MATIYO 4

1Ginya madi ka Maliyaw fag Falad nataban in Hisos has basad fakahyabogan, kaarakitay is Fandaya somolay faloksowan hanya. 2Ofat ik safolok yabi hanggan ofat ik safolok sirang is Hisos idwa ha nahwan hanon, yakanga kalonos wa dahol. 3Is Fandaya kagsolay hanya nondasog, nalwang han Hisos, Haw non Diyos wa nga Anak, haw fabaliyan nangos tinapay to fag manga bato. 4Dapat is Hisos nasagot, Insorat kitay, Bohondi ka fanganon kagfaboyag manga taw, Dapat fagayo fag manga hampang gin Diyos bibig kagfaboyag manga taw. 5Ginya madis Fandaya nataban in Hisos has baba atop Fanimbaan-Dahol, abwat abwat sas Hirosalim, ka banwa kantohoyan han Diyos. 6Hanyag lwang han Hisos, Haw non Diyos wa nga Anak, fadagdagan nangos hyamo ham daga, is baba daga, maskin insorat kitay, Hanya tomogon it manga anghil kitay, ta fag omano hyamo, insorat yadi kitay Ta somambot di hyamo kaarakitay im bitis idwam iktan has bato. 7Is Hisos iglwang hanya, Insorat yadi kitay, Haw fag idwag tikis igsolay kagfon hyamo, hyamo Diyos. 8Ginya madi, sadi ya ginan is Fandaya nataban in Hisos ha baba fongso abwat abwat, sas fakabantayan, nafalag hanya ka manga gorangon sakop fagayo fagayo sadik dahonya baba daga, hanggan ista manga kaakwaan sinya. 9Is Fandayag lwang han Hisos, Haw no ha ngangkok manlibabaan hanggan somimba, ho domisag wa hyamo to fagayo fagayo hyamo lagan. 10Is Hisos nasogo in Fandaya, nalwang, Satanas, haw fag idwastay, haw fag lahaw wan, maskin insorat kitay, Fag is Diyos kagfon hyamo kam fagfasayaon igdog, Fag in Diyos lamang sogo kam fakatanogon. 11Ginyas Fandaya naobon in Hisos. Manga anghil inbangkad, natogbong hanya. 12Ginya madis Hisos nadog kitay ta nafaporiso in Hwan, yakanga nwali has sakop Galiliya, 13dapat nabanwanan sas banwa Kapirnaom, idwa sas banwa Nasarit. Ka banwa Kapirnaom sas gobang linaw dahol, linaw Galiliya, sas bahalan manga banwanan Sabolon hanggan Niptali. 14Yakangan Isayas, in Diyos fangampang fwayong in-anod wan, kitay, 15Ka banwanan Sabolon hanggan ka banwanan Niptali Has dagat baliwa sas difay Hordan, Ka bali Galiliya ka banwanan manga Hintil, 16Ka manga taw sinya fag manga banwanan Sawas basad fakaharoman hyabi, Dapat, no dogay wan, taglag yawa masilaw. Kati to fag yawa yomawa Has fagayo ka hyabi maayfanan odi daga gohom kahatayan. 17Ginya ginan is Hisos nafaadal has taw, iglwang kiti, Ham fag soyo wan hanggan obonan hayo manga ogali dwat, maskin ka gim tongod kaakbang wa kabali Gorangon. 18Ginya madi, aban ogbot, is Hisos nogdalan sas bahalan linaw dahol, tagngayan tonya fag linaw Dagat Galiliya, is Hisos nalag dowak ama, is Simon, kawasta faglwangon is Pidro, hanggan it fadwasay is Andris. Gis nanya ta gokas it manga sarap ha basad linaw, maskin pariho fangoyang fag manga taw. 19Is Hisos nalwang has taw, Ham tahinan wangko, ho fabali hayo manga fangiktan manga taw. 20Ginya ginan ta nadagos wa naobon it manga sarap, natahin wan Hisos. 21Ta noglahaw wan, is Hisos nalag yadi inda Santyago da Hwan, dowasay, in Sibidiyo manga anak, sas basad baloto, gofodan hat ama. Tagsip it manga sarap. Is Hisos natawag wa ka dowasay. 22Ta dagos wa naobon it baloto hanggan it ama, ginya natahin wan Hisos. 23Is Hisos nafahaskat sadik dahonya sakop Galiliya, igfaadal sas basad manga fanimbaan Hodyo, natoltol yadi ka Fiya fag Barita kawa han Diyos sakop baliwa. Igfafiya yadi ista manga sagit fagayo, hanggan ista manga fagdogon mahori. 24In Hisos ibolon kabantog wan sa sadik dahonya sakop Siriya. Yakanga ta nadiya han Hisos fagayo ka manga ha sagit, hanggan kasta manga fagdogon mahori bokod bokod, ka manga ha labang kagfapaong hasta sadili, ka manga kalobay, hanggan ka mangadwa syagan kimot no kasagit. Is Hisos nafafiya lamang fagayo. 25Yakanga kaaywanan wa fag manga taw gis sakop Galiliya, gi yadi sadik layonan ka ha safolok banwa, gis banwa Hirosalim, gis sakop Hodiya, hanggan kawa gis difay Hordan naoyan wan Hisos.

will be added

X\