1 Ginya madi da Hisos nadokson gis basad aladan Fanimbaan-Dahol. Ta no kaginan wan, it manga katogbong naakbang han Hisos, igfasayagdog kitay kafiyaon ka manga balay Fanimbaan-Dahol. 2 Dapat is Hisos iglwang, Lag ngay, to fag manga balay kati. Hogfwayong ha hayo, bonwa bohag, aban, idwa hamgoyan dowak bato igtarongbawan, fagayo imrofad lamang. 3 Araw da Hisos no matokawan sas baba Moyod Oliboan, it manga katogbong naakbang hanya, naintaw han Hisos, idwa sasta fagdogan fakaaywanan, iglwang kitay, Ginahin fag masohod aban ka Fanimbaan-Dahol nomdwat? Kana fag falagon madolaw kamlag aban kagfatohoyan kitay haw kaakbang wa kabangkad ya domwag, hanggan to fag daga it katabowanan wan? 4 Is Hisos nasagot has taw, Ham fag matagahan, ham fag idwa gadayaan nyawa faktaw. 5 Maskin aywan kambangkad aban, ngomayan yadingko ngayan, lomwang kitay, hanya wa kan Diyos-natogon-Famawi. Ta fatalang aywan fag manga taw aban. 6 Ham domog yadi aban ka manga madalag dog gis awayan hanggan manga barita awayan dahol dahol. Dapat ay, ham fag idwa galibitan. Talaga wa kitonya kamlag aban, dapat bonya tonya ka katabowanan. 7 Maskin aban ka manga layonan daga dahol manlabanan, kitonya yadi ka sadik gorangon sakop lomaban ha sadik gorangon sakop. No siday no siday aban, idwa ha hanon hanon, ka daga lominog yadi. 8 Dapat to fagayo kat fabagowanan lamang kahoriyan. 9 Gis nanya aban, maskin aho hayo fagalwasiyon, fagayo fag manga taw kadwat iglag hayo. Ta fagamat hayo has manga taw kaarakitay fahoriyan hanggan fahatay hayo. 10 Aywan ka domayo git fakatiwalaon, omisog yadi ha sadi ha sadi. Tibak taw, nyawat fakilalaon, omoyon it kalaban aban. 11 Aywan aban fag bohagon fag manga fangampang imbangkad, aywan kat fatalangon. 12 Ka manga dwat fag ogali im-aywan sadik baba daga, yakanga ista fangayofan aywan imlombay no galwasi in Diyos. 13 Dapat ay, kadwag fagomon hanggan has katabowanan, ya hanya wa kambawi. 14 Ka Fiya fag Barita kawa han Diyos sakop imbarita yapdi ha sadik dahonya baba daga, kaarakitay fagayo fag manga layonan taw domog wan. Ginya madi yabay, bago di ka katabowanan fagayo. 15 Aban ham lomag kitay, igsagaya wa ogali fag dwat im-anod wan, idwa ha fag kitonyan, kan fangampang Danyal fagwason hyabi. Tonya mafwalidan aban sas lingoban kanbokod han Diyos. Kagbasa fag tomwa wagdog tonya. 16 Nom-anod aban, ka manga taw sas sakop Hodiya, fag dan waglagyo has moyod. 17 Ka sas sokayan balay fag idwam libang igbol yapdit botang git basad balay. 18 Ka sas iyab fag fawa goli kaarakitay bomol it rotay. 19 Isyay wan, no kaya ngadi manga gabosog hanggan ka ha manga anak ogbot igfasoso yapdi, gis nanya fag masohod aban. 20 Ham fag darangin kitay ham noglagyo, fag idwa tomoon dayo abagat, ngatay has Sirang Kafahowayan. 21 Maskin gis nanya fag masohod aban, ka manga taw domog mahori wa dahol dahol, tadya ha nagdogan kitonya fag mahori, gi yapdis hyabi ka daga nonhalig balis kati, hanggan idwa yadi domog mahori man inya aban. 22 Nodwa ngalay imtohas tonya fag mahori, idwa hamsawad manga taw, ngadi sadi. Dapat ay, maskin is Diyos kaawa it manga nafili fag manga taw, hanya ngalay digfatohas tonya fag mahori. 23 Aban no ha akwag fwayong ha hayo kitay, Istay wan kan Diyos-natogon-Famawi, ngatay sinya wan, ham fag idwa katiwala. 24 Maskin aban ha akwa mangag faniring in Diyos-natogon-Famawi. Ha akwa yadi manga bohagon fag fangampang imbangkad. Ta mamalag aban manga madolaw fag manga falagon hanggan manga fatimawa, kaarakitay fatalang in Diyos manga nafili, no somyagan di. 25 Yabay, ho danwa nafadog hayo. 26 Yakanga ta nogfwayong ha hayo, Sawas dayo basad talon. Ham fag idwa hanya. Ta noglwang, Sinya wan basad balay, ham fag idwa katiwala. 