MATIYO 10

1Is Hisos nafatifon ka safolo ha dowak katogbong, ginya nafalobos has taw it kangayanan has mangag faalin manga labang hanggan igfafiya manga sagit. 2To kasta manga ngayan ka safolo ha dowak Fandiya Barita. Bago bago is Simon kasta faglwangon is Pidro, hanggan is Andris it fadwasay. Da Santyago da Hwan in Sibidiyo manga anak, 3da Filipi da Bartolomi, da Tomas da Matiyo, ka fanohot bohis, in Santyago sangay kan Alfiyo anak, hanggan is Tadiyo. 4In Simon yadi sangay kagbaliwa it manga kapariho Hodyo, hanggan is Hodas Iskariyoti ka naoyon in Hisos kalaban. 5Is Hisos nasogo tonya fag safolo ha dowak Fandiya Barita, natogon kiti, Ham fag idwa has manga banwanan Hintil, fag idwa yadi has manga banwa manga taga Samariya. 6Ham fag sayak yapdi ka manga topa kanliyam san Israil sakop fag manga banwanan. 7Ham noglahaw wan, fag faadal has taw kitay ka gin Diyos banwanan sam tongod kaakbang wa aba kabali hari. 8Ham fag fafiya ka manga ha sagit, faboyagan yadi ka manga natay. Fafiyaan ya ka manga ha sagit kitong, faalinan yadi gistaw ka manga labang. Ka hayo natanggap idwa ha bayad, yakanga ham nogdisag has taw fag idwa yadi ha bayad. 9Ham fag idwag diya kwarta, nyawa ginto, nyawa pilak, nyawa tanso sa hayo hagkos. 10Ham fag idwa yadi ha diya boyog, ham noglahaw, nyawa hayo falhosan rotay, nyawa fanobos lapak, nyawa sokod, fag idwa ha diya, maskin ka fangibolon fiya di tomanggap it fangaboyagon. 11Nyawa siday fag banwa, ngatay tifonan balay, ham nomdasog sinya, ham sayahan ka taw danwasta fakilalaon fiya fiya sinya. Ham fag sinya wak domogayan no baliday ham sinya yapdi. 12Ham nogsakbaw sasta balay ham fag lwang, Fag ka kahowayan kagbahala istay sa hayo balay. 13Ka manga taw sinya fag balay no fiya it manga ogali, ham fag mahoway odi has manga taw sinya kito hayo nafwayong. Dapat nodwa fiya, bawiyan hayo fwayong. 14Sa sadik balay, ngatay banwa, ta no kafang igfasakbaw hayo, kafang yadi igtalinga, ham noglahaw wa ginya, fadagdagan yadi ka manga fogis daga gi hayo manga bitis. 15Hogfwayong ha hayo, bonwa bohag, ista fadosaan aban, sas Sirang Fangabaya bohondi kito ka fadosaan sas manga banwa Sodoma hanggan Gomora. 16Kati yabay, hogsogo hayo bomarita, bilang manga topa magop magop sas fagbokngan manga ido maisog. Yakanga ham fag bilang wa abyanon no maaman, dapat ham fag kito was limohon ik mahoway. 17Ham fag matagahan maskin ha manga taw aban fagamat hayo hasag talinga hampangan. Ta fabakbak yadi hayo sas manga fanimbaan Hodyo. 18Maskin aho hayo fagalwasiyon, ta gomoyod hayo has atobangan manga gobirnador hanggan manga gorangon. Ham mamaorongan sasta fagdogan, hanggan sas fagdogan manga Hintil. 19Ta nogfagamat hayo has taw, ham fag idwa galibitan hayo bato fwayongon ngatay no kinday ham no somagot. Nomdasog gis nanya fag masohod aban, is Diyos fatohod hayo hampang bato sagoton has taw. 20Maskin hayo hampang aban idwa gi hayo sadili fangayofan, ka hayo hampang gi wa hayo Ama it Falad ka faisip hayo. 21Aban kayadit fadwasay kagfagamat it fadwasay has iba taw kaarakitay ta fahatay hanya, kitonya yadi kat ama hat sadili yadi anak. Manga anak lomaban it magorang, fasognod has iba taw kitay fahatayan wan. 22Maskin aho hayo fagalwasiyon, fagayo fag manga taw kadwat iglag hayo aban, dapat kadwag fagomon hanggan wa has katabowanan, hanya wa kambawi. 