MATIYO 14

1Gis nanya fag masohod in Hisos manga naibolon indahit han Hirodis ista gorangon sas sakop Galiliya. 2Ginyas Hirodis nafwayong hat sadili manga sogowan, Tos Hwan kagfatogna manga taw hyabi. Hanyan boyag ya mangharaw, yakanga syagan gibolon manga madolaw fag manga bagay. 3No kitay di, hyabi is Hirodis mandi ka nafagamat has manga taw in Hwan, nafagafos yadi, ginya nafaporiso wan kawas Hwan naato in Hirodis, maskin is Hirodis nabol it tagyaw, is Hirodiyas, in Filipi babay. 4Is Hwan fagaba kabaya in Hirodis, hanya nalwang, Idwa fiya haw no kagaw im tagyaw. 5Yakangas Hirodis kasayag fahatay in Hwan, dapat hanya kadala ka manga Hodyo, maskin ta natwa waglag kitay is Hwan in Diyos fangampang. 6Ginya madi aban, gis nanya fag masohod ta nogtohod in Hirodis kasagayan, in Hirodiyas anak ina natayok san Hirodis manga fakilalaon faglagan. Labi was Hirodis insaya waglag, 7yakanga hanya nafatohoyan has dayaga, nalwang, Nyawa kanam fagsagadon ho domisag wa ha hyamo. 8Ka dayaga naolit kat ina nafasognod, kitay, Kati wan, disagan angko sas basad finggan, in Hwan alfoyo, ka Hwan kagfatogna manga taw hyabi. 9Is Hirodis no nadog ka dayaga fagsagadon, hanyan rongkot wan, dapat idwa nasyagan nabawit hampang kawat manga fakilalaon nadog wat nafatohoyan has dayaga, yakanga nafasognod has taw kitay, Disagan has dayaga it fagsagadon. 10Yakangas Hirodis nafalifong is taw in Hwan liyog. 11Ta nafwalid ka alfoyo sas basad finggan, ginya nadisag has dayaga. Ka dayaga nadiya wan hat ina. 12Araw in Hwan manga katogbong hawas porisowan, nabol in Hwan habilogan, nalobgob wan. Ginya ta nafwayong han Hisos no kinday kasta naibolon han Hwan. 13Is Hisos no nadog di ngay kitonya, nasahay wan basad baloto, ginya hawas difay linaw, somaman yap nangos gis fakaaywanan fag manga taw. Dapat ka fakaaywanan fag manga taw no nadog kitay is Hisos hanya wan, tanbangkad gis manga banwa, nalahaw baba daga, natagbo hanya. 14Is Hisos no nadokson sat nakadagsaan, iglag ka manga taw kaaywanon. Hanyan awa waglag is taw, hanggan nafafiya ka manga ha sagit kasta nataban hanya. 15Ginya madi, araw, myanit no kabalihid wan, in Hisos manga katogbong hawan Hisos, iglwang, Tam istay sawas basad fakahyabogan, ka myanit kasangday yadi wan. Falahawan yap nangos has manga tifonan balay sas ligongan ka manga taw, kaarakitay ta manali ista sadili fanganon. 16Is Hisos iglwang, Ham hawag falahaw ka manga taw, fag ham wa ka domisag fanganon has taw. 17Taglwang, Tam idwa hanon nodwa limak tinapay, dowak oyang. 18Is Hisos iglwang, Ham diyan hastay. 19Ginyas Hisos nafatokaw sas baba lamnon ka manga taw. Ginya no nabol ka limak tinapay hanggan dowak oyang, natangdan has tongod a, nabaya han Diyos ka fanganon. Ginyas Hisos nafaarogbotan ka manga tinapay a, nadisag hat manga katogbong, ginya ka manga katogbong nahoray has manga taw. 20Ginya madi fagayo nangwan wa a, napsog wan. Ta natifon ista sawad nakanan mafaarogbotan safolo ya ha dowak boyog ka napno. 21Manga 5,000 ka manga ama ka nahwan, bokod wa ka manga ina, hanggan manga anak. 22Ginyas Hisos dagos wa nafasahay has basad baloto it manga katogbong, nafagona wa has difay linaw dahol. Is Hisos in-goyan yapdi, bago di nafaoli ka fakaaywanan fag manga taw. 23Ka manga taw nonlahaw wan, is Hisos nalahaw yadi wa has baba moyod kaarakitay mandarangin. Inyabi wa sinya sas baba moyod. Is Hisos idwam dowa sinya, 24dapat ka baloto sawas baba linaw, ayayo gis gobang, manga taob bilang wagsampok, kawa bagyo marigon nogsoba wa has bohid. 25Dapat, no kayawa wan, is Hisos naoyan yadi wat manga katogbong, nalahaw sas baba danom. 26Dapat ay, it manga katogbong kadala wa dahol dahol iglag, taglag haglahaw sas baba danom. Tagrokyaw wan, Tya labang wan. 27Dapat is Hisos nadagos wa ngap nahampang has taw, nalwang, Ham fag idwa kadala, aho di. 28Is Pidro nalwang, Angko Fon, no haw wa ngay, haw falahawan yadi wangko sas baba danom. 29Is Hisos nasagot, Fag hastay ngay. Yakangas Pidro nadokson gis basad baloto, nalahaw yadi wa has baba danom, hawan Hisos baliwa. 30Dapat is Pidro no bago di naayfan kitay ha bagyo mangharaw, indala wan, hanya ganong wan tabon has daga danom. Is Pidro natawag, Angko Fon, angko Fon, ha salahapan wangko. 31Is Hisos nadagos wa nasalahap yabay. Ginya nalwang han Pidro, Laya hadwa bangan igsyag hangko maskin. Kana mayon haw no gadowan? 32Ta nonsahay has basad baloto, ka bagyo dagos wantohas. 33Ka manga taw basad baloto nafasayagdog in Hisos, taglwang, Haw orongan wa in Diyos Anak. 34Ta no nadifay ka linaw dahol, tandagsa wan sas banwa Ginisarit. 35Ka manga taga sinya no nahilala in Hisos, ta dagos wa nafadahit has manga taw sinyasta ligongan kitay is Hisos indasog wan. Yakanga ta nataban hanya fagayo ka ha manga sagit. 36Tagsagad kitay, Ha fatawidan di ngay ka manga ha sagit, ngadim tobwan rotay, kaarakitay tamfiya wan. Fagayo ka natawid infiya ngay.

will be added

X\