MATIYO 25

1Kito nangos in Diyos banwanan fag sakop nogfahalimbawa. Ha safolok dayaga inlahaw kaarakitay tomagbo ka ama mamabay it fakilalaon. Ta fagayo ha diya ilawan, kafod wan. 2Yakanga ka lima fiya it fangayofan, dapat ka lima korang no naisip. 3Ka korang no naisip ha diya ilawan ongay, dapat tadwa ha diya ista fandogang langis no mamin araw. 4Dapat ay, ka manga fiya it fangayofan ha diya kat fandogang langis hat manga ilawan. 5Ka bomabay inabala, yakanga ka manga dayaga fagayo katongka wa a, intoyog wan. 6Dapat ka bomabay nondasog araw, boknga yabi, ha narokyaw, Tya wan ka ama bomabay, ham fag tagbo hanya. 7Ka safolok dayaga dagos wanbangon, nasogi yat manga ilawan. 8Ka manga korang no naisip iglwang has manga fiya it fangayofan, Disagan ha hyami hayo langis ngadi ogbot, hyami ilawan kapsa wan. 9Dapat ay, ka manga fiya it fangayofan iglwang, Ngandayo idwa homosto ara hantam fagayo. Fiya man ham no hayapdis mangag fasali langis, saliyan ya ka hayo. 10Yakanga ka limak dayaga ka korang no naisip, inlahaw wan. Ta nonlibang yapdig sali, ka ama mamabay indasog wan. Ka limak dayaga ka danwan talaga natahin wa ka ama kababay, nasakbaw basad balay fanganan. Natahop wa ka sakbawan. 11Araw araw ogbot, ka limak dayaga, ka korang no naisip, indasog yadi wan. Tagtawag, Hyami fon, hyami fon, ha fasakbawan yadi wa hyami. 12Dapat ay, ka ama mamabay iglwang, Bonwa bohag, hodwa kilala hayo, yakanga idwa nafasakbaw is taw. 13Ham fag danwa matagahan maskin ham idwa twa no ginahin fag sirang ngatay no ginahin fag masohod ka myanit aho nombangkad. 14Kito in Diyos banwanan fag sakop nogfahalimbawa. Sadik taw kalahaw has ayayo fag banwanan, yakanga nafatawag it manga sogowan hanggan nafaano has taw it manga kaakwaan. 15Nafahafod has taw it kwarta no dahoday kasta fagsyaganon botangon. Ha sadik sogowan it nafaano 5,000 piso, ha sadik sogowan it nafaano 2,000 piso, ha sadi yak sogowan it nafaano 1,000 piso. Ginya madi hanyan lahaw wan. 16Ka natanggap 5,000 piso dagos wa namalidya tonya. It nabolay fakinabang 5,000 piso yadi. 17Kitonya yadi ka natanggap 2,000 piso, nafakinabang yadi 2,000 piso. 18Dapat ka natangap 1,000 piso nahodkod a, natago ha basad daga kat fon kwarta. 19Ginya madi no dogay wa aban, kasta fon nwali hat manga sogowan, naintaw has taw kat nafaano kwarta. 20Ka natanggap 5,000 piso naakbang hasagfon hanya, iglwang, Angko fon to wa kam disag angko bago bago 5,000 piso. To yadi wa kangko nafakinabang lima yadik libo. 21Kagfon hanyag lwang, Yabay, kafiyaon. Haw wa ka fiya hanggan mafaanodon fag sogowan. Maskin haw naano fiya ka ogbot fag halga, ho faano ya ha hyamo dahol fag halga. Haw fag kito yadingko no kasolong igbaya. 22Ka natanggap 2,000 piso naakbang yadi hasagfon hanya, iglwang, Angko fon, to wa kam nafaano angko bago bago 2,000 piso, to kangko nafakinabang yadi, 2,000. 23Kagfon hanyag lwang, Yabay, kafiyaon, haw wa ka fiya hanggan matanogon fag sogowan. Maskin haw naano fiya ka ogbot fag halga, ho faano ya ha hyamo dahol fag halga. Haw fag kito yadingko no kasolong igbaya. 24Ginya madi ka natanggap 1,000 pisos naakbang hasagfon hanya, iglwang, Angko fon, ho twa wa kitay haw mahigpit wa nogsohot. Haw igbol ka bohonwa hyamo tanom. Haw gani yadi ka bohonwa hyamo nafamgas. 