MATIYO 13

1Gis nanya yadi fag sirang is Hisos nalahaw wa gis balay, natokaw sas bahalan linaw dahol. 2Manga taw kaaywanon nagobok in Hisos, yakangas Hisos nasakbaw has basad baloto baba danom, akbang has bahalan linaw, sinyak matokawan. Ka fakaaywanan fag manga taw sinya dik malindogan sas baba daga sas bahalan linaw. 3Yabay is Hisos igfaadal has taw sinya, sayapdis manga halimbawa dapat. Hanyag lwang kiti, Sadik ama fangiyab hawat namay kaarakitay mamamgas. 4Hanya nogfamgas, igsabod odit binhi, yakanga tibak botol indagdag has boknga dalan. Ka manga manok indasog a, nahwan wa tonya. 5Ha akwa yadi manga botol indagdag has daga libabaw, baba odi dalifi. No kitay di dagos wa natobo kawa libabaw maskin ka daga sinya. 6Ka myanit no nasalog sinya, myanit wa dahol dahol. Kat manga tobo inlayong di, maskin idwa ha dalid abasad. 7Ha manga bolhog yadin dagdag ha sayo manga lamnon madogi. Ka manga lamnon inlangba, nasakfaw di ka manga tanom, ka manga tanom nadaogan di lamnon. 8Dapat ay, ha akwa yadi manga botol kandagdag has fiya fag daga, yabay nabohad wan. Ha akwa nabohad sadik daan bolhog, tiba onom ik safolok bolhog, tiba tolok safolo. 9Ham no ha manga talinga ya ngadi, fag talinga wan. 10Araw in Hisos manga katogbong naakbang hanya, naintaw kitay, Kana mayon haw nogfadalan yapdi las manga halimbawa hyamo bato toltolon has taw? 11Is Hisos nasagot, Indisag wa ha hayo kitay, ham fag tomwa ka mangadwag fadogon kawa han Diyos banwanan fag sakop baliwa, dapat idyapdin disag has taw. 12Maskin ka danwa ha akwa ho domogang ya hanya, im-aywan, dapat kadwa ha akwa bangan, nyawa hara ha akwa ogbot ogbot sa hanya, tonya abam bol di. 13Maskin kitonya, sa yapdis manga halimbawa aho nogtoltol has taw, maskin nyawa tagbantay, tadwaglag, nyawa tagtalinga, tadwagdog, yakanga idwa yadi twagdog. 14In Isayas faglwangon kawa hanya fag manga taw in-anod wan, hanya noglwang, Nyawa ham igdog fagaba, ham idwa yadi tomwa wagdog. Nyawa ham iglag fagaba, ham idwa yadi tomwa waglag no kana tonya 15Maskin to fag manga taw in-ganit ista manga fangayofan Ngadit manga talinga dayo wagdog, Tagfotikan wan it manga mata, Maskin ta dayo waglag, Ta dayo yadi wagdog. Ista fangayofan ta fag idwa yadi tomwagdog. Ta kafang kafwali hangko, Dayo yadig soyo, Tadwa kasaya kitay aho fag fafiya is taw. 16Dapat ham igbaya wan ka hayo mata lagan madolaw fagaba, hanggan ka hayo manga talinga donggon madolaw. 17Hogfwayong ha hayo, no kitay di, aywan in Diyos manga fangampang, hanggan fiya fag manga taw hyabi hyabi, kasaya wa dahol lomag ka hayo lagan kati, ka tadyapdi nalag hyabi. Ta gwayan wa kasaya nangos fag domog wa haraw ka hayo donggon kati, ka tadyapdi nadog hyabi. 18Kati dog ngay it kahologan ka halimbawa kawa hasagfamgas baliwa. 19Ka mangagdog ka toltol kawa han Diyos sakop baliwa, dapat idwa twagdog tonya, ka kitos manga botol kandagdag boknga dalan. Is Satanas indasog di ngay, igbol lamang kansabod sasta basad fangayofan. 