasay, ka fangabaya fatohoyan hanya hat fadosa. Kagyod dit fadwasay, ka manga ha kangayanan Hodyo sasta Fanoltolan fatohoyan hanyat fadosa. Hanggan nyawa faktaw noglwang hat fadwasay, Paong paong haw, ngandayo imtohoyan has fadosaan manga taw sas afoy. 23Yakanga haw no ha diya fagdisagon fangafiyan han Diyos, dapat igtohod kitay im fadwasay ha fakahoriyon ha hyamo, 24obonan yap im disagon sas dayo fanogban. Ha fag hayap im fadwasay, haw famatohoyan yap hanya fiya fiya. Ginya ara ha fakafwali ya, fag bago domisag im disagon han Diyos. 25No hagsombong ha hyamo has fangabaya, famatohoyan yap hasagsombong, ha no somyagan di, haw nodya sas fagdogan fangabaya. Maskin haw nodwa syagan igfatohoyan, ta domiya wa ara hyamo has fangabaya. Ginya ka fangabaya ka domisag hyamo hasag bantay porisowan, ginya madi hamporiso wan. 26Hogfwayong hyamo hadwa malfas ginya aban, haw nodya nabayad hanggan wa kat kahaminan fag saga. 27Ham nadog kitay ta natogon has taw hyabi, Haw fag idwag fabayowan. 28Dapat kati hogfwayong ha hayo kitay, nyawa fakta fag ama kagbantay has ina, ha fangayofan wa kasaya hanya, sat fangayofan nafabayowan wa hanya fag ina. 29Nom mata kagtaban hyamo has ogali dwat, sowatan lamang im mata ginya okasan wan. Maskin im habilogan it baliw nomliyam, tonya fiya man has habilogan sadi wak dahonya nom hadasogan has fadosaan manga taw sas afoy. 30Nom gamat man kagtaban hyamo has ogali dwat, lifongan wam gamat, ginya okasan wan. Maskin im habilogan it baliw nomliyam, tonya fiya man has habilogan sadi wak dahonya, not hadasogan has fadosaan manga taw sas afoy. 31Ka Batasan Hodyo gin Mwisis nalwang yadi kitay, sadik ama no gobon it babay fag ha kasoratan kitay hanya nadayo wan. 32Dapat kati hogfwayong ha hayo, ka ama no gobon it babay, nyawat babay idwa ha nafabayowan, ginya kat babay omindogan iba ama, kawat indogan gona ka ha dwat, maskin igfangolo it babay hasagfabayowan baliwa. Hanggan nyawa fakta fag ama ka bomabay ista nagobonan fag ina, tonya fag ama igfabayowan yadi wan. 33Ham nadog yadi kitay ta natogon has manga taw hyabi hyabi, haw nogtangkod marigon kitay haw ha togon bato ibolonon, haw fag fatonglos kam natangkod san Diyos fagdogan. 34Dapat kati hogfwayong ha hayo, ham fag idwag faaywanon hampang ha no ha tangkod. Ham fag idwag lwang, In Diyos banwanan sam tongod fadi wadagdog angko hampang, maskin kat banwanan sam tongod in Diyos wa fanokawan gorangon. 35Fag idwa yadig tangkod wa kitay, Ka daga fadi wadagdog angko hampang, maskin ka daga in Diyos wa lidan bitis. Fag idwa yadig lwang kitay, Ka banwa Hirosalim fadi wadagdog angko hampang, maskin ka Hirosalim ka Dahol fag Gorangon it sadili banwa. 36Haw fag idwa yadig lwang Nyawa aho matay wan, maskin no kadi haw, hadwa syagan igfabanonan, mangag fahasding im bok alfoyo ngadi sadik ogat. 37Fiya wam fwayong, hawag dogang ya domwag, no ala, fag lwang ala wan, nodwan, fag lwang idwan. Maskin no ha dogang yat tangkod giwas kadwatan tonyat fagfonan. 38Ham nadog kasta fwayong kitay, No mata man di kasta nafadwat, ta fag gomanti, domwat mandi ista mata. No ngifon, ngifon mandi kasta fagfadwaton. 39Dapat kati hogfwayong ha hayo, ham fag idwag laban ka dwat fag taw. No hagtofa hyamo marigon balis sihon fag faringfing, fag hanggan wa ka balis wala. 40No hagsombong hyamo hasagtalinga hampangan kaarakitay igbolay im balokas, disagan yadi wa hanggan kam rotay ka aba aba. 41No hagfafasan hyamo it diya sadik liho, fasanan dowa man ik liho. 42Disagan hasagsagad gi hyamo, fag idwa kwangit ka manga goyam hyamo. 43Ham nadog kasta manga fwayong hyabi, Haw fag kaawa im manga fakilalaon dapat fag kaisog im manga kaaway. 44Dapat to yadi kangko fwayong, Ham fag kaawa hayo manga kaaway, ham fag darangin yadi kawa has mangag fahoriyan hayo, 45kaarakitay ham imbali hayo Ama manga anak orongan, hayo Ama ka sat banwanan sam tongod. Maskin hayo wa Ama ka sat banwanan sam tongod kagfasalog ka myanit has manga dwat fag manga taw hanggan has fiya. Hayo yadi wa Ama kagfahwayan has manga taw kantohoyan hanya, hanggan has manga taw ka kafang hanya. 46No ka lamang manga kaawa hayo, ka hayo fakaawaon, kana ka hayo fagfanayaon fasalamat aban, ham gayfan? Idwa awkin kitonya yadi kat ogali ka manga fanohot bohis? 47No ka odi hayo manga fadwasay ka hayo fakampangon mahoway, kana ka hayo ogali ka fiya man has taw? Ka manga Hintil, kadya kilala in Diyos, kampang mahoway no hadit manga fadwasay. 48Yakanga hayo manga ogali fag kabali fiya wa malayon, kito yadi ka hayo Ama sat banwanan sam tongod no fiya wa malayon.

will be added

X\