MARKOS 9

1Is Hisos iglwang is taw, Hogfwayong hayo, bonwa bohag, tiba taw istay idya matay nodya lomag kitay is Diyos kabali wa hari, ha karigonan dahol. 2Nonsagaya onom ik sirang, is Hisos nafasaman git manga katogbong iba, inda Pidro, da Santyago, da Hwan, nataban ka tolo has baba moyod abwat. Ta no sinya wan, ta nalag in Hisos habilogan in-oman wan, fiya wa dahol kabantay, hanggan 3it manga rotay it kaabohayan di masilaw wan, abohay wa dahol dahol, bondi kitos nabakbak non-abohay kat rotay, nyawa faktaw. 4Da Pidro nalag inda Iliyas da Mwisis kampang han Hisos. 5Yakangas Pidro nalwang han Hisos, Kafiyaon, hyami Fon. Tam fag istay yapdik madogayan. Mi fomalo hayo tolok dongdongan, insadi hyamo, insadi in Mwisis, insadi in Iliyas. 6Is Pidro nalwang kitonya kawa ka tolok katogbong indala wa dahol iglag, yakangas Pidro gadaliyan wa kampang. 7Ginya madi sadik linyabo nalanbong is taw. Gis basad linyabo ha nahampang, iglwang kiti, Toy angko fagalwasiyon fag anak, fag hanya ka hayo fagtalingaon. 8Ginya da Pidro fadi wadnamarantayon madali hasta dayo, yabay tadwa ha lagan kasta ofod haraw, no bonwas Hisos lamang kasta lagan kan-goyan. 9Araw, ta noglahaw has lwad, is Hisos natogon it manga katogbong kitay, Aho, Kanbali Taw, nodyan boyag ya gis kahatayan, ham hayap igfwayong has taw kan Diyos nafalag hayo kati haraw. 10Yakanga da Pidro idyapdig fwayong has taw it lagan, dapat ta garintawan no kanat kahologan is Hisos no gwas kitay, hamboyag ya domwag gis kahatayan. 11Ta gintaw in Hisos, Kana mayon ka mangag faadal Batasan Hodyo noglwang kitay bago bago is Iliyas fag imbangkad yapdi? 12Is Hisos nasagot kitay, Bago bago is Iliyas imbangkad ya ngay, mamatalaga fagayo fag manga bagay. Kana mayon nonsorat yadi kitay, aywan angko fagagwantaon mahori, aho Kanbali Taw, manga taw yomod yadingko. 13Dapat hogfwayong hayo, is Iliyas inbangkad wan. Manga taw naibolon ha hanya no kinda odista fakasayaon. In-anod wa ngap kito kansorat hyabi no kinday ha hanya. 14Da Hisos nondasog hat manga katogbong tiba, ta nalag manga taw kaaywanon sasta ligongan. Ka mangag faadal Batasan Hodyo igfabodbohagan yadi in Hisos manga katogbong. 15Ginya madi, ka manga taw ayo ayo, no nalag di ngay in Hisos, ta dagos wandolaw wa dahol. Ta nagobok hanya a, ta gintaw, Ha gindawan? 16Is Hisos naintaw has taw, Kana ka hayo fagfabodbohaganon has taw? 17Ginya madi sadik ama gis basad fakaaywanan taw nasagot in Hisos, iglwang kiti, Haw, kagfaadal has taw, ho nataban angko anak ama ha hayo, maskin sadik labang kagfaboyon, igfahoriyan hanya. 18No siday no natoid, ka labang igfahakfo hanya marigon marigon, it bibig igboraan wan a, hanggan it ngifon garigitan wan. It habilogan di kagwang wan. Maskin di nga hogfaaronganon ha hyamo manga katogbong ta nangos faalinan ka labang, dapat tadwa nasyagan nafaalin. 19Is Hisos nalwang has taw, Ham kawa ka kati fag masohod fag manga taw idyag syag angko. Ginahin ya kin aho nangos fag omofod yapdi hayo, ham gayfan? Kandogay da aho fag gagwanta yapdi hayo? Tabanan ka anak hastay. 20Ginya madi ta nataban ka anak han Hisos. Ka labang no nalag in Hisos, dagos wa nafakidkisayan ka anak, nafahakfo hanya has baba daga. Ka anak infolid wanfolid. It bibig igboraan wan. 21Is Hisos naintaw hat ama, Kandogay day im anak no kito? Ka ama nasagot, Giwas ogbot ginan danwa kitonya. 22Ka labang fagaba wagfahakfo angko anak has basad afoy, hanggan igfatogna has basad danom kaarakitay igdaog hanya. Dapat, haw no somyagan di, fakaawa wa hyami, togbongan yap hyami nangos. 23Is Hisos iglwang hanya kitay, Kana mayon haw noglwang kitay, Aho no somyagan di? Manga taw nogsyag angko nyawa kana im-anod wa ngay. 24Ka ama madali wa nasagot, nahampang marigon, iglwang, Hogsyag ha hyamo ngay. Haw noglag aho korang yapdi nogsyag ha hyamo, togbongan yap angko igsyag marigon. 