MATIYO 20

1Is Hisos iglwang, In Diyos banwanan fag sakop kito, halimbawa. Sadi kagfon obasan nalahaw marom marom yapdi, igsayak it famalo. 2Ta no nanaranggapan it tangdanan, sadik sirangan limak piso, ginya kagfon nasogot manga famalo has obasan. 3Kagfon obasan noglahaw, myanit no kaabwat wan, nalag tibak taw matokawan odi sayo faktaban balay. 4Nafwayong has taw, Ham fag hanya yadi, ham fangibolon angko obasan, ho tomangdan hayo hosto. Yakanga ta hanya wan. 5No boknga wa sirang araw, kagfon obasan nalahaw ya ngawan, hanggan myanit no kalibaba, dowa ya ginan, naibolon kito ka haraw. 6Myanit no kasangday wan, hanya nalahaw ya ngay, nalag ya ka tiba kadwa ha ibolon. Nafwayong has taw, Kana ham nostay di, sadi wak sirangan kalibang odi matorosanan? 7Ta nasagot, Maskin idwa hagfafalo hyami. Hanyag lwang, No kitonya, sogi, ham fag hanya wan, ham fangibolon wa sangko obasan. 8No kataklob wa marom, kagfon obasan nafwayong hat natogon kagbahala hat manga sogowan, Haw tawagan angko manga famalo. Haw fag tangdan was taw, fabagowan yap ka manga goyan nangibolon hanggan bago ara ka gona. 9Ka manga bago nangibolon no kayabi wan natanggap myasa limak piso. 10Ginya madi ka manga nagona naibolon gayfan it tanggapon ngandayo dahol man inya, dapat fagayo pariho di ngap it natanggap, myasa limak piso. 11Ta no natanggap wat tangdanan, tagsohot yapdi gisagfon obasan, igmanaw yapdit tangdanan. 12Taglwang, Kandasog goyan sadi odik tama sinyahod no nangibolon dapat hami sadi wak sirangan gibolon, minyaya wa maalhagan basad myanit. Yakana haw nogfaparihowan hyami tangdanan? 13Kagfon iglwang ha sadik famalo, Ama, hodwa nadaya hyamo. Gwadi intam taranggapan dandi limak piso, idwa aw? 14Haw fag bol no dahoday ka hyamo, haw fagoli wan. Ho kasayag tangdan ka goyan daho yadi ka hyamo tangdanan. 15Kana ha no kahori, bohonwa awkin aho ka bahala kangko sadili akwa? Ngatay ham kaingli odi kitay aho mahoway has taw. 16Yakanga ka goyan gomona wan hanggan ka gona imgoyan man. 17Da Hisos noglahaw yapdi has bohid, has banwa Hirosalim baliwa, is Hisos nafasaman ka safolo ha dowak katogbong gis fakaaywanan. Ta noglahaw yapdi is Hisos igfwayong has taw kiti, 18Yabay, tam hawam bohid has Hirosalim kati. No sinya wan ta fagamat angko, aho Kanbali Taw, has manga fagtahinan fagalan-han-Diyos hanggan has mangag faadal Batasan Hodyo. Tonya fag manga taw fatohoyan angko has kahatayan. 19Ta fabahala yadingko has manga Hintil. Ka manga Hintil yomod angko, manga bomakbak, ginya pomako angko sas nafatimbangan hayo. Dapat ay, ahom boyag ya sas fatolo fag sirang. 20Ginyan Sibidiyo babay hanggan wat manga anak naakbang han Hisos, nanlingkohodan sat atobangan, ha fagsagadon. 21Is Hisos iglwang, Kanam fagsagadon gingko? Ka ina nasagot, Haw faangayan nangos tongko manga anak dowa fag ha kangayanan igtokaw sa hyamo akbang, haw nombali hari, insadi sam balis sihon, insadi sam balis wala. 22Is Hisos iglwang, Ham idwa twa hayo fagsagadon. Ham awkin syagan omagwanta ominom gingko fanginoman kahoriyan aban? Taglwang, Ala, mi somyagan di. 23Is Hisos iglwang, Ham ominom ngay gingko fanginoman aban. Dapat bonwa aho ka bahalag fili no faktaw ka tomokaw aban sangko balis sihon, ngatay balis wala. Ka hayo faglwangon tokawan, angko Ama ka danwa nafatalaga no faktaw ka tomokaw sinya. 24In Hisos manga katogbong tiba, safolo, no nadog ista fagsagadon, ta kahori wa dahol tonya fag dowak fadwasay. 25Yakangas Hisos nafaakbang ha hanya it manga katogbong fagayo, ginyag lwang, Ham fadi wadtwa kitay ka manga fagtahinan Hintil ha takan nogbahala has taw, hanggan ista manga gorangon igbaya wagfasognod it sakop. 26Dapat ham fagayo fag idwa kitonya. Yatokitay, nyawa fakta sa hayo ka kasaya kabali abwat it kangayanan, fag kabali di ngap hayo sogowan. 27Nyawa faktaw ka kasaya kabali fagtahinan, fag kabali di ngap bilang hayo nasali sogowan, 28kitongko, aho Kanbali Taw, kanbangkad hastay, bohonwa kitay aho kasta fagtogbongon, fag aho di ngap ka tomogbong is taw, hanggan igdisag angko haboyagan ka fangafiyan, kaarakitay tomobos has fakaaywanan taw. 29Da Hisos nontolas gis banwa Hiriko, aywan ka goyan gin Hisos ginanan. 30Yabay, ha dowak ama, pariho bota, matokawan sas bilog dalan. Ta nogdog kitay is Hisos igdalan wa sinya, tagharokyawan wan, taglwang, Haw, in Dabid hasokfonan Anak, haw fakaawa hyami. 31Manga taw nangabaya ka manga bota, tadwag faawang nangos. Dapat ka manga bota kadahol di ngap nogrokyaw, igsakitan wan, Hyami Fon, haw in Dabid hasokfonan Anak, haw fakaawa hyami. 32Is Hisos intorosan, natawag has bota, naintaw, Kana ka hayo fakasayaon angko togbongon ha hayo? 33Tagsagot kitay, Haw kagfon hyami, hyami mata fag imfoga ya nangos. 34Is Hisos in-awa ngay, naayohap ista manga mata. Yakanga infoga wa dagos, ginya madi ta natahin wan Hisos.

will be added

X\