MATIYO 21

1Kati yabay ta kadasog wa has banwa Hirosalim. Araw, ta nondasog sas tifonan balay Bitfagi, sas Moyod Oliboan, is Hisos nafagona kat manga katogbong dowa. 2Is Hisos natogon kitay, Ham fag hawas masoson fag tifonan balay. Ham araw nomdasog sinya, ham lomag wa dagos sadik inan habayo libaba matarabingan, ha anak yadi sinya. Lohasan it tarabing a, goyodan fagayo dowa hastay. 3No ha taw gintaw hayo, ham fag lwang, Kagfon intam kasaya somahay, ginya madi kagfon habayo fadiya wa hayo dagos ka manga habayo. 4In-anod wa nga kitonya kaarakitay ka fangampang fwayong hyabi imtonglos wan kati noglwang kitay, 5Ham fwayongan has banwa Siyon, Lag ngay tya wamlwad ka hyamo gorangon kadasog wan. Hanyadwa ha takan, masahayan sa odis habayo libaba, Sa odi sadik anak habayo libaba. 6Ginya madit katogbong dowa inlahaw wan, intanog in Hisos sogo. 7Ta nagoyod ka inan habayo libaba hanggan wat anak, ta nasagmak it manga rotay aba sas baba goyoy manga habayo. Ginyas Hisos nasahay wan. 8Kaaywanon fag manga taw nasagmak it manga rotay san Hisos fagonan lahawan. Tiba taw nabonggo manga sanga hayo, nasagmak yadi sinyas boknga dalan. 9Kaaywanon fag manga taw ka gonan Hisos hanggan goyan igtarawagan marigon, taglwang, Kafiyaon in Dabid hasokfonan anak. Ka kadasog san Diyos ngayan fag bomaya wan. Kafiyaon ka san Diyos banwanan sam tongod im tongod. 10Araw is Hisos nonsakbaw basad alad Hirosalim, sadi wak banwa gagran. Ta garintawan, taglwang, Fakta mayon to fag ama? 11Ka fakaaywanan nasagot, To kawas Hisos ka fangampang gis Nasarit, sakop Galiliya. 12Ginya madis Hisos nasakbaw has basad aladan Fanimbaan-Dahol. Nasogo ha dayo alad ka mangag balidya hanggan ka mangag sali basad aladan. Nafatobong kasta fwalidan kagbalyo kwarta hanggan ka mangag balidya salompati manga tokawan. 13Is Hisos nalwang, Gwadi insorat sas Kasoratan, Ta fag ngomayan angko balay, Balay Fandaranginan, Dapat ham nafabali angko balay oliyanan odi manga fangnahaw. 14Ha manga bota hanggan manga fihong sinya ka naakbang han Hisos basad aladan Fanimbaan-Dahol. Yakangas Hisos nafafiya is taw. 15Ka manga fagtahinan fagalan, hanggan ka mangag faadal Batasan Hodyo, kahori sat manga basad fangayofan no nalag in Hisos manga naibolon madolaw. Ta kahori yadi ka manga anak nogtarawagan sas basad aladan Fanimbaan-Dahol, maskin tagfasayagdog hanya, taglwang, Kafiyaon in Dabid hasokfonan Anak. 16Ka manga ha kangayanan naintaw in Hisos kiti, Haw awkin igdog yadi wan ista fwayong kawa ha hyamo? Is Hisos nasagot, Hogdog ngay. Ham idwa awkin nabasa ka kito fag manga toltol sas Kasoratan, Giwas manga bibig anak ogbot, hanggan ka mangag soso yapdi haw nafahosto nogfasayagdog hyamo? 17Da Hisos nadokson ya ngawan, nalahaw gis banwa, hawas Bitanya. Sinya wak nigya. 18Nonsirang, da Hisos no kafwali ya has banwa Hirosalim, is Hisos kalonos wan. 19Is Hisos no nalag sadik fon igos sas bilog dalan, hanya nabantay. Dapat idwa ha lagan bohad sinya fag fon, labong odi. Yakangas Hisos nahampang has fon igos, iglwang, Hadwa bomohad domwag nyawa ginahin. Yakanga ka hayo dagos wanlayong, intonga wan. 20Ka manga katogbong no nalag, tandolaw wan, ta gintaw, Twa oman intonga wa dagos to fag fon igos? 21Is Hisos igsagot, Bonwa bohag, ham nodwa gadowan igsyag in Diyos, ham somyagan yadi omibolon bondi kitongko naibolon has nwa fag fon igos. Nyawa ham lomwang toy fag moyod, Haw fag galin wa gis nyamo, loksowan has basad dagat, im-anod wa ka hayo fwayong. 22Ham nogsyag in Diyos, ham tomanggap nyawa kana ka hayo fagdaranginon. 23Araw da Hisos nasakbaw has basad aladan Fanimbaan-Dahol. Is Hisos nogfaadal yapdi sinya, manga fagtahinan fagalan-han-Diyos hanggan manga fagtahinan sas banwa naakbang hanya, naintaw, Kanam kangayanan haw no gibolon to fag manga bagay? Fakta ka nadisag hyamo kangayanan kitonya? 