MATIYO 22

1Sadi ya ginan is Hisos nafahalimbawa has taw, iglwang, 2In Diyos banwanan fag sakop kito nangos. Sadik gorangon nafatalaga fanganon ayo ayo kawat anak ama mamabay wan. 3Ginya ka gorangon nafasabang ya it manga sogowan has taw kat manga nafadog itfagonan, dapat ta kafang kabangkad. 4Nasogo ya domwag ka tiba sogowan, natogon has taw kitay, Ham fag fwayong hantam manga nagsabangan itfagonan kitay, intalaga wa yabay ka fanganon, ho nasogba wan angko manga baka, hanggan kangko manga nafalakbog manga anak baka. Fagayo fag manga fanganon intalaga wan. Fag lwang has taw, Ham fag hastay wa kati has fanganan famabayan. 5Dapat kasta nagsabangan itfagonan bilang didwa nadog. Ta nanarowayan it lahawan bokod bokod, insadi hat iyab, insadi mamalidya wan. 6Tiba nagamat di ngap ka gorangon manga sogowan, nabakbak ya ngadi hanggan wa nafahatay. 7Ka gorangon in-isog wa dahol dahol is taw. Nasogo wat manga sondalo, nafahatay yadi wa ka mangag fahatay taw. Ta nasonog yadi wat banwanan. 8Ka gorangon nafwayong hat manga sogowan, No kitay di intalaga wan ka fanganon, dapat kantam nagsabangan fag manga taw idwa fiya igfasakop hastay. 9Yakanga ham fag hawas basad karsada ka ha manga taw ayo ayo. Ham tabanan hayo lagan fagayo hastay has fanganan famabayan. 10It manga sogowan inlahaw ya ngay has manga dahol fag karsada, nataban wan kat lagan fagayo, nyawa ka manga dwat fag taw, nyawa ka fiya. Yakanga napno wa taw sat fanganan famabayan. 11Araw, ka gorangon nasakbaw mamantay ka manga taw, nalag sinya sadik taw kadwa ha solong rotay famabayan. 12Ka gorangon naintaw hanya, Ama, yakana haw no nasakbaw hastay idwa ha rotay famabayan? Ka taw idwa naawang. 13Yakanga ka gorangon nafwayong hat manga sogowan, Ham gafosan it gamat hanggan bitis. Ham okasan hanya has basad marom sas sokayan. 14Sinya manga taw omoraw hanggan wasta ngifon di mangarigitan wan. No kitay di aywan ka gorangon nafatawag, dapat sayok kat nafili. 15Ginya madi, ka manga Farisiyo inlahaw wan, nanoltolan no kinda no omiktan in Hisos git sadili hampang nangos. 16Yakanga ta nasogo han Hisos ista sadili manga katogbong tiba, hanggan in Gorangon Hirodis manga sakop tiba. Tagmaswag odin Hisos, taglwang hanya, Haw kagfaadal has taw, mi twa kitay haw idwag bohag, hanggan sonson wa orongan kam faadalon has taw kan Diyos fakasayaon ista manga ogaliyon. Hadwa ha fagihidon taw, maskin hagfapariho wan di fagayo fag manga taw. 17Yakanga, fwayongan hyami, kana kam fangayofan? Maangay awkin sas Batasan Hodyo tam nogbayad bohis han Sisar, ngatay idwan? 18Dapat ay, is Hisos fadi wad twagdog kasta bato lwangon dwat, yakangag lwang has taw, Hayo hampang bilang wa fakyason no kadog di. Kana mayon ham nogtikis wa nangos igfasalan angko? 19Tay, ka kwarta, falagan angko ka kwarta famayad bohis. Ta nadisag ngay han Hisos sadik kwarta mabilog. 20Is Hisos naintaw has taw, Gafo tolad hanggan ngayan insorat istay? 