20Ka botol kansabod has sayo baba dalifi igfahalimbawa ka manga taw kagtalinga ka toltol, igtanggap wa dagos, masolong wan no kitay di. 21Dapat idwag dalid abasad sasta basad fangayofan. Ngalay di gagwanta, maskin no ha donggon ya nga manga mahori, ngatay tagfahoriyan hanya maskin katiwala ka toltol, dagos wagdayo. 22Kandagdag ha sayo manga lamnon madogi igfahalimbawa ka mangag talinga has toltol, dapat it manga kakorangan istay is baba daga kat fagisipon fagaba, ngatay kawili wa dahol ka kaakwaan, yakanga nasakfaw ka Toltol sat basad fangayofan, yakanga tonya idwa nabohad. 23Dapat ay, ka botol kansabod sas fiya fag daga igfahalimbawa ka mangag talinga ka Toltol hanggan natwa wagdog tonya. Ginya yabay nabohad sinya, tiba sadik daan, tiba onom ik safolo, tiba tolok safolo. 24Is Hisos natoltol sadi yak halimbawa has taw, nalwang kitay, Kiti kan Diyos banwanan fag sakop, nogfahalimbawa, kitos sadik taw nafamgas fiya fag botol sat baba namay. 25Ta no matoyogan araw, basad yabi, it kalaban nasabod kadwa fiya fag bolhog lamnon hasta basad namay tirigo, ginya nwali wan. 26Ka tirigo no natobo hanggan kaboskad wat borak, inlag yadi wa ka manga dwat fag lamnon sinya maaktoman sayo tirigo. 27Yakanga ka manga sogowan hawasagfon namay, iglwang kitay, Bohonwa awkin fiya fag manga botol ka hayo tanom? Kana mayon no ha manga lamnon kati? 28Kagfon namay nasagot, Angko kalaban sadi ka nasabod tonya. It manga sogowan naintaw hanya, Ha awkin kasaya mi nangos fag gomoyod tonya? 29Kagfon istaw nasagot, Ham fag idwa goyod, ngandayo hanggan wa ka tirigo imtahin. 30Ham fabayaanan wan hanggan fanganiyon. Tam aba no gani wan ho fomwayong has manga fangani, Tifonan yap ka manga lamnon, ham fogongan wa fogongan wan kaarakitay somonog, ginya madi ka tirigo ham tifonan wan hangko basad dongdong. 31Is Hisos natoltol sadi yak halimbawa has taw, iglwang, Nogfahalimbawa in Diyos banwanan fag sakop kiti wan. Ha sadik taw igtanom sadik botol mostasa sat baba iyab. 32Kat natanom hat basad iyab ka ogbot man has fagayo fag botol, dapat no natobo wan, kabali dahol man has fagayo fag fangofiyon. Kabali wa fon hayo it kadaholan, manok digfogad wan sat baba sanga. 33Is Hisos natoltol ya ngay sadi yak halimbawa, In Diyos banwanan fag sakop kitos famadahol tinapay ka sadik ina nafaaktom sas tolok sarok harina, hanggan wandahol sadi wak dahonya. 34To fagayo is Hisos natoltol has fakaaywanan fag manga taw sas manga halimbawa, idwa yadig toltol has fakaaywanan no bohonwa las halimbawa. 35Is Hisos natoltol kitonya kaarakitay ka fangampang fwayong hyabi im-anod kitay, Las manga halimbawa lamang ho no homampang has taw, Ho fadog has taw ka manga idyapdin dog gi yapdis kalig daga. 36Ginya madis Hisos naobon wa ka fakaaywanan fag manga taw, nasakbaw wa has basad balay. It manga katogbong naakbang ha hanya, iglwang, Ha fatwaan igdog hyami ka toltolan ka dwat fag lamnon sas basad namay. 