MATIYO 23

1Ginya madis Hisos nahampang has fakaaywanan fag manga taw, hanggan hat manga katogbong, nalwang kiti, 2Ka mangag faadal Batasan Hodyo hanggan ka manga Farisiyo ka bilang in Mwisis tobos kati nogfaadal in Mwisis togon. 3Yakanga ham fag talinga ista fwayong, fag katanog ista sogo. Dapat ay, ham fag idwag tolad ista manga ogali maskin ista manga ogali idwag faanod kasta adal. 4Tagfogong ka manga mabyat fag ogali, bilang fagdiyaon, igfafasan hat sakop, dapat ay, tadwag sapkid ngadi ngap ista timoyo kaarakitay igsafat tonya. 5Kasta manga ogali famalagon odi has taw kitay fiya. Tagfadahol it sohadan oksong sas boknga gamat hanggan sas boknga alfoyo. Ka masohadan sinya in Diyos hampang tiba. Tagfaaba yadit barobayan sat tobwan rotay. 6Tagfahasa yadi ka tokawan hasta fon akbang fiya fiya, sas manga fanganan, hanggan ka fanokawan ka manga ha kangayanan sas fanimbaan. 7Ta kasaya yadi manga taw fag fadaholon hanya ta no gayayag basad banwa, manga taw fag ngomayan nangos is taw, Kagfaadal. 8Dapat ham, ham fag idwag fangayan ha sadik taw kitay, Haw kagfaadal, maskin kagfaadal hayo sadi di, ham fagayo dowasay. 9Ham fag idwag fadaholon ngadi faktaw sas baba daga nogngayan hanya hayo Ama, maskin sadi di hayo Ama, ka hayo Ama sat banwanan sam tongod. 10Ham fag idwag faangay nyawa faktaw igngayan hayo, it fon, maskin sadi di kagfon hayo, kawan Diyos-natogon-Famawi, ka Kadasog-fag-Gorangon. 11Ka abwat man ha hayo it kangayanan, fag tonya di ngap kambali mahogod igtogbong, bilang hayo sogowan. 12Kagfatakagdog is taw, it kangayanan imbali ngap libaba, dapat ay kadwag fatakagdog, imbali ngap abwat it kangayanan. 13Dapat, isyay wan, ham ka mangag faadal Batasan Hodyo, hanggan manga Farisiyo. Ham igfalagon odis taw kitay ham fiya. Ham igtaktak ka manga taw kaarakitay tadwag dasog han Diyos sakop. Bohondi kitay ham idwag sakbaw in Diyos sakop, ham igtaktak ya ngadi ka kasayag sakbaw. 14Isyay wan ham ka mangag faadal Batasan Hodyo hanggan manga Farisiyo. Ham igfalagon odis taw kitay ham fiya. Ham iglogos wa ngap manga ina balo banwanan, hanggan hayo odi famalagon is taw ham nogdarangin kadogayon. Kawa kitonya ham, hayo fadosaan kamtohoyan ha hayo aban, mahori man ka tiba taw. 15Isyay wan ham ka mangag faadal Batasan Hodyo hanggan manga Farisiyo. Ham igfalagon odis taw kitay ham fiya. Ham igdifay ya ngadi dagat. Ham iglahaw ayayo baba daga kaarakitay ham fatiwala ngadi sadik Hintil has ogali Hodyo. Ginya ham no nataban wan, ham igfabalit ogali dwat man ka hayo. Yakanga tonya fag taw aban, bohondi kito ka hayo no fiya fagfadosaon sas afoy kadwa kapsa. 16Isyay wan ham manga bota kagfangolo is taw. Ham igfwayong kitay ta nogngayan ka Fanimbaan-Dahol nogtangkod marigon, nyawadwam tonglos tonya, dapat ham iglwang, ta nogngayan ka ginto sas Fanimbaan-Dahol ta nogtangkod, fag orongan wam-anod ista natangkod. 17Ham manga bota, ham ka manga idagdog odi. Sida ka mahalga man, ham gayfan, ngatay ka ginto, ngatay ka Fanimbaan-Dahol maskin sinya wa ka ginto no nafabokod han Diyos. 18Ham igfwayong yadi ka taw nogngayan ka danglayan nogtangkod marigon, nyawadwam tonglos tonya, dapat ay, ta nogngayan ka sinogba sas baba danglayan nogtangkod, fag im-anod wan ista natangkod. 19Ham manga bota. Sida ka mahalga man, ham gayfan, ngatay ka sinogba, ngatay ka danglayan ka sinyan disag han Diyos ka sinogba? 20Yakanga, ta nogngayan ka danglayan, ta nogtangkod marigon, igsakop yadi fagayo kasta disag sinya. 21Ta nogngayan ka Fanimbaan-Dahol nogtangkod marigon, igsakop ka Fanimbaan-Dahol hanggan ka goli sinya. 