25Ginyas Hisos no nalag ka fakaaywanan fag manga taw kabarangkadan ya ngay, is Hisos nangabaya ka labang. Nalwang hanya kitay, Haw, ka sadik labang kagfaboyon yagfabongkok ya, hogsogo wa hyamo, fag galin wa gis nwa fag anak. Ha fag fawa kafwali domwag hanya. 26Ginya ka labang no nafarokyaw ka anak hanggan nafahidkisayan wa dahol dahol, ginya yabay nalin wa ginya. Ka anak in-igyan wa baba daga, bilang wa natay. Yakanga aywan ka nalwang, Yabay yabay, natay wan. 27Dapat is Hisos natawid ka anak gamat a, nafabangon ka anak. Ginya ka anak nalindog ya. 28Is Hisos nonsakbaw has basad balay, it manga katogbong naintaw hanya, idwa sas manga taw fagdogan, Kana mayon mi nodwa nasyagan nafaalin tonya fag labang? 29Is Hisos nafwayong is taw, Kito fag labang idwa malin no bohonwa kitay ham domarangin mahogod. 30Da Hisos nalahaw wa ginya, nadalan sas sakop Galiliya. Is Hisos idwa kasayag fadog is taw kitay hanyan bangkad, 31kaarakitay hayapdit manga katogbong nogfaadal. Is Hisos iglwang kitay, Ta kaakbang wa fagamat angko has taw aban, aho Kanbali Taw. Ta fahatay yadingko. Dapat ay nomsagaya tolok sirang, ahom boyag ya. 32Dapat in Hisos manga katogbong idwa natwagdog kan Hisos faglwangon, ta kadala yadi gintaw hanya. 33Da Hisos indasog ya ngawan has banwa Kapirnaom. Ginya ta nonsakbaw wan hasta basad balay, is Hisos naintaw hat manga katogbong, Kana hayo fagdaraogon haraw sas boknga dalan? 34Dapat tadwa naawang, maskin it fagdaraogon sas dalan no faktaw sas taw ka abwat it kangayanan. 35Ginya madis Hisos no matokawan, nafaakbang ka Safolo-ha-Dowa. Ginyag lwang has taw, Fag bali man ista ginanan nyawa faktaw no kasaya kabali abwat man it kangayanan. Hanya fag imbali ista sogowan fagayo fagayo. 36Is Hisos nagamit sadik anak ogbot, nafalindog sasta fagbokngan. Ginya, is Hisos no nasafofo ka anak, iglwang has taw kitay, 37No faktaw kagtanggap sadik anak kito, maskin galwasi angko, aho yadi kat fagtanggapon. Kagtanggap yadingko bondi aho kat fagtanggapon, igtanggap yadi kagsogo angko. 38Is Hwan nafwayong in Hisos kitay, haw kagfaadal, Mi nalag sadik taw ka gwas hyamo ngayan nogfaalin manga labang. Mi nabando hanya maskin idwa gofod intam. 39Dapat is Hisos iglwang kitay, Ham fag idwag bando hanya maskin nyawa faktaw no gwas angko ngayan no gibolon manga madolaw, idwa lomibak angko madali. 40Maskin kadwag laban intam, intam yadi wa kaoyon. 41Hogfwayong hayo, orongan wan, nyawa faktaw nogfainom hayo sadik ongot danom maskin ham in Diyos-natogon-Famawi sakop, matohoyanan wa kitay hanya tomanggap it fasalamat aban. 42Nyawa faktaw nogfayayom has ogali dwat sadik anak ogbot to kagsyag angko, fiya man ha hanya ta no somiyok sadik bato gilingan mabyat sat boknga liyog kagfayayom has dwat, ginya omokas tonya fag taw ha basad dagat. 43Nom gamat ibolon kagtaban hyamo has ogali dwat, lifongan lamang tonya. Nyawam gamat nodwam dowa ha no hayap man has haboyagan, balay balay, fiya man has gamat no dowa haw nodyap man has fadosaan taw sas afoy kadwa kapsa. 44(Sinya manga olod idwa katay, idwa yadi kapsa ka afoy.) 45Nangos nom bitis lahawan kagtaban hyamo has ogali dwat, lifongan yadim bitis. Nyawam bitis nodwam dowa ha no hayap man has haboyagan, balay balay, fiya man has bitis no dowa haw nodyap man im-okas has fadosaan taw. 46(Sinya manga olod idwa katay, idwa yadi kapsa ka afoy.) 47Nom mata lagan man kagfasayag lag hyamo has ogali dwat, sowatan wam mata ka sadi, nyawam mata nodwam dowa ha no hayap man han Diyos sakop, balay balay, fiya man has mata no dowa haw nodyap man im-okas has fadosaaan taw. 48Sinya manga olod idwa katay, idwa yadi kapsa ka afoy. 49Fagayo im-aktom sas afoy kito yadi ka fanganon no ha asin. 50Tam fadi wadtwa kitay ka asin kafiyaon. Dapat ay, nonbol wat tamis, kinda odi nogfatamis ya ka asin, ham gayfan? Hayo manga fangayofan fag bilang wantamis kitos fanganon ha asin, ginya ham mangafiyan wa ha sadi ha sadi.

will be added

X\