25Maskin ho kadala hyamo, ho natago di has basad daga im kwarta. Toy di ka 1,000 hyamo kwarta. 26Dapat it fon iglwang, Haw idwa fiya, mafang fag sogowan haw. Haw danwa twa, mangharaw, kitay hogbol ka bohonwa angko tanom, ho gani yadi ka bohonwa angko nafamgas. 27No kitonya, kana mayon haw nodwa nafwalid angko kwarta sas fanifonan has famotangan? Ginya ha tobo yap man araw aho nogbol ginya, aho no nwali. 28Ginya madi nalwang hat sogowan tiba, Ham bol wa gi hanya ka 1,000 piso, disagan ka ha 10,000. 29Maskin ka ha akwa nafatobo, ho domogang ya, yakanga im-aywan. Dapat kadwa ha akwa, nyawa sayok kangko disag, ho bomawi ya gi hanya. 30Ham okasan wan has basad marom sas sokayan tonya fag sogowan kadwa ha fakinabang. Sinya manga taw omoraw wan, hanggan wasta ngifon di mangarigitan wan. 31Aho Kanbali Taw nombangkad aban, angko kafiyan malagan sangko, hanggan manga anghil fagayo omofod yadi wangko. Ginya ho tomokaw sangko tokawan fanokawan gorangon kafiyaon. 32Gis nanya fag masohod yadi aban, fagayo fag manga layonan taw manifonan sangko atobangan. Aho fabali dowak layonan ka manga taw, kitos gano topa nogfalayon ka manga hambing gis manga topa. 33Ho fatifon sangko balis sihon kawa manga topa, ka balis wala kawa manga hambing. 34Aho ka gorangon fomwayong has tifonan ka sas balis sihon, Ham fag hastay, ham kangko Ama faglwangon kitay ham bomaya wan. Ham fag omafo angko sakop banwanan kawan talaga ha hayo gi yapdis bagon halig ka daga. 35Maskin ahon lonos, dapat ham nafahwan angko. Hon-inom yadi, dapat ham nafainom angko. Aho sadik famaklay, dapat ham nafasakbaw angko. 36Hodwa ha solong rotay, dapat ham nafarotay angko. Honsagit, dapat ham nasabang angko. Ahonporiso, dapat ay, ham nabantay angko. 37Ginya madi ka manga fiya fag manga taw tomangkod aban, lomwang, Hyami Fon, ginahin mi no nalag hyamo kalonos hanggan nafahwan, ngatay kainom ginya nafainom? 38Ginahin mi no nafasakbaw hyamo haw nonbali sadik famaklay, ngatay nafarotay hyamo haw nodwa ha solong rotay? 39Ginahin mi no nalag hyamo ha sagit, ngatay basad porisowan, ginya nanabang hyamo? 40Aho ka Gorangon somagot, Hogfwayong ha hayo, bohonwa bohag, no ginahin kawa ham natogbong angko manga fadwasay to, nyawa tadwa bangan mahalga sas taw, aho yadi wa ka hayo natogbong. 41Ginya madi hanya lomwang yadi ka balis wala, Ham fag ayayo gingko, ham kan Diyos nafatohoyan has fadosaan. Ham fag hawas basad afoy kadwa kapsa kantalaga han Fandaya, hanggan it sakop fag manga labang. 42Maskin ahon lonos, dapat ham idwa nafahwan angko, ahon inom, dapat ham idwa nafainom angko. 43Ahon bali sadik famaklay, dapat ay ham idwa nafasakbaw angko. Hodwa ha solong rotay, ham idwa yadi nafarotay angko. Aho ha sagit hanggan inporiso, dapat ham idwa nabantay angko. 44Ginya ta tomangkod yadi kito aban, Hyami Fon, ginahin hami no nalag hyamo inlonos, in-inom, inbali famaklay, idwa ha solong rotay, ngatay insagit, ngatay maporisowan, hami nodwa natogbong hyamo? 45Ginya madi, aho ka Gorangon fomwayong has taw, Hogfwayong ha hayo, bohonwa bohag, no ginahin ham no kafang wagtogbong to, kadwa bangan mahalga has taw, kawa aho ka hayo fakafangon fagtogbongon. 46Tonya fag manga taw hawas basad fadosaan kadwa kapsa, dapat ay, ka fiya fag manga taw hawas haboyagan kadwa yadi ha katabowanan hanggan aban aban.

will be added

X\