MATIYO 11

1Is Hisos natogon di ngay hat manga katogbong Safolo ha Dowa, ginyan lahaw ya ngawan kaarakitay mamwayong, mamaadal ya has manga banwa sinyat akbang. 2Is Hwan kagfatogna manga taw hyabi sayapdis basad porisowan gis nanya. It manga katogbong nafadahit han Hwan in Kiristo manga naibolon, yakangas Hwan nasogo yadit manga sogowan hanya. 3Ta nangos intawan han Hisos kitay, Haw awkin kawan Diyos natogon kitay imbangkad hastay, ngatay mi ha fagfanayaon yapdi sadi ya? 4Is Hisos nasagot kiti, Ham fag goli ya ngawan han Hwan, ham fwayongan ka hayo donggon hanggan lagan. 5Fag fwayong kitay, ka manga bota infoga ya ngat mata, ka mangan fihong it bitis iglahaw ya, ka manga ha kitong infiya yadi wan hanggan ka manga bongkok igdog ya, ka manga natay inboyag ya yadi, hanggan ka Fiya fag Barita nafaadal has manga myabog. 6Ka taw kadwa gadowan igsyag angko bomaya wan. 7In Hwan manga katogbong nonlahaw, Is Hisos nafwayong has manga taw kawa han Hwan, iglwang, Kana mayon hyabi ham no hawas basad fakahyabogan? Kana ka hayo fagasolopon sinya? Ham awkin kasayaglag ka bagyo nogfafarayfayan igfafarayfayan ka iyano? 8Kana ham no hanya? Ngatay hayo fagasolopon sinya sadik taw myasa wa fiya it manga solong rotay? Gwadi sawasta gorangon balay ka myasa wa fiya it manga solong rotay. 9Kana ka orongan hayo fagasolopon sinya? Ngatay in Diyos fangampang sadi? Ala ngay, tonya wan, hanggan hogfwayong ha hayo ka hayo lagan sinya it kangayanan bohondi kito kan Diyos manga fangampang. 10Maskin is Hwan kat faglwangon sas Kasoratan, noglwang kiti, Fanlag ngay, hogsogo angko sogowan ka gomona hyamo. Hanya mamatalaga hyamo bato lahawan. 11Hogfwayong ha hayo idya ha anak kansagaya git ina ka abwat man in Hwan kangayanan, ka Hwan kagfatogna manga taw, dapat ka ogbot man has fagayo san Diyos sakop, it kangayanan abwat man in Hwan. 12Giwan Hwan igfaadal ka barita, hanggan balis kati, kan Diyos banwanan fag sakop igdog mahori hanggan ka maisog fag manga taw igpilit wa omaktom sinya fag sakop fag manga taw. 13Maskin hyabi hyabi in Diyos manga fangampang hanggan ka Batasan Hodyo nagona wa nafwayong kawa han Diyos banwanan fag sakop, hanggan was Hwan nafwayong yadi hanya baliwa. 14Ham no kasaya yadim tiwala, hanya is Iliyas ka hastay. 15Ham no ha manga talinga ya ngadi, fag talinga wan. 16Kinda odi kin angko fatoladan ka kati fag manga masohod fag manga taw, ham gayfan? Kito odis manga anak matokawan sas famahowayan, igtawag hat manga ofod anak, iglwang, 17Mi fadi wad nafaoni palawta, dapat ham kafang digtayok, Nyawa hami nangodgorawan, ham kafang yadi goraw. 18Kawas Hwan nonbangkad hastay, nomtoon idwa kwan hanon kaarakitay mandarangin, idwa yadi ginom alak, ginya taglwang, hono, Labang wa kagfon in Hwan. 19Ginya madi, aho man, Kanbali Taw, inbangkad hastay, kwan yadi hanon hanggan ginom kitos iba taw, ginya taglwang, Yabay, to fag taw, mahogod wa kwan a, iglango ya ngadi, koyog yadi has mangag falo igsohot bohis Roma hanggan has tiba taw ka ha dwat fag manga ogali. Nyawa taglwang kitonya, in Diyos manga ibolon kagfatohoyan kitay in Diyos kadonongan myasa wa fiya. 20Ginya madis Hisos nangabaya ka manga banwa kat nafalag ka fakaaywanan fag manga ibolon madolaw sinya, maskin tadwa nasoyo, idwa yadi nadayo it manga ogali dwat. 21Isyay wa, isyay wan, haw, banwa Korasin. Isyay wa, isyay wan haw, banwa Bitsayda, maskin ka manga taga Tiro hanggan taga Sidon no nalag di ka hayo manga lagan madolaw, ta dan wa nasolong manga sako hyabi yapdi, hanggan natokaw sas fogis dafog kaarakitay igfalag kitay tagsoyo wan. 22Dapat hogfwayong ha hayo, gis nanya aban, sas Sirang Fangabayan, ka fadosaan kamtohoyan ha hayo bohondi kito kamtohoyan has manga taga Tiro hanggan manga taga Sidon. 23Haw yadi, banwa Kapirnaom, Haw aw kasayag faabwaton hyamo han Diyos banwanan sam tongod? Dapat ho fadagdag lamang hyamo hawas Daga Salad. Maskin no nangos sadis Sodoma no nalag ka hyamo lagan madolaw kati, ka banwa Sodoma idwa ara indwat, hanggan kati sinya yapdi. 24Dapat hogfwayong ha hayo, sas Sirang Fangabayan aban, im fadosaan bohondi kito ka fadosaan kandalan hyabi sas banwa Sodoma. 25Gis nanya fag masohod is Hisos nalwang, Mama, haw kagfon im banwanan sam tongod hanggan ka daga, hogbaya hyamo, maskin no hadis manga madonong, manga ha nagadalan, hadyag fatwagdog to fag manga bagay, dapat hagfatwagdog fiya fiya has manga taw kat fangayofan kito yapdis manga anak it fakatwawon. 26Anod mama, maskin kitonya ngay kam fakasayaon. 27Ginyas Hisos nalwang has taw, Angko Ama ka nafaano hangko fagayo fag manga bagay. Idwa ha kilala angko, in Diyos Anak no bohonwa angko Ama. Idwa yadi ha kilala in Diyos angko Ama, no bohonwa aho, kat Anak, hanggan nyawa kayoday angko fagfaangayon mamahilala has taw angko Ama. 28Ham fagayo ka kayaya basad fangayofan, fag gakbang wangko, kawa ham kabyat hayo manga fasan, ho fahoway hayo. 29Fasablayan angko singkaw ha hayo, ham fag gadal gingko. Kawa aho mahoway, idwa yadi ha takan, yakanga hayo fangayofan lomag yadi wa kahowayan. 30Maskin angko singkaw fiya wa donggon, malokmay a, angko fafasanon ha hayo magan wa dahol.

will be added

X\