22Ta nogngayan in Diyos banwanan sam tongod ta nogtangkod marigon, igsakop in Diyos fanokawan gorangon, hanggan kagtokaw sinya. 23Isyay wan ham ka mangag faadal Batasan Hodyo hanggan manga Farisiyo. Ham igfalagon odis taw kitay ham fiya. Ham igdisag ka hayo fasafolo gis manga tanom famabanglo odi ofi, dapat ham igfasigpala di ka mahalga man fag adal gis Batasan Hodyo, kitos fag idwa ha fagihidon taw nogbolay fangabaya, ham fag kaawa ha sadi ha sadi, hanggan fag sonson wa maanod hayo hampang. Fiya ham nogdisag ka hayo fasafolo madi ngap, dapat ham fag katanog yadi to fag manga ogali mahalga. 24Ham manga bota kagfangolo manga taw. Ham matanogon no kadi garogbot fag bagay, dapat ay no ka mahalga fag manga bagay, ham idwa katanog, ham igfasigpala odi. 25Isyay wan ham mangag faadal Batasan Hodyo hanggan manga Farisiyo. Ham igfalagon odis taw kitay ham fiya. Ham gogas ya ngadi ka manga baba ongot, manga baba finggan, dapat ka sas basad manga odi bafaw wa dahol dahol kawa ham igtagagonaon, manga maingliyon ya ngadi. 26Ham manga Farisiyo bota. Falinayan yap man sas basad ongot, basad finggan, ginya madi ka sas babaw imbali yadi malinay. 27Isyay wan, ham mangag faadal Batasan Hodyo, manga Farisiyo. Ham igfalagon odis taw kitay ham fiya. Ham bilang kitos lobgoban kasta nafaabohay, fiya kabantay sas babaw, dapat sas basad manga odi boyok, manga botol natay, manga sitam. 28Ham kitonya wa fiya fiya. No sas faglagan di manga taw, ham kafiyaon wan, dapat ka orongan, dwat wa dahol dahol hayo manga ogali. Ham igfalagon odis taw kitay ham fiya. 29Isyay wan ham mangag faadal Batasan Hodyo hanggan manga Farisiyo. Ham igfalagon odis taw kitay ham fiya. Ham igfafiyan in Diyos manga fangampang lohib lobgoban, hanggan ham kalig yadi fatohodan ka manga taw fiya hyabi. 30Ginya ham iglwang, No hami di nangos ka boyagan hyabi gis nanya fag masohod, midwa ara naoyon has taw ta no nafahatay in Diyos manga fangampang. 31Ham noglwang kitonya, ham igfatohoyan kitay ham ista manga hasokfonan anak ka manga nafahatay in Diyos manga fangampang. 32Sogi, ham fatonglosan wan hayo manga hafofowan nafabago. 33Ham manga abyanon wan, bilang odi hasokfonan abyanon no madaya, kinday nangos ham no bomaybay ka fadosaan sas basad afoy kadwa kapsa? 34Yakanga hogsogo yapdi ha hayo angko manga fangampang, hanggan ka manga madonong fag manga taw hanggan mangag faadal togon. Tiba aba ham fahatay wan, tiba ham fapako sas fatimbangan hayo, tiba ham bomakbak sa hayo basad fanimbaan, tiba ham mamahoriyan omalaw ha banwa ha banwa. 35Kawa kitonya, ham wa aba ka domog ka fadosaan fagayo ka nafahatay manga taw fiya sadik baba daga, gi yapdis hyabi hyabi, ta no nafahatay in Abil kadwa ha kasalanan, hanggan ta no nafahatay in Sakariyas in Barakiyas anak. Ham nafahatay hanya sas faktaban fanonogan ista manga disag hanggan ka balay Fanimbaan-Dahol. 36Hogfwayong ha hayo, bonwa bohag, kasta fadosaan fagayo ka naibolon kitonya, ka manga taw ka kati fag masohod ka somagot. 37Haw, Hirosalim, Hirosalim, haw igfahatay in Diyos manga fangampang hanggan igbintok ya ngadi kan Diyos manga nasogo ha hyamo. Kayoda wa ginan ho kasayag lohob hyamo sakop fag manga taw, kitos ina ofa noglohob it anak sat daga fakfak, dapat haw Hirosalim, ha dayo di ngap. 38Yakanga kati ho orongan wa fabayaan lamang im oliyanan. 39Hogfwayong hyamo, haw fawa lomag angko domwag nodyam dasog gis nanya fag masohod haw no lomwang Ka kadasog hastay san Diyos ngayan fag bomaya wan.

will be added

X\