23Ta nogfahoriyan hayo sa sadik banwa, ham fag lagyo ha sadi yak banwa. Hogfwayong ha hayo, ham idya domasog has fagayo fag manga banwa sas Israil, aho Kanbali Taw, nombangkad ya. 24Idwa ha katogbong ha kangayanan abwat man hasag faadal hanya. Kitonya yadi idwa ha sogowan ha kangayanan abwat man hat fon kangayanan. 25Ka katogbong nogtolad kagfaadal hanya, fiya wan, hanggan ka sogowan nogtolad yadi kagfon hanya. Ta nogngayan kagfon balay is Biilsibol, labi man inyak dwat ta no ngomayan it manga ofod. 26Yakanga ham fag idwa kadalas taw. Ka manga matagowan kati fadi wadamlag aban. Fadi wamfyalom aban, imdog di has fagayo. 27Kangko fwayong ha hayo basad marom, olitan ya sas basad mayawa, kasta nainas ha hayo, ham fag golit igtawag fiya fiya sas sokayan sasta fanifonan. 28Ham fag idwa kadala kagfahatay habilogan taw, dapat idwa syagan igfahatay hayo falad. Yatokitay, ka syagan igfadwat habilogan hanggan falad sas basad fadosaan afoy, fag tonya wa ka hayo fakadalaon. 29Idwa awkin tam nogfasali dowak maya sadi dik saga it halga? Nyawa kitonya, no bohonwa hayo Ama kafangayofanan, nyawa sadik maya idwam dagdag has baba daga. 30Gwadi nyawa hayo bok sas alfoyo, hayo Ama twa wa no kayoday it manga ogat. 31Yakanga ham fag idwa kadala, ham mahalga man has kaaywanon fag manga maya. 32Nyawa faktaw kagbaya sas manga taw fagdogan kitay hanya angko wa sakop, ho bomaya yadi aban, sangko Ama atobangan sam tongod, kitay tonya fag taw angko wa sakop ngay. 33Dapat ay, nyawa faktaw kagtangkod angko sas fagdogan manga taw, ho tomangkod yadi hanya sangko Ama fagdogan, ka sawat banwanan sam tongod. 34Ham fag idwa gayfan kitay honbangkad hastay kaarakitay igdiya kahowayan hastay is baba daga. Honbangkad hastay ha diya yadi talibong, bohonwa kahowayan. 35Maskin honbangkad hastay kaarakitay ho falaban kasta anak ama hat ama, kasta anak ina hat ina, kasta nogang ina hat nogang ina magorang. 36Hanggan ista kalaban ka yadi talanahan. 37Ka galwasit ama ngatay it ina bohondi kito hangko no galwasi, idwa maangay sangko. Ka galwasit anak ama ngatay ina bohondi kito hangko no galwasi, idwa yadi maangay sangko. 38Kadwa gagwanta mahori, bilang kafang igfasan it sadili fatimbangan hayo, ginyadwag tahin angko, idwa yadi maangay sangko. 39Ka kwangit it sadili haboyagan hangko, hanya abadwa ha akwa haboyagan, dapat kadwa kwangit it sadili haboyagan kawa hangko, hanya ha tanggapon haboyagan. 40Kagtanggap hayo, aho yadi it fagtanggapon, hanggan kagtanggap angko igtanggap yadi kagsogo angko. 41Kagtanggap sadik fangampang maskin tonya in Diyos fangampang, tomanggap ka fasalamat ka maangay han Diyos fangampang. Kagtanggap sadik taw fiyat ogali, maskin ka taw fiya, tomanggap ka fasalamat ka maangay has fiya fag taw. 42Nyawa faktaw kagfainom, nyawa di sadik ongot danom magnaw, hangko sakop fag taw ka ogbot it kangayanan, maskin tonya angko wa katogbong, hogfwayong ha hayo kitay, matohoyanan hanya tomanggap it fasalamat aban.

will be added

X\