MATIYO 19

1Ginyas Hisos nontabo wagtoltol tonya fag manga halimbawa, ta nalahaw wan gis Galiliya, hawas banwanan Hodiya sas difay safa Hordan. 2Kaaywanon fag manga taw ka naoyan hanya, hanggan is Hisos nafafiya yadi ista manga sagit sinya. 3Ha manga Farisiyo naakbang han Hisos, naintaw hanya, igtikis wa nangos igfasalan hanya. Taglwang, Maangay di awkin has Batasan Hodyo ka ama no omobon it babay ngadi kana kat fasingyanan? 4Is Hisos nasagot, Ham awkin idwa nabasa sas Kasoratan kitay, gis fabagowanan, kawa Nahalig taw nahalig ama hanggan ina? 5Hanya yadi ka nalwang kitay, Kawa nahalig kitonya, ka ama somaman wa git manga ama manga ina, ginya ka talsawa mangofodan wan, tambali wa sadi di. 6Yakanga ginya wa ginan fawa dowa, dapat tanbali sadi di. Kan Diyos nafasadi, fag idwa ha taw igfasarowayan. 7Ka manga Farisiyo naintaw ya in Hisos kiti, No kitonya, kana mayon is Mwisis no natogon kitay ka ama domisag yap fangobonan kasoratan hat babay, bago di gobon hanya? 8Is Hisos nasagot, Kawa hayo manga fangayofan myasa wa maganit, is Mwisis nafaangay yadi wan nyawa mangodgobonan. Dapat no gi dis bago bago idwa kitonya. 9Yakanga hogfwayong ha hayo, nyawa fakta fag ama no omobon it babay, no bohonwa kitay it babay fabayowan wa dahol, ginya bomabay has iba ina, yagfabayowan wan. Hanggan ka bomabay ista nagobonan igfabayowan yadi wan. 10In Hisos manga katogbong nafwayong hanya, No kitonya mangharaw, ka ama fiya man nodwa hara igbabay. 11Dapat is Hisos nasagot kiti, Idwa fagayo omagwanta kitay idwa bomabay, no bohonwa kan Diyos kafangayofanan fag kitonya. 12Maskin bokod bokod ista fadalanan, manga ama idwa kasaya bomabay. Tiba kawa gis anak dararag danwa kitonya, tiba kawasta naibolon ha hanya, yakanga idwa kasaya ina, ginya madi ha akwa yadi tiba kagtikis wadwag babay kaarakitay tomogbong in Diyos banwanan fag sakop. Ka omagwanta kitonya fag tomonglos kitonya. 13Ginya madi, ha akwa manga taw nataban manga anak han Hisos kaarakitay is Hisos fomwalid it gamat sas manga anak baba alfoyo, hanggan mandarangin. In Hisos manga katogbong nangabaya was taw. 14Dapat is Hisos iglwang, Ham hawa kabaya ka manga anak no gakbang angko. Ham fag idwag toplan tonya maskin ka ha fangayofan kitos anak ka omafo in Diyos banwanan fag sakop. 15Is Hisos nafwalid di ngay it gamat sas manga anak baba alfoyo, ginya nalahaw wan. 16Ginya yabay ha sadik anahan naakbang han Hisos, naintaw kiti, Haw kagfaadal, kana kangko bato ibolonon ka fiya, kaarakitay ho lomag haboyagan kadwa ha katabowanan? 17Is Hisos nasagot, Kana haw no gintaw angko no kana ka fiya? Sadi lamang ka fiya. Haw no kasaya tomanggap ka haboyagan, haw fag katanog ka manga Batasan Hodyo. 18Hanya naintaw, Kana kin nangos fag manga Batasan? Is Hisos nasagot, Haw fag idwag fahatay taw. Haw fag idwag fabayowan, haw fag idwag nahaw, haw fag idwag bangdan is taw. 19Haw fag idwag falamang im ama hanggan im ina, hanggan fag kito yadim sadili habilogan haw no kaawa im kapariho. 20Ka anahan nalwang, Gwadi ho katanog wa tonya fagayo. Kana yapdi araw angko bato ibolonon? 21Is Hisos nasagot kiti, Haw no kasaya kitay fag kabali hosto wa fiya fiya, haw fagoli wan, fasaliyan im manga botang fagayo fagayo, ginya ha fahafodan has manga myabog it manga sali, ginya yabay, haw ha akwa wa kaakwaan san Diyos banwanan sam tongod. Ginya madi, ha fag hayastay, tahinan wangko. 22Ka anahan no nadog kitonya, nalahaw wan, inbalaw digdog, maskin hanya maakwa wa dahol. 23Ginyas Hisos nafwayong hat manga katogbong, Hogfwayong ha hayo, bonwa bohag, ka maakwa fag taw mahori kaaktom han Diyos banwanan fag sakop. 24Hogfwayong ya ha hayo, malpos man ka hayopan kamilyo nogdalan has basad toho dagom has taw maakwa nogfasakop han Diyos. 25In Hisos manga katogbong indolaw wa dahol igdog it fwayong, yakanga ta naintaw kiti, No kitonya mangharaw, fakta fag manga taw kambawi? 26Is Hisos no mabantayan hat manga katogbong, iglwang, No taw di, idwa ha somyagan omibolon tonya, dapat is Diyos syagan di omibolon fagayo. 27Ginyas Pidro iglwang, Lag nga hami kati, mi naobon wa hyami akwa fagayo a, mi natahin wa hyamo. Kana ara kin ka hyami? 28Is Hisos nafwayong has taw, Fanlag nga aban, aho, Kanbali Taw, no tomokaw wan sangko fanokawan gorangon sas bago fag daga, ham kagtahin angko kati, ham tomokaw yadi sas safolo ha dowak fanokawan gorangon kaarakitay kabali manga fangabaya in Israil safolo ha dowak layonan taw. 29Nyawa faktaw no gobon it balay, ngatay it manga fadwasay, ngatay it ama hanggan ina, ngatay it manga anak, ngatay hanggan it manga daga, kawa ahot fagalwasiyon, kayonya fag gatos it tanggapon, ginya madi tomanggap yadi haboyagan kadwa ha katabowanan. 30Dapat aywan ka gona imgoyan man, hanggan ka goyan gomona wa aban.

will be added

X\