37Is Hisos nasagot has taw, Kagtanom fiya fag botol kawa aho, Kanbali Taw. 38Ka namay kawastay sas baba daga. Ka fiya fag botol kawan Diyos sakop fag manga taw, hanggan ka dwat fag lamnon in Fandaya sakop fag manga taw. 39Ka kalaban kagtanom tonya idwa ha iba, kawas Fandaya. Ka fanganiyon sawas katabowanan fag sirang hanggan ka manga gani kawa manga anghil. 40No kinday nontifon ka manga lamnon hanggan insonog, kitonya yadi aba kamlag sas katabowanan fag sirang. 41Aho, Kanbali Taw, somogo angko manga anghil aban, ta domayo a, tomifon fagayo kagfasayag dog has dwat iba taw, hanggan ka gogali yadi dwat, ka maaktoman sangko sakop, 42omokas yadi tonya ha basad fadosaan afoy. Sinya ta mangodgorawan, hanggan wasta ngifon di mangarigitan wan. 43Dapat ay, ka mangan tohoyan han Diyos bilang wagyawa kitos myanit sat Ama sakop aban. Ham no ha manga talinga ya ngadi, fag talinga wan. 44In Diyos banwanan fag sakop kitos kaakwaan malobgoban basad iyab. Sadik taw no nangodkod sinya nalag wan, ginya madi natabon ya. Nabaya wa dahol dahol kat lagan matagowan basad daga. Yakanga nafasali it manga botang fagayo, ginya nasali tonya fag iyab. 45Kitonya yadi in Diyos banwanan fag sakop, kitos sadik fanlako kagsayak manga mahalga fag ono. 46No nalag nga sadik ono kafiyaon, hanya nafasali it manga botang fagayo fagayo, ginya nasali ka ono mahalga. 47In Diyos banwanan fag sakop kito yadis sadik sarap dahol kasta fagokason ha basad dagat, giktan yadi bokod bokod fag manga oyang. 48Ka sarap no napno ta nagoyod has bahalan bintalan. Ginya ka manga taw intokaw wan, igfalayon ka manga oyang bokod bokod. Ka fiya fag oyang ta natifon sasta basad sohadan, dapat naokas lamang kadwa fiya fag manga oyang. 49Kitonya yadi kamlag aban sas katabowanan fag sirang. Ka manga anghil imbangkad falayon ka manga ha ogali dwat hanggan ka mangan bokod han Diyos, 50omokas ha basad fadosaan afoy ka ha manga ogali dwat. Sinya ta mangodgorawan hanggan wasta ngifon di mangarigitan wan. 51Is Hisos naintaw has taw, Ngatay ham natwa wagdog tonya fagayo? Taglwang, Ala. 52Yakangas Hisos iglwang, Kawa kitonya fagayo kagfaadal Batasan Hodyo nombali yadi in Diyos banwanan fag sakop it katogbong, kitosagfon balay kagbangkad git fwalidan manga botang fiya fag bagay bago, hanggan ka gona. 53Nontabo wagtoltol to fag manga halimbawa, is Hisos inlahaw wa ginya. 54No nwali hat sadili banwanan, is Hisos igtoltol sasta basad fanimbaan. Ka manga matalingan kataka wagdog, taglwang, To fag taw gindak nabol it kadonongan? Twa oman gibolon kitonya fag manga madolaw? 55Bohonwa awkin it ama ka famanday balay? Bohonwa awkin it ina is Mariya, hanggan da Santyago, da Hosi, da Simon, da Hodas, it manga fadwasay ama? 56Idwa awkin istay yadik maoliyanan it manga fadwasay ina? Gindak nabol to fag kadonongan fagayo? 57Yakanga tadwa katalinga in Hisos. Dapat is Hisos nafwayong has taw, Nyawa siday manga taw magalang has fangampang, nodwa sat sadili banwanan, ngatay sat sadili talanahan. 58Yakangas Hisos idwa naibolon aywan fag manga madolaw sinya maskin tadwa katiwala hanya.

will be added

X\