21Ta nasagot, In Sisar wa nga tolad tonya. Ginyas Hisos iglwang has taw, No kitonya, kan Sisar, disagan wa han Sisar, kan Diyos disagan wa han Diyos. 22Tandolaw wagdog in Hisos sagot, ta naobon di hanya, nanarowayan lamang. 23Gis nanya yadi fag sirang, manga Sadosiyo kagfabohag kitay ka manga natay idwam boyag ya domwag, naakbang han Hisos. Taglwang hanya kitay, 24Haw kagfaadal has taw, is Mwisis natogon kitay, Sadik ama no matay idwa ha anak sat babay, it fadwasay fag bomabay ya kat tagyaw kanbalo kaarakitay no ganak, bilang man di ka natay it ama. 25Itfagonan sa hyami ha tasayan fitok ama kagdowasayan. Kasta ahan nababay, idya ha anak, natay wan. Nafamataw it babay hat fadwasay ama. 26Kitonya yadi kanlag kat fadowa fag indogan, hanggan fatolo hanggan wat fafito. 27No natay wa fagayo fag tasayan ama, hanggan ka ina natay yadi wan. 28Yabay gafo babay tonya fag ina, ta nomboyag ya, kawa ka fitok tasayan nababay hanya istay? 29Is Hisos nasagot has taw, Ham igfalamang wa dahol dahol, kawa ham idwa twa ka Kasoratan, idwa yadi twa in Diyos karigonan. 30Maskin ta nomboyag ya aban, fawa hagbabay gindogan, tambali kitos manga anghil san Diyos banwanan sam tongod kadwa yadig babay. 31Kawa has manga natay no kaboyag ya, ham idwa awkin nabasa sas Kasoratan in Diyos nafwayong ha hayo? Hanyag lwang, 32Aho in Abraham wa Diyos, aho in Isaak wa Diyos hanggan in Hakob yadi Diyos. Ka manga taw boyagan lamang kan Diyos fagsakopon, bonwa ka manga mahatayan. 33Ka fakaaywanan fag manga taw no nadog in Hisos sagot, tandolaw wat manga fwayong. 34Dapat ka manga Farisiyo matifonan odi ta no nadog kitay ka manga Sadosiyo nadaogan din Hisos sas toltol. 35Sadik Farisiyo ka madonong wa dahol has manga Batasan Hodyo, naintaw in Hisos kaarakitay igsolay hanya, nalwang, 36Haw kagfaadal, sida ka marigon man has fagayo fag manga Togon kan Mwisis natogon? 37Is Hisos nasagot, Haw fag galwasi in Diyos kagfon hyamo, sadi wak dahonya fangayofan, hanggan sadi wak dahonya isip. 38To ka gona hanggan marigon man has fagayo fag manga togon. 39Kitonya yadi kat fadowa. Haw fag galwasi im kapariho kito yadim sadili. 40Ka manga Batasan Hodyo fagayo hanggan ka manga fangampang adal sinya wa kansakop sas dowak togon. 41Ka manga Farisiyo no matifonan yapdi, is Hisos naintaw is taw, 42Kana ka hayo fakatwawon kawa han Diyos-natogon-Famawi, ka Kadasog fag Gorangon? Gafo hasokfonan anak tonya? Ta nasagot, In Dabid hasokfonan anak. 43Is Hisos iglwang, No kitonya, ka Maliyaw fag Falad no nafaisip in Dabid, kana mayon is Dabid nogngayan it hasokfonan anak, kagfon hanya, noglwang 44Is Diyos nafwayong hasagfon angko, Haw fag matokawan yap sangko balis sihon, No bali day hodya nafasakop fiya fiya ha hyamo im manga kalaban fagayo. 45Kati nos Dabid man di ka nangayan in Diyos-natogon-Famawi, kagfon in Dabid, kinday hanya nogfon in Dabid not sadili odi hasokfonan anak, ham gayfan? 46Ngadi sadi sas taw idwa nalag it sagot han Hisos. Ginya wa ginan ta fawag fasolopan hanya kaarakitay omintaw hanya.

will be added

X\