27 Maskin aho, Kanbali Taw, malagan wa fiya fiya no kadasog aban, kito was hilat malagan no kilat gis salogan myanit baliwa hanggan wa has sangdayan myanit baliwa. 28 No siday ham iglag ka manga boyaw hagang igtifonan, ya sinya wa ka habilogan natay. 29 Tonya fag manga kahoriyan nomtolas wan, Ka myanit dagos wamharom hanggan ka magdanon idwa yomawa. Ka manga fanggasan imdagdag yadi gis banwa sam tongod, hanggan ka manga karigonan sam tongod, sas boknga fakayawan, imhadhawigan wan. 30 Ginya madi, Aho Kanbali Taw, angko falagon madolaw imlag sam tongod is banwa a, fagayo fag manga layonan taw omoraw wan. Ta lomag angko, Kanbali Taw, kadasog sas baba linyabo, ha karigonan dahol, hanggan kangayanan abwat. 31 Ta fahasnog ka dahol fag bodyong. Ginya aho, Kanbali Taw, somogo angko manga anghil has ofat ik fongfongan daga, fatifon angko manga nafili fag manga taw gis fagayo fag manga banwanan. 32 Ham fag twagdog ka adal kawa gis fon igos. Nogsalingsing, igsofot wan, tam twa kitay ka fangaraw kaakbang wan. 33 Kitonya yadi, ham noglag to, kangko manga nafwayong kaanod wan, ham tomwa kitay aho, Kanbali Taw, kaakbang wa kadasog, sawas sakbawan alad. 34 Hogfwayong hayo, bonwa bohag, to fagayo im-anod wan ka kati fag masohod fag manga taw no boyagan yapdi fagayo. 35 Ka banwa sam tongod hanggan ka daga imliyam wa aban, dapat ay, angko hampang idwam liyam nyawa ginahin wan. 36 Dapat idwa ha taw twa no ginahin fag sirang, no kinday ka myanit gis nanya tonya nom-anod. Nyawa ka manga anghil ka san Diyos banwanan sam tongod, nyawa aho in Diyos Anak, no bohonwas Diyos angko Ama, idwa ha twa no ginahin. 37 Aho, Kanbali Taw, no kadasog aban, kitos gonaw hyabi san Nowi fag kasohodan. 38 Gis nanya hyabi, ka daga nodyan gonaw, manga taw kwan hanon, manga ginom, mangag babay hanggan gindogan, mangag tomboy it anak has anahan has dayaga, hanggan was Nowi insahay hat basad sahayan baloto. 39 Sadi wa ginan ka gonaw indasog, tadwa tagak tagak, yakanga fagayo inlimos wan. Kitonya yadi kamlag aban, aho Kanbali Taw nomdasog. 40 Gis nanya fag masohod aban, ha dowak ama gibolon sas iyab, insadi tomaban wan, insadi imgoyan di. 41 Ha dowak ina aban igtarogbongan iglobok, insadi tomaban, insadi imgoyan di. 42 Yakanga ham fag matagahan, maskin ham idwa twa no ginahin fag sirang kagfon hayo nomdasog. 43 Dapat ham fag twa kitay kagfon balay no dandi twa no ginahin fag masohod basad yabi ka fangnahaw nomdasog, hanya danwa maologan, idwag fasakbaw ka fangnahaw hat balay. 44 Yakanga ham fag fagaba matalagaan maskin aho, Kanbali Taw, kadasog gis nanya aban ham nodwa gisip kitay aho kaakbang wan. 45 Faktaw ka matanogon hanggan madonong fag sogowan, ham gayfan? Kat fon nagtogonan kitay anowan it manga sogowan tiba, kaarakitay fahafod has taw ista fanganon no ginahin fag masohod ka fiya. 46 Tonya fag sogowan bomaya wan it fon nogtahod hanyag fadagos it fon togon kitonya. 47 Hogfwayong hayo, bonwa bohag, it fon faano hanya it manga kaakwaan fagayo. 48 Dapat tonya fag ista nagtogonan nodwa fiya, it fangayofan iglwang, Angko fon imlibang yapdi, dogay di aban bago mwali. 49 Yakanga tonya kasta nagtogonan igbakbak kat kapariho sogowan, igsayowan has manga kalango yadi, no manga kwan manga ginom. 50 Yakanga ista fon mwali sas sirang kat nagtogonan fag sogowan nodwa tagak tagak, gis nanya fag masohod myanit, hanyadwa twa kitay it fon kadasog. 51 Yabay, tonya fag sogowan it fon no natahod kitonya, mahori wa dahol dahol nogfadosa hanya, faofod yadi hanya has manga taw kagfalagon odi is taw kitay fiya. Ka manga sinya fag manga taw omoraw, hanggan wasta ngifon di mangarigitan wan.