24Is Hisos nasagot has taw, nalwang, Ho ngap omintaw yadi hayo, ham no somagot angko, ho bago di fomwayong ha hayo no kana kangko kangayanan gibolon to fag manga bagay. 25Ginda kan-ginan in Hwan kangayanan igfatogna manga taw, ngatay gin Diyos banwanan sam tongod, ngatay gis taw? Tagfabarohagan ha sadi ha sadi, taglwang, Tam no lomwang giwan Diyos banwanan sam tongod, is Hisos lomwang hantam, Kana mayon ham nodwa katiwala in Hwan hyabi? 26Dapat, tam no lomwang, Gi odis taw, manga taw ngandayo omisog intam, maskin ka fakaaywanan fag manga taw natwa waglag kitay is Hwan in Diyos fangampang. 27Yakanga ta nasagot in Hisos kitay, Midwa yadi twa. Ginyas Hisos nafwayong, Hodwa yadi fomwayong hayo no ginday angko kangayanan gibolon to fag manga bagay. 28Kinda ham gayfan no kito? Ha sadik ama it anak ama dowa. Ka ama hawat anak sadi, igsogo hanya, iglwang, Haw fag gibolon hantam obasan kati. 29It anak nasagot kitay, Ho kafang di. Dapat araw araw ogbot in-oman yat fangayofan, ya hanya wan, nangibolon. 30Ka ama hayat anak sadi ya, nafwayong yadi kitonya. Yakanga kat fadowa fag anak iglwang, Ala, ho hanya wan, dapat idwa ngap ginya. 31Fakta kantanog it ama fwayong, ham gayfan? Ta nasagot, Kat nasogo gona kantanog. Is Hisos iglwang has taw, Hogfwayong ha hayo kitay, bonwa bohag ka manga fanohot bohis Roma, hanggan ka manga fabayowan fag manga ina gomona man ara hayo kaaktom han Diyos sakop. 32Maskin is Hwan indasog ha hayo, fadi wad nafwayong ha hayo ka fiya fag ogaliyon, dapat ham idwan tiwala hanya. Dapat ka manga fanohot bohis Roma hanggan ka manga fabayowan fag manga ina intiwala hanya. Ham fadi wad nalag kitay kitonya, dapat ham idwa yadi nasoyo, idwan tiwala hanya. 33Ham fag matalingan sadi yak halimbawa. Ha sadik taw nananom manga obas sat baba daga, maaladan ya ngadi. Natigib yadi dalifi ista fanlidan obas, nahalig sadik ansagan abwat, ista bantayan. Ginya madi nafabahalat obasan hat manga fangano. Kagfon obasan hawas iba banwanan ayayo. 34Nondasog wa famohadon, famangtaon wan, kagfon obasan nasogo it manga sogowan kaarakitay bomol it kahorayan bohad git manga fangano. 35Dapat ka manga gano obasan naisog di ngap ka manga sogowan. Ka sadik sogowan ta nabakbak. Ka sadi ta nafahatay. Ka fatolo ta nabintok bato. 36Kagfon obasan nasogo ya domwag, aywan man ka gona it nasogo sogowan, dapat kitonya mandi kasta naibolon has taw. 37Ginya madi, no dogay, ka man it anak kat nasogo. It fangayofan iglwang, Ta gomalang wa nangos angko anak. 38Yatokitay, ka manga fangano obasan, no nalag kagfon obasan it anak, tagtoltolan kitay, To wa aba ka omafo it ama kaakwaan. Kalibang, tam fahatay wa hanya, ngan aba tam wa ka omafo ka obasan. 39Ta nagamat wa hanya, nagoyod hanya has dayo obasan, nafahatay wa sinya. 40Yakanga kagfon obasan no mwali aban, kanat ibolonon hat manga fangano, ham gayfan? 41Ta nasagot kiti, Hanya fahatay yadi wa araw tonya fag dwat fag manga taw, faano ya domwag it obasan has tiba taw ka domisag it kahorayan no ginahin aba sas famangtaon. 42Ginyas Hisos naintaw has taw kiti, Ham idya awkin nabasa to fag toltolan gis Kasoratan? Ka manga fangalig balay fagdayoon fag bato, Tonya di ngap kagfaganit ka balay sas basad solok. To in Diyos naibolon, Tam kadolaw waglag. 43Yakanga hogfwayong ha hayo, bohonwa ham kambali in Diyos sakop, dapat sadik layonan taw ka katanog it sogo fiya fiya, tonya wa kambali in Diyos sakop. 44Kamdagdag hanya fag baba bato, imbolang, dapat ka bato no kadagdag sasta babaw, kamlibit sas daga bato imrogrog lamang. 45Ka manga fagtahinan fagalan hanggan manga Farisiyo no nadog in Hisos manga halimbawa, nasarom kitay hawa ngap ista manga sadili in Hisos fagfatangonon. 46No kitay di ta kasaya wa gomamat in Hisos, dapat ta kadala di ka manga taw, maskin kat fakaaywanan natwa waglag kitay, is Hisos in Diyos wa fangampang.

will be added

X\