MATIYO 27

1Araw, no dayo kasirang, fagayo fag manga fagtahinan fagalan hanggan fagtahinan banwa igtoltolan no kinday no fahatay in Hisos. 2Ta no nagafos hanya, ta nataban hanya han Pilato ka gobirnador Roma. 3Yabay is Hodas, ka naoyon in Hisos manga kalaban, no nalag kitay ta nafatohoyan in Hisos has kahatayan, hanya nafanisi wan, igfwali ya nangos has manga fagtahinan fagalan hanggan fagtahinan banwa ka tolok safolo kwarta pilak. 4Is Hodas iglwang, Aho ha kasalanan wan, maskin kangko ofod, kangko nafaoyon ha hayo, idwa ha kasalanan. Ka manga fagtahinan nasagot, Midwa ha mawat, ha bahala wan. 5Is Hodas naokas odi has basad Fanimbaan-Dahol ka kwarta pilak, yakangan lahaw wan, natagbong wa hanya. 6Dapat ka manga fagtahinan fagalan nafoyot ka kwarta pilak. Taglwang, Idwa maangay sas Batasan Hodyo tam nogfaaktom to fag kwarta has basad sohadan kwarta sas Fanimbaan-Dahol, maskin to bayad wa habilogan taw. 7Yakanga ta nanoltohan. Insadi ista manga fangayofan kitay ta somali ka daga fandagan tonya fag kwarta, kaarakitay, no ha famaklay matay, ta lomobgob wa sinya. 8Yakanga hanggan wa kati, tagngayan tonya fag daga fandagan, Daga Folot. 9Maskin kitonya, in fangampang Hirimiyas fwayong in-anod wan noglwang, Ta nabol ka tolok safolok kwarta pilak, dahonya wan ka manga taga Israil no nafahalga hanya, 10ginya ta nasali ka daga fanganglitan, kito kan Diyos nafwayong angko. 11Ta nafaatobangan in Hisos han Pilato ka gobirnador Roma. Ka gobirnador naintaw in Hisos kiti, Haw awkin ka gorangon manga Hodyo? Is Hisos igfwayong, Haw wa ngap kaglwang. 12Dapat ka manga fagtahinan fagalan hanggan manga fagtahinan banwa nogsombong ha hanya, is Hisos idwa ha fagawangon. 13Yakangas Pilato nafwayong hanya, Hadwa awkin igdog ta nogsombong aywan ha hyamo? 14Dapat is Hisos idwa yapdi ha fagawangon, ngadi ista sombong sadi, yakanga ka gobirnador kataka wan. 15Ka manga Hodyo nogtohod ka Fanohodan Nagsagayan, ka gobirnador Roma ha ogali igfalfas sadik Hodyo kanporiso, no fakta ka manga Hodyo fakasayaon falfason. 16Gis nanya ha akwa sadi kanporiso kasta fakilalaon fiya fiya, kawas Hisos Barabas. 17Yakanga ka manga taw no nanifonan, is Pilato naintaw is taw, Faktaw ka hayo fakasayaon falfason, ngatay is Hisos Barabas, ngatay is Hisos kasta faglwangon in Diyos-natogon-Famawi, ka Kadasog fag Gorangon? 18Maskin is Pilato natwa wa kitay ta kaingli odin Hisos, yakanga ta nataban hanya. 19Bohondi tonya, is Pilato no matokawan yapdi sas fanokawan fangabaya, it babay nasogo sadik taw han Pilato. Kat babay iglwang kitay, Haw fag idwag mawat tonya fag taw kadwa ha kasalanan, maskin sayabi ho kadala wagdog angko tagimfan kawa ha hanya. 20Ka manga fagtahinan fagalan-han-Diyos hanggan manga fagtahinan banwa nafasognod has manga taw kitay ta fag somagad gin Pilato fag is Barabas kasta fagfalfason, dapat fahatayan in Hisos. 21Sadi ya ginan ka gobirnador naintaw is taw, Faktaw sas dowa ka hayo fakasayaon angko falfason? Taglwang, Fag is Barabas kantam fagfalfason. 22Is Pilato iglwang is taw, No kitonya, kana araw angko ibolonon han Hisos, kasta faglwangon in Diyos-natogon-Famawi? Ta fagayo nasagot, Fapakowan hanya sas nafatimbangan hayo. 23Ginyas Pilato naintaw is taw, Kana mayon, kana kat naibolon dwat? Dapat ta labi wa nanarawagan marigon, Fapakowan hanya sas nafatimbangan hayo. 24Is Pilato no natwa kitay hanyadwa ha halimbawan, ngandayo ka manga taw labi man no mangawangan, nafabol danom gis taw, nagonaw it gamat sasta faglagan, nalwang, Bohonwa aho ka managot nyawa ham fahatay to fag taw. Ham bahala wan. 25Ka manga taw nasagot, Hami hanggan wa hyami manga anak ka bahala somagot it kahatayan. 26Yakangas Pilato nafalfas in Barabas, dapat no nafabakbak in Hisos, nafabahala was taw kaarakitay ta fapako hanya sas nafatimbangan hayo. 27Ginya madi ka gobirnador fag manga sondalo nataban in Hisos has basad gobirnador balay dahol. Ginya ta nafatifon sadi wak habanan sondalo san Hisos dayo. 28Ka manga sondalo naloslos in Hisos rotay, ginya ta nafasolong hanya sadik balokas aba aba, dararag. 29Ta nahoskos lamnon madogi a, nafasangbaw tonya in Hisos boknga alfoyo. Ta nafabitbit sadik pinotol bagahay sat gamat balis sihon. Ginya tagsway odig lingkohodan, iglwang, Anod, kafiyaon mangharaw ka gorangon manga Hodyo. 30Ta natofay hanya, hanggan nabol ka bagahay, nabakbak in Hisos alfoyo. 31Ginya madi ta nonsagaya wagyod hanya, ta naloslos ka balokas aba aba, nafasolong ya in Hisos sadili rotay, hanggan nataban wa hanya has dayo kaarakitay pomako wan sas nafatimbangan hayo. 32Araw araw ta noglahaw gis basad banwa, ta nahablang sadik ama, is Simon, taga Sirini. Ka manga sondalo napilit wa nafafasan hanya ka nafatimbangan hayo kasta fag fapakowan araw in Hisos. 33Ta nondasog sa sadik foyo tagngayan Golgota, it kahologan Botol Alfoyo, 34ka manga sondalo nafagamit han Hisos langgaw ha aktom mayat. Dapat is Hisos no nandog nainom, nadayo di. 35Manga sondalo napako wan in Hisos sas nafatimbangan hayo, ginya tagpostahan it manga rotay, nangafodan wan. 36Ginya madi tantokaw wan kaarakitay igbantay hanya. 37Masoratan sas hayo san Hisos tongod alfoyo ista sombong kitay, Tos Hisos ka Gorangon manga Hodyo. 38Gis nanya yadi ta nafapako dowak tolisan, insadi san Hisos balis sihon, insadi sat balis wala. 39Manga taw kagdalan sinya igmaswag, igyod, mabaringan di ista alfoyo, 40taglwang, Anod, haw ka domwat nangos ka Fanimbaan-Dahol, ginya fatobo ya tolo lamang ik sirang, kati bawiyan hyamo sadili. No haw wa ngay kan Diyos Anak, fag dokson wan gis nyamos nafatimbangan hayo. 41Kitonya yadi ka manga fagtahinan fagalan, ka mangag faadal Batasan Hodyo, hanggan ka manga fagtahinan banwa iglibak in Hisos, tagfwadfwayongan, 42Bati hanya nabawi ongay ka tiba taw, dapat not sadili wa habilogan idyadi wa syagan igbawi. Gwadi tyamo, hono, ka Gorangon manga Israil. Hanya no domokson nga kati gis nwa fag nafatimbangan hayo, mimtiwala wa hanya. 43Gwadi hanyag syag in Diyos, iglwang yadi kitay hanya in Diyos wa Anak. Tam lomag wa araw ngatay is Diyos bomawi hanya no orongan galwasi hanya. 44Kitonya yadi ka manga tolisan kanpako sat akbang nogyod in Hisos. 45Ginya madi yabay, gis boknga sirang balis myanit kabohid wan, inharom sadi wak dahonya banwanan. 46Myanit no kabohid wan, is Hisos natawag marigon, sas fangampangan Aramaik, Ili, Ili, lama sabaktani? It kahologan, Angko Diyos, angko Diyos, kana mayon haw nogfabayaan angko. 47Tiba taw ka sinya malindogan no nadog kitay is Hisos igtawag kitonya, taglwang, Mayon igtawag in Iliyas. 48Ka sadik taw dagos wa nandalandan nabol famasopsop, natogna has langgaw maiglis, nasongkit sas tobwan bagahay ginya nafasopsop in Hisos. 49Dapat tibag lwang, Faya, tam bomantay yap, ngatay is Iliyas imbangkad araw kaarakitay mamawi hanya. 50Is Hisos natawag ya domwag marigon, ginya nafalfas wat ipsaw. 51Ginya yabay ka fanahop rotay sas fagbokngan Fanimbaan-Dahol dagos wanragyang, gis tongod has daga baliwa, namokngan wan. Ka daga inhawig wan, ka manga bato in-gifak lamang. 52Ka manga lobgoban inboklas, hanggan aywan fag manga taw ka natay, ka danwan tohoyan han Diyos, inboyag ya. 53Ginyas Hisos nonboyag ya, ta nadokson gis lobgoban, nasakbaw has basad Hirosalim, ka banwa kantohoyan han Diyos. Kaaywanon fag manga taw nalag yadi sinya ka mangan boyag ya. 54Ka fagtahinan sondalo, hanggan it manga ofod kagbantay in Hisos, inhinol wa dahol dahol ta no nadog nalinog hanggan nalag fagayo kananod sinya. Taglwang, To orongan wan Diyos Anak. 55Aywan fag manga ina sinya yadi mabantayan gis ayayo. Gi yapdis sakop Galiliya to fag manga ina nogtahin in Hisos hanggan igtogbong hanya. 56Tonya fag ina tiba kawa da Mariya Magdalina, da Mariya inda Santyago da Hosi ina, hanggan in Sibidiyo babay. 57Araw, myanit no kasangday wan, sadik ama maakwa, is Hosi gis banwa Arimatiya, indasog wan. Is Hosi in Hisos yadi katogbong sadi. 58Hanya hawan Pilato nasagad in Hisos habilogan. Is Pilato nafasognod it manga sakop kitay disagan han Hosi in Hisos habilogan. 59Yakangas Hosi nabol in Hisos habilogan a, nasafot basad bago fag rotay madamol. 60Is Hosi nafaigyan in Hisos habilogan san Hosi sadili nafatalaga lohib lobgoban, ngalay yapdi no natigib ka bato. Ginya madi is Hosi nafabalolang sadik bato dahol dahol it fanahop sas sakbawan lohib, ginyan lahaw wan. 61Da Mariya Magdalina, hanggan sadi yak Mariya, sinya yadi matokawan sas masohod lobgoban. 62Nonbago marom, nonsagaya ka sirang famatalagaon, ka manga fagtahinan fagalan-han-Diyos hanggan manga Farisiyo, ta fagayo nangofodan han Pilato. 63Taglwang, Ama, migtohod kitay tonya fag bohagon no boyagan yapdi igfatakagdog, iglwang kitay, nonsagaya tolok sirang, hanyam boyag ya. 64Yakanga, balis tolok sirang, fag hagbantay nangos fiya fiya ka lobgoban, ngandayo it manga katogbong imbangkad hanya, bomol it habilogan, ginya fadahit has taw kitay hanyan boyag ya. No kitonya ka bohag goyan imbali dwat man ka gona. 65Is Pilato iglwang, Sogi, ham tabanan manga sondalo, fabantayan fiya fiya sas lobgoban. 66Yakanga tanlahaw wan, nafaganit ka tahop lohib, nafwalid tandaan sas boknga sakbawan fanahop bato, hanggan nafabantay ka lobgoban has manga sondalo, kaarakitay fatohoyan idwa ha taw tomanog tonya